სერია A. XV ტური: ცხელი დერბი და წითლად შეღებილი რომი [VIDEO]

* "იუვენტუსმა" "ატალანტას" 6-მატჩიანი მოგებათა სერია შეწყვიტა.
* მარეკ ჰამშიკი "ნაპოლის" რიგებში გატანილი გოლებით (104) ედინსონ კავანის გაუთანაბრდა.

მე-15 ტურის ცენტრალური მატჩი რომში გაიმართა, სადაც დედაქალაქური გუნდები დაუპირისპირდნენ ერთმანეთს, თუმცა იქამდე ორი გამორჩეული პაექრობა შედგა ჯერ ნეაპოლში და შემდეგ ტურინში.

მატჩი სულ რაღაც 5 წუთის დაწყებული იყო, როდესაც "ნაპოლი" "ინტერს" ორი ბურთის სხვაობით უგებდა. ჯერ ზელინსკიმ გაიტანა საშუალო დისტანციიდან, შემდეგ კი იგივე ჰამშიკმაც გააკეთა. მასპინძელთა მესამე გოლი ინსინიეს ანგარიშზეა, რომელმაც მრავალსვლიანი კომბინაცია დააგვირგვინა. ნეაპოლელები ფლობდნენ უპირატესობას და შეეძლოთ, რომ კიდევ უფრო დიდი ანგარიშით მოეგოთ, თუმცა მომენტები "ინტერსაც" ჰქონდა. მთლიანობაში, თამაში ლოგიკური შედეგით დასრულდა და "ნაპოლიმ" დაიმსახურა ეს გამარჯვება.

"ნაპოლის" ნახევარდაცვა უნდა გამოვარჩიოთ, რომელმაც აშკარად დაჯაბნა მეტოქე - ზელინსკი, ჰამშიკი და დიავარა ბრწყინვალედ მოქმედებდნენ და შუა ხაზში დომინირებდნენ. ზელინსკიმ არა მარტო გოლი შეაგდო, ბრწყინვალე საგოლე პასიც მიითვალა აქტივში, როდესაც ჰამშიკი, პრაქტიკულად, მეკარესთან პირისპირ დატოვა.

ცალკე აღნიშვნის ღირსია ამადუ დიავარა, 19 წლის ნახევარმცველი, რომელიც "ნაპოლიში" "ბოლონიადან" გადავიდა, სულ უფრო ხშირად ხვდება ძირითად შემადგენლობაში და შესანიშნავად ირჯება. მოკლედ, გამტანი ცენტრფორვარდის არყოფნის პირობებში, შუახაზელებმა გამოიდეს თავი და კრიზისში მყოფ "ინტერს" შავი დღე აყარეს...

მაურიციო სარი (ნაპოლი): "უნდა ვაღიაროთ, რომ ცოტა გაგვიმართლა და სტარტზე გატანილი ორი გოლით გადამწყვეტი უპირატესობა მოვიპოვეთ. "სასუოლოსთან" შეხვედრაში ორი ქულა დავკარგეთ, მაგრამ მაშინ უკეთ ვითამაშეთ. ესაა ფეხბურთი, რომელიც ხშირად ლოგიკას არ ექვემდებარება. რაც შეეხება განვლილ შეხვედრას, ვაჯობეთ მეტოქეს და შესაძლოა, არა ასეთი ანგარიშით, მაგრამ მოგებას ნამდვილად ვიმსახურებდით. ფეხბურთელებმა ინდივიდუალურად მოუმატეს, კარგ ფორმაში არიან და ეს შედეგებზეც უნდა აისახოს. სტაბილურად უნდა ვიასპარეზოთ, რომ ლიდერთა სამეულს მივუახლოვდეთ".

სტეფანო პიოლი (ინტერი): "მატჩის შედეგი დიდწილად სტარტზე გაშვებულმა გოლებმა განაპირობა, მაგრამ ეს არ ამართლებს დიდი ანგარიშით წაგებას და ცუდ თამაშს. ხშირად ვცდებოდით პოზიციურად, რასაც მოჰყვა კიდეც გოლები ჩვენ კარში. ვმუშაობთ ტაქტიკაზე, სტრატეგიასა და ფსიქოლოგიაზე, მაგრამ ჯერჯერობით, შედეგი არ გვაქვს სახარბიელო. ის, რაზეც ვვარჯიშობთ, ვერ გადაგვაქვს მოედანზე, რაც განვლილმა მატჩმა დაგვანახა. ეს იყო ნაბიჯი უკან, მაგრამ ჩვენ უნდა გავაგრძელოთ შრომა, რომ არსებული ხარვეზები მოკლე დროში აღმოვფხვრათ".

გენუაში განცდილი მარცხის შემდეგ "იუვენტუსი" ფერზე მოვიდა და საკუთარ კედლებში "ატალანტა" დაამარცხა. ეს ის "ატალანტაა", მიჯრით რომ მოიგო შეხვედრები და სატურნირო ცხრილის საუკეთესო ხუთეულში გამაგრდა. მოკლედ, ტურინში მეტად საინტერესო მატჩი შედგა, რომელშიც ფავორიტმა იმარჯვა და ბერგამოელთა წაუგებელი სერიაც დასრულდა...

"იუვენტუსი" ალექს სანდრომ დააწინაურა, რომელმაც მარცხენა ფრთა გაარღვია, მეტოქის საჯარიმოში შეიჭრა და ძლიერი დარტყმით დაამწუხრა სტუმრები.

მასპინძელთა მეორე და მესამე გოლები თავური დარტყმით გავიდა - ჯერ დანიელე რუგანიმ იხეირა, შემდეგ კი მარიო მანჯუკიჩმა. სტუმართა ერთადერთი და საპასუხო გოლი მრავალსვლიანი კომბინაციის შემდეგ ეფექტური დარტყმით რემო ფრეულერმა გაიტანა. აქვე ვთქვათ, რომ "იუვენტუსს" გონსალო იგუაინი დაუბრუნდა, რომელსაც ტრავმის გამო რამდენიმე მატჩი გაუცდა. გონსალო უგოლოდ დარჩა და ზოგადად, ჩრდილში იყო მოქცეული...

მასიმილიანო ალეგრი (იუვენტუსი): "გენუაში განცდილი მარცხისგან სწორი დასკვნები გამოვიტანეთ და შედეგიც სახეზეა. რთული მატჩი იყო, რომელშიც ჩემმა ფეხბურთელებმა შესანიშნავად ითამაშეს. სეზონის დაწყებიდან მხოლოდ ოთხი თვეა გასული, რაც იმას ნიშნავს, რომ ჩვენ კიდევ მოვუმატებთ. იგუაინის მშრალი სერია? - ნორმალურია, რომ "იუვეს" რიგებში გოლებს სხვა ფეხბურთელებიც იტანენ, იგუაინი კი მალე შეაგდებს და ამაზე საერთოდ არ ვნერვიულობ".

რომაული დერბი კვლავ ულტრასების გარეშე ჩატარდა, რადგან "რომას" და "ლაციოს" ყველაზე აქტიური გულშემატკივრები დედაქალაქურ გარჩევას უკვე წლებია ბოიკოტს უცხადებენ, მიზეზი კი ფედერკალჩოს მიერ საგანგებოდ ამ მატჩზე დაწესებული უსაფრთხოების გამკაცრებული ნორმებია.

რომაული დერბი ულტრასების გარეშეც ცხელი გამოდგა, რადგან გულშემატკივრებს შორის მაინც მოხდა შეტაკება, მოედანზე კი ფეხბურთელებმა იჩხუბეს და რამდენიმე წუთით მატჩი შეჩერებული იყო. აქვე ვთქვათ, რომ ჩხუბის დროს მსაჯმა წითელი ბარათი დანილო კატალდის აუფრიალა, თუმცა ის სათადარიგოთა სკამზე იყო და შესაბამისად, "ლაციომ" თამაში 11 ფეხბურთელით ჩაამთავრა.

რაც შეეხება უშუალოდ თამაშს, პირველი ტაიმი უფრო "ლაციოს" კარნახით წარიმართა, მეორეში კი "რომამ" იძალა და მოიპოვა კიდეც გადამწყვეტი უპირატესობა. ანგარიში კევინ სტროტმანმა გახსნა, რომელიც ვოლასის უხეში შეცდომის შემდეგ მეკარესთან პირისპირ დარჩა და ბურთი ბადეში გაახვია, მეორე გოლი კი რაჯა ნაინგოლანმა შეაგდო, რომელმაც დაახლოებით 35 მეტრიდან გაისროლა ზუსტად.

ამრიგად, "რომამ" უმნიშვნელოვანესი გამარჯვება მოიპოვა და შეინარჩუნა სატურნირო ცხრილში მეორე ადგილი, "ლაციო" კი ერთი ადგილით "ნაპოლიმ" ჩააჩოჩა...

XV ტური
ნაპოლი-ინტერი 3:0
გოლები: 1:0 ზელინსკი (2), 2:0 ჰამშიკი (5), 3:0 ინსინიე (51)
ნაპოლი (4-3-3): რეინა - ჰიუსაი (61. მაჯო), ალბიოლი, კულიბალი, გულამი - ზელინსკი, დიავარა, ჰამშიკი (76. როგი) - კალეხონი, ინსინიე (58. ჯაკერინი), გაბიადინი
ინტერი (4-2-3-1): ჰანდანოვიჩი - დამბროზიო, რანოკია, მირანდა, ანსალდი - კონდოგბია (56. ჟოაო მარიო), ბროზოვიჩი - კანდრევა (76. პალასიო), ბანეგა (46. ედერი), პერიშიჩი - იკარდი
გაფრთხილება: 2-3; კუთხური: 5-7; ჯარიმა: 7-12; თამაშგარე: 1-4; კარში დარტყმა: 17-15 (12-6); ბურთის ფლობა: 54%-46%; მაყურებელი: 40 000

იუვენტუსი-ატალანტა 3:1
გოლები: 1:0 სანდრო (15), 2:0 რუგანი (19), 3:0 მანჯუკიჩი (64), 3:1 ფრეულერი (82)
იუვენტუსი (4-3-1-2): ბუფონი - ლიხტშტაინერი, რუგანი, კიელინი, სანდრო - ხედირა (61. ლემინა), მარკიზიო, სტურარო - პიანიჩი (78. ევრა) - იგუაინი, მანჯუკიჩი (76. კუადრადო)
ატალანტა (3-4-1-2): სპორტიელო - ტოლოი, კალდარა, მაზიელო - კონტი (55. გრასი), კესეი, ფრეულერი, სპინაცოლა - კურტიჩი (75. დალესანდრო) - გომესი, პეტუნია (56. პეშიჩი)
გაფრთხილება: 3-2; კუთხური: 6-4; ჯარიმა: 25-18; თამაშგარე: 1-2; კარში დარტყმა: 10-3 (7-2); ბურთის ფლობა: 53%-47%; მაყურებელი: 40 000

მილანი-კროტონე 2:1
გოლები: 0:1 ფალჩინელი (26), 1:1 პასალიჩი (41), 2:1 ლაპადულა (86)
მილანი (4-3-3): დონარუმა - აბატე, რომანიოლი, პალეტა, დე შილიო - პასალიჩი, ლოკატელი, სოსა (73. ლუის ადრიანო) - ნიანგი (81. ჰონდა), სუსო, ლაპადულა (89. კუცკა)
კროტონე (4-4-2): კორდაცი - როზი, ჩეკერინი, ფერარი, მარტელა (75. სამპირიზი) - როდენი (88. ნვანკვო), კაპეცი, კრიზეტიგი, სტოიანი (71. პალადინო) - ფალჩინელი, ტროტა
გაფრთხილება: 4-4; კუთხური: 7-4; ჯარიმა: 22-19; თამაშგარე: 3-3; კარში დარტყმა: 13-7 (8-2); ბურთის ფლობა: 70%-30%; მაყურებელი: 50 000

ლაციო-რომა 0:2
გოლები: 0:1 სტროტმანი (640, 0:2 ნაინგოლანი (77)
ლაციო (4-3-3): მარკეტი - ბასტა (80. პატრიჩი), ვოლასი, რადუ, ლულიჩი - ბილია (80. ლომბარდი), პაროლო, სავიჩი - ანდერსონი, კეიტა (85. კიშნა), იმობილე
რომა (3-5-2): სჩესნი - რუდიგერი, მანოლასი, ფაციო - პერესი (90. ჟუანი), დე როსი, სტროტმანი, ნაინგოლანი, ემერსონი - პეროტი, ჯეკო
გაძევება: კატალდი (67. ლაციო)
გაფრთხილება: 4-3; კუთხური: 6-3; ჯარიმა: 21-14; თამაშგარე: 2-0; კარში დარტყმა: 9-7 (2-5); ბურთის ფლობა: 49%-51%; მაყურებელი: 40 000

პესკარა-კალიარი 1:1
გოლები: 0:1 ბორიელო (24), 1:1 კაპრარი (90)
პესკარა (4-3-2-1): ბიძარი - ძამპანო, გომბერი (90. ზუპარიჩი), ფორნაზიერი, ბირაგი - მემუშა (59. პეტინარი), ბრუგმანი, ვერე (69. მანია) - ბენალი, კაპრარი - პეპე
კალიარი (4-3-1-2): სტორარი - ისლა, კაპიტელი, ალვეში, პიზაკანე - დესენა, დი ჯენარო, ბარელა - ფარიასი (46. სალამონი) - საუ (68. მელკიორი), ბორიელო (82. მუნარი)
გაძევება: დი ჯენარო (34. კალიარი)
გაფრთხილება: 2-3; კუთხური: 8-2; ჯარიმა: 20-18; თამაშგარე: 3-1; კარში დარტყმა: 9-4 (2-2); ბურთის ფლობა: 64%-36%; მაყურებელი: 15 000

სამპდორია-ტორინო 2:0
გოლები: 1:0 ბარეტო (51), 2:0 შჩიკი (90)
სამპდორია (4-3-1-2): პუჯონი - პერეირა, სილვესტრი, შკრინიარი, რეჯინი - ბარეტო, ტორეირა, პრაეტი (83. ალვარესი) - ფერნანდესი (60. ლინეტი) - მურიელი (60. შჩიკი), კვალიარელა
ტორინო (4-3-3): ჰარტი - ძაპაკოსტა, კასტანი, როსეტინი, ბარეკა - ბენასი (70. ბოიე), ვალდიფიორი, ბაზელი (84. ასკუა) - ლიაიჩი, იაგო (79. ლოპესი), ბელოტი
გაფრთხილება: 1-4; კუთხური: 5-2; ჯარიმა: 10-20; თამაშგარე: 1-3; კარში დარტყმა: 11-12 (2-4); ბურთის ფლობა: 53%-47%; მაყურებელი: 22 000

სასუოლო-ემპოლი 3:0
გოლები: 1:0 პელეგრინი (22-პენ.), 2:0 რიჩი (36-პენ.), 3:0 რაგუზა (53)
სასუოლო (4-3-3): კონსილი - გაცოლა, აჩერბი, ანტეი, პელუზო - პელეგრინი (62. მაციტელი), მანიანელი, მისიროლი (76. სენსი) - რაგუზა, რიჩი, დეფრელი (80. მატრი)
ემპოლი (4-3-1-2): სკორუპსკი - კოშიჩი, ბელუში, ბარბა, პასკუალი - კრუნიჩი, ელ ჰაჯი (46. მაური), კროჩე - საპონარა - მარილუნგო (56. მჭედლიძე), მაკარონე (56. ჯილარდინო)
გაფრთხილება: 4-6; კუთხური: 2-7; ჯარიმა: 19-10; თამაშგარე: 2-6; კარში დარტყმა: 11-9 (7-2); ბურთის ფლობა: 44%-56%; მაყურებელი: 12 000

ფიორენტინა-პალერმო 2:1
გოლები: 1:0 ბერნარდესკი (33-პენ.), 1:1 მატო (49), 2:1 ბაბაქარი (90)
ფიორენტინა (3-4-1-2): ტატარუშანუ - სალსედო, ტომოვიჩი, ასტორი - ტელიო (67. ბადელი), ვესინო, ბორხა ვალერო, ბერნარდესკი (78. სარატე) - ილიჩიჩი (84. კიეზა) - ბაბაქარი, კალინიჩი
პალერმო (3-5-1-1): პოსავეცი - ციონეკი, პეცელა, ანდელკოვიჩი - მორგანელა (56. რისპოლი), ჰილემარკი, მატო (87. გაცი), ჩოჩევი, ალესაამი - კუაიზონი - ნესტეროვსკი
გაფრთხილება: 2-2; კუთხური: 7-6; ჯარიმა: 14-20; თამაშგარე: 3-3; კარში დარტყმა: 19-5 (9-2); ბურთის ფლობა: 58%-42%; მაყურებელი: 28 000

5 დეკემბერი
კიევო-ჯენოა 22.00
უდინეზე-ბოლონია 00.00

ბომბარდირები:
12 ედინ ჯეკო (რომა)
მაურო იკარდი (ინტერი)
10 ანდრეა ბელოტი (ტორინო)
9 ჩირო იმობილე (ტორინო)
8 მოჰამედ სალაჰი (რომა)

მომდევნო ტური
10 დეკემბერი:
კროტონე-პესკარა, სამპდორია-ლაციო;

11 დეკემბერი:
კალიარი-ნაპოლი, ატალანტა-უდინეზე, ბოლონია-ემპოლი, პალერმო-კიევო, ტორინო-იუვენტუსი, ინტერი-ჯენოა;

12 დეკემბერი:
ფიორენტინა-სასუოლო, რომა-მილანი.

ყოველდღიური სპორტული გაზეთი "ლელო"