საქართველოს ნაკრებმა ნოემბრის ტესტებზე ასპარეზობა გამარჯვებით დაიწყო. ცხადია, წარმატებულ სტარტს ჩვენი გუნდისთვის ძალიან დიდი მნიშვნელობა აქვს. ამ ტესტებზე, ფაქტობრივად, ნაკრების თავკაცის, მილტონ ჰეიგის ორწლიანი მუშაობის შედეგი ჯამდება.
ჯერჯერობით ნაადრევი დასკვნებისგან თავს შევიკავებთ, წინ კიდევ ორი მატჩია. მანამდე კი განვლილი შეხვედრის პერიპეტიებსა და ქართულ რაგბიში ახლახან მომხდარ თუ მიმდინარე მოვლენებზე საქართველოს რაგბის კავშირის პრეზიდენტს, გიორგი ნიჟარაძეს ვესაუბრეთ.
- მოდით, ჩვენი 19-წლამდელთა ნაკრების წარმატების ანალიზი გავაკეთოთ. თქვენ უშუალოდ ესწრებოდით ევროპის ჩემპიონატს. რა შთაბეჭდილება დატოვა ჩვენმა გუნდმა?
- ლისაბონში ძალიან დიდ წარმატებას მივაღწიეთ.
უახლოეს წლებში ამ ტურნირზე ჩვენი გამარჯვება კითხვის ნიშნის ქვეშ არასდროს უნდა დადგეს. ასაკობრივი ნაკრებების დონეზე ჩვენ გაცილებით წინ ვართ, ვიდრე ის ქვეყნები, რომლებთანაც ვასპარეზობთ.
ყოველგვარი გადაჭარბების გარეშე უნდა ვთქვა, რომ კულუარებშიც და პირდაპირ საუბარშიც, პირველი თამაშის შემდეგ ყველამ იცოდა, ვინ იქნებოდა ტურნირის გამარჯვებული. ჩვენი გუნდი ყველაზე ერთი თავით მაღლა იდგა.
საქართველოს ყველა ახალგაზრდულ ნაკრებთან ერთად ვყოფილვარ სხვადასხვა ტურნირზე, მაგრამ ასე შეკრული, მეგობრული და ერთი მიზნისთვის შემართული გუნდი არ მინახავს.
ამ ფორმაციის ნაკრებში ბევრი ინდივიდუალურად გამორჩეული, ძლიერი მოთამაშეა, მაგრამ მათი სიძლიერე განსაკუთრებით იმაში გამოიხატა, რომ თავიანთ ინდივიდუალურ ოსტატობას გუნდისთვის იყენებდნენ. ნაკრებმაც წარმატებას გუნდური თამაშის წყალობით მიაღწია.
ჩვენი გუნდის თამაშის ხარისხი ძალიან მაღალი იყო. ქართველმა ახალგაზრდა მორაგბეებმა თანამედროვე რაგბი ითამაშეს. მიუხედავად ამისა, სამუშაო ძალიან ბევრია. მსოფლიოს ახალგაზრდულ ალაფაზე, რომელიც აპრილში ჰონკონგში გაიმართება, მეტოქეები ერთიორად უფრო ძლიერები იქნებიან.
დრო მოსამზადებლად, მართალია, ბევრი არ გვაქვს, მაგრამ ყველანაირად უნდა ვეცადოთ, რომ ხარვეზები აღმოვფხვრათ და პროგრესი განვიცადოთ. საამისო რესურსი ნამდვილად გაგვაჩნია. ამ გუნდს კიდევ დაემატება ხუთი-ექვსი ისეთი მოთამაშე, რომლებიც ამჯერად სხვადასხვა მიზეზის გამო დააკლდა. კონკურენცია დიდი იქნება და იმედი მაქვს, აპრილისთვის ძლიერი გუნდის ჩამოყალიბებას შევძლებთ.
მადლობა მინდა გადავუხადო მწვრთნელებს: დავით ვართანიანს, ლადო კილასონიას, ირაკლი ჭყონიას და ზურაბ ამონაშვილს. მათ დიდი სამუშაო გასწიეს.
- ტურნირის დასრულების შემდეგ მალევე FIRA AER-ის შტაბბინას მიაშურეთ...
- დიახ, პარიზში FIRA AER-ის უმაღლესი დონის რაგბის კომიტეტის სხდომა გაიმართა, რომელიც ევროპაში პროფესიული რაგბის განვითარებას კურირებს.
ძალიან კარგი დისკუსიები გაიმართა: რა მიმართულებით უნდა განვითარდეს რაგბი, როგორ ვითანამშრომლოთ ექვსი ერის გათამაშებაში მონაწილე სარაგბო ქვეყნებთან, როგორ მოვაქციოთ ევროპული რაგბი ერთიანი მმართველობის ქვეშ და ასე შემდეგ. მოგვცეს სამკვირიანი ვადა, რათა ყველას თავისი მოსაზრება ჩამოეყალიბებინა აღნიშნული თემების თაობაზე.
შუალედური შეხვედრა მალე დუბლინში, IRB-ის კონგრესზე გაიმართება. მერე კი, 29 ნოემბერს ისევ პარიზში შევიკრიბებით და ყოველივე ამას, შესაძლოა, საკმაოდ საინტერესო გადაწყვეტილებების მიღება მოჰყვეს.
- საქართველოს ნაკრებმა ნოემბრის ტესტები გამარჯვებით დაიწყო. ცხადია, წარმატება სასიხარულოა, მაგრამ რამდენად დამაკმაყოფილებელია ჩვენი გუნდის თამაში?
- შედეგით უდავოდ კმაყოფილნი ვართ. ჩვენ ძლიერ, ჩვენზე უკეთეს გუნდს მოვუგეთ, გუნდს, რომელსაც მსოფლიოს თასის ყველა გათამაშებაში აქვს მონაწილეობა მიღებული; გუნდს, რომელსაც ძალიან ბევრი სახელოვანი ნაკრები ჰყავს დამარცხებული; გუნდს, რომლის რაგბის კავშირსაც განუზომლად დიდი შესაძლებლობები აქვს; გუნდს, რომელიც პროგრესს განიცდის და კარგ, თანამედროვე რაგბის თამაშობს.
ასევე იხილეთ: საქართველო-კანადა 19:15 - ქართველები მებრძოლი ხალხი ხართ, მაგრამ... [VIDEO]
მოდით, ჯერ ჩვენი ნაკრების დადებით მხარეებზე ვილაპარაკოთ. საქართველოს ნაკრებმა ძალიან პრაგმატულად იასპარეზა. სწორედ ის ტაქტიკა შეირჩა, რომლითაც აუცილებლად უნდა გვეთამაშა.
მეტოქეს ღია თამაშში არ ავყევით, რაც ჩვენთვის დამღუპველი იქნებოდა. დაცვაში ხისტად ვირჯებოდით, თუმცა პირველ ტაიმში აქ პრობლემები გვქონდა. მეორე ტაიმის დიდი ნაწილი ჩვენ ვდომინირებდით.
ურთულესი და ულამაზესი ლელო გავიტანეთ. სტაბილური გახდა შერკინება, მოვიგეთ იმდენი დერეფანი, რამდენიც ბოლო რამდენიმე თამაშისას არ მოგვიგია ერთად აღებული.
ახლა უარყოფითიც ვთქვათ: პირველ ტაიმში მეტოქეს ბურთი დავუთმეთ. ბევრი შეცდომა დავუშვით დაცვაში, ვერ ვასწრებდით გადაწყობას, პრობლემები იყო ინდივიდუალური ბოჭვისასაც. გვაკლდა თავდაჯერებულობა, რომელიც სამწუხაროდ, მხოლოდ ჩხუბის შემდეგ დაგვიბრუნდა.
ასევე იხილეთ: IRB-მ ვიტო კოლელიშვილი კანადასთან მატჩში ჩხუბის გამო დასაჯა
ხშირად ბურთი წინ გვივარდებოდა, უფრო მეტად ისეთ ვითარებაში, როცა ჩანდა, რომ შეტევა ლელოთი უნდა დასრულებულიყო. ეტყობოდა, რომ ჩვენი გუნდი ახალი შეკრებილი იყო. კანადელები ორი კვირაა ერთად არიან და ერთი თამაშის გამართვაც მოასწრეს. ყოველივეს მიუხედავად, მეტოქეს მეორე ტაიმი მოვუგეთ, რაც აქამდე ჩვენთვის პრობლემური იყო.
- მომდევნო მეტოქე აშშ-ის ნაკრებია, რომელიც კანადაზე ნაკლები გუნდი არ არის...
- ამერიკის შეერთებული შტატების ნაკრები ძლიერი გუნდია. მასთან თამაში ყოველთვის გვიჭირს, უხერხული მეტოქეა. იმედი მაქვს, რომ ჩვენი გუნდის თამაშის ხარისხი უკეთესი იქნება, ვიდრე კანადასთან იყო.
სამწუხაროდ, მერაბ კვირიკაშვილმა თითი მოიტეხა. მას ძალიან უნდა თამაში, მაგრამ შეძლებს თუ არა, ჯერ გარკვეული არ არის. ვიქტორ კოლელიშვილს ერთთვიანი დისკვალიფიკაცია მისცეს, ფეხი დაიშავა გუნდის კაპიტანმა ირაკლი მაჩხანელმა. მათ შემცვლელებს შანსი ეძლევათ, დაამტკიცონ, რომ ეროვნულ ნაკრებში თამაშს იმსახურებენ.
მიუხედავად ყველა პრობლემისა, თუ მოთამაშეები ყველაფერს სწორად გააკეთებენ, სასურველი შედეგი დადგება.
- ნოემბრის ტესტებზე ჩვენი ნაკრების მწვრთნელთა შტაბს ფრანგი სპეციალისტი, დიდიე ბესი ეხმარება. რამდენად ართმევს თავს ის დაკისრებულ მოვალეობას?
- დიდიე ბესი "მონპელიეს" შერკინების მწვრთნელია. ის მამუკა გორგოძისა და საფრანგეთში მოთამაშე სხვა წამყვანი ქართველი მორაგბეების რეკომენდაციით მოვიწვიეთ. ამ ეტაპისთვის მან დიდი ავტორიტეტი მოიხვეჭა, როგორც მოთამაშეებში, ასევე მწვრთნელებს შორის.
ბესი თავისი საქმის შესანიშნავი მცოდნეა და თუ ასე განაგრძო მუშაობა, მასთან კონტრაქტის გაფორმებაზე სერიოზულად დავფიქრდებით.
ყოველდღიური სპორტული გაზეთი "ლელო"
