რა დასამალია და, ქართველ გოგონათა საფეხბურთო ნაკრები წლების განმავლობაში მხოლოდ იმით გვახსენებდა თავს, რომ სარეკორდო ანგარიშებით მარცხდებოდა. მაგრამ გუნდის მთავარ მწვრთნელად მამუკა სვანაძის, შემდეგ კი თამაზ კოსტავას დანიშვნის შემდეგ ქალბატონი "ჯვაროსნები" მოფერიანდნენ და პროგრესიც აშკარა გახდა - აგერ, გუნდი ევროპის 2017 წლის ჩემპიონატის საკვალიფიკაციო ეტაპზე გავიდა. წინასწარი ეტაპის მეორე ჯგუფში, რომელსაც მალტამ უმასპინძლა, ჩვენმა გოგონებმა პირველი ადგილი დაიკავეს - ჯერ ფარერის კუნძულების ნაკრებს სძლიეს (2:0), შემდეგ - მასპინძელ მალტასთან ბოლო წუთზე დასანანი გოლი გაუშვეს და დამარცხნენ (1:2), ბოლო ტურში კი
შემდეგი ეტაპი მეორე საკვალიფიკაციო ციკლია, რომლის წილისყრაც 20 აპრილს გაიმართება. საქართველო მე-5 კალათაშია და, შესაბამისად, ჯგუფში ძლიერ მეტოქეებს ელის. ევროპის ჩემპიონატს 2017 წლის აგვისტოს ჰოლანდია უმასპინძლებს.
მალტაში მიღწეული წარმატების შემდეგ საქართველოს ქალ ფეხბურთელთა ნაკრები სამშობლოში დაბრუნდა. გუნდის მთავარი მწვრთნელი თამაზ კოსტავა და ფეხბურთელები "მიხეილ მესხის" სტადიონის საპრესკონფერენციო დარბაზში მედიის წარმომადგენლებს შეხვდნენ და განვლილ შეხვედრებსა და სამომავლო გეგმებზე ილაპარაკეს.
"ძალიან მძიმე ბრძოლა გვქონდა ფარერებთან. მალტამ კი ანდორასთან "გაისეირნა" და ჩვენთან დასვენებული გამოვიდა. მათთან ძალიან დასანანი მარცხი ვიწვნიეთ. მართალია, ფიზიკურად გვაჯობეს, მაგრამ თანაბარი თამაში იყო და მოგება ჩვენც შეგვეძლო.
ანდორასთან მატჩის წინ კი სტადიონზე ისეთი განწყობით მივდიოდით, რომ აუცილებლად დიდი ანგარიშით უნდა მოგვეგო და იმისიც გვჯეროდა, რომ ფარერები მალტას დაამარცხებდა.
ეს წარმატება იმის შედეგიცაა, ძალიან შეკრული და მეგობრული გუნდი რომ გვყავს. გოგონებმა ყველა დავალება შეასრულეს, ძალიან მონდომებულები იყვნენ და არ მინდა, რომ ვინმემ მათი ეს წარმატება დააკნინოს და დამსახურება დაუკარგოს.
ბედნიერი ვარ, რომ ამ გოგონებთან ვმუშაობ და იმედი მაქვს, ბევრი შრომით წარმატებას მივაღწევთ. ეს გამოცდილება ყველას გამოგვადგება, ჩემთვისაც კარგი გაკვეთილი იყო. დიდი მადლობა ფეხბურთისა და ქალთა ფეხბურთის ფედერაციებს, რომლებიც ძალიან დაგვეხმარნენ და გვერდში დაგვიდგნენ", - ამბობს თამაზ კოსტავა.
ნაკრების მთავარმა მწვრთნელმა პლეი ოფის სამზადისზეც ილაპარაკა:
"20 აპრილს მეორე საკვალიფიკაციო ეტაპის წილისყრაა. ახლა მთავარია, კარგი, შეკრული გუნდი "ავაშენოთ", რომ ყველა მეტოქეს ღირსეული წინააღმდეგობა გავუწიოთ. ამ დიდი წარმატების მიუხედავად, სამუშაო ძალიან ბევრია.
შესარჩევი ეტაპის მატჩებში ბევრი მინუსი დავინახეთ, რასაც ყურადღება უნდა მივაქციოთ და გამოვასწოროთ. შეიძლება, ჯერ არც ვართ იმ დონეზე, წარმატებას პლეი ოფშიც რომ მივაღწიოთ, მაგრამ უნდა ვიბრძოლოთ და გამოცდილება მივიღოთ. მე ამ გუნდის იმედი მაქვს".
განვლილი საკვალიფიკაციო ეტაპით კმაყოფილები არიან ნაკრების ფეხბურთელებიც.
ტატა მატვეევა, ნაკრების კაპიტანი:
"უპირველესად, თავდადებისთვის მადლობას გადავუხდი ჩემს თანაგუნდელებს. ამ მატჩებისთვის ისეთი შემართებით ვემზადებოდით, რომ გვჯეროდა, წარმატებას აუცილებლად მივაღწევდით.
გამარჯვებამ დიდი სტიმული მოგვცა და ახლა ყველა ველოდებით 20 აპრილის წილისყრას".
თაკო ტატუაშვილი, ნაკრების ფეხბურთელი: "ამ ტურნირს სამი წელი ველოდებოდით. ლიტვაში, მსოფლიოს ჩემპიონატის საკვალიფიკაციო ეტაპზე გასასვლელად სულ ცოტა დაგვაკლდა და ახლა მთელ იმედებს ამ შესარჩევზე ვამყარებდით.
ვეცდებით, მომავალში უფრო მეტი გავაკეთოთ".
(იბეჭდება მცირე ცვლილებით)
ყოველდღიური სპორტული გაზეთი "ლელო"
