ფორმულა 1: ლუისს ცხოვრების სტილი დაუწუნეს

ფორმულა 1-ში მსოფლიოს სამგზის ჩემპიონს, ლეგენდარულ ჯეკი სტიუარტს მიაჩნია, რომ სინგაპურის გრანპრიზე ლუის ჰემილტონის არც თუ ისე დამაჯერებელი გამოსვლა მისი ცხოვრების წესის შედეგია.

"როცა მუდმივად აღწევ წარმატებას, ამ შემთხვევაში იკარგება კონცენტრაცია და მიგაჩნია, რომ ყველაფერი იოლია და საქმე მარტივად კეთდება. მაგრამ, უცებ, ყველაფერი შეიძლება ისე არ წავიდეს და ცხოვრების თავისუფალმა სტილმა რბოლებში პრობლემები გამოიწვიოს.

წარმატების ტალღაზე იწყებ ცხოვრებით ტკბობას, მაგრამ ყოველთვის გამოჩნდება ვინმე, ვინც უფრო მეტს ფიქრობს სამუშაოზე და შემდეგ ჯერზე, ტრასაზე შენზე სწრაფი იქნება.

პირადად მე, ყოველთვის მეშინოდა, რომ ვიღაც ჩემზე სწრაფი აღმოჩნდებოდა - ვიღაცამ, შესაძლოა, ჩემზე უკეთ შეასრულოს სამუშაო, ვიღაცას - უკეთესი მანქანა ერგოს. ამიტომაც, ყოველთვის ვმუშაობდი და თავს მოდუნების უფლებას არ ვაძლევდი", - მოჰყავს სტიუარტის სიტყვები The Daily Mail-ს.

ჰემილტონის ბოლოდროინდელ გამოსვლებს გამოეხმაურა "ბენეტონის" ყოფილი შეფი ფლავიო ბრიატორეც: "ის ცოტათი დიჯეია, ცოტათი - რეპერი. მას ბევრი სხვა ნიჭიც გააჩნია, მაგრამ თუ ტიტულის მოგება უნდა, მაშინ სამუშაოზე უნდა იყოს კონცენტრირებული. მის ადგილას, მე უფრო ნაკლებს ვიფიქრებდი მუსიკაზე და უფრო მეტს - ფორმულა 1-ზე".

ყოველდღიური სპორტული გაზეთი "ლელო"