ზაზა ფაჩულიას და "გოლდენ სტეიტს" NBA-ს ჩემპიონობამდე 1 მოგება აშორებთ [VIDEO]

თბილისის დროით 8 ივნისს, გამთენიისას, საქართველოს კალათბურთელთა ნაკრების კაპიტნის, ზაზა ფაჩულიას გუნდმა "გოლდენ სტეიტმა" "კლივლენდთან" NBA-ს ფინალურ სერიაში მესამე შეხვედრა გამართა, მესამე გამარჯვება იზეიმა და ჩემპიონობას მიუახლოვდა. ფაჩულიას გუნდმა სტუმრად ანგარიშით 118:113 მოიგო და სერიაში 3:0 დაწინაურდა.

მატჩი ისე სრულდებოდა, თითქოს მასპინძელთა გამარჯვება გარდაუვალი იყო, თუმცა ბოლო 2-წუთნახევარში ოკლენდელებმა კევინ დურანტის მექულეობით 5-ქულიანი ჩამორჩენა აღმოფხვრეს და საბოლოოდ სწორედ ამ სხვაობით იმარჯვეს.

დურანტმა საბოლოოდ 31 ქულა მოაგროვა. ერთით ნაკლები - 30 ქულით დაასრულა შეხვედრა კლეი ტომპსონმა, რომელმაც 6 სამქულიანი ჩააგდო, სტეფ კარიმ კი შეხვედრა 26 ქულით, 13 მოხსნითა და 6 შედეგიანი გადაცემით დაასრულა.

გოლდენსტეიტელთა ქართველი ცენტრი ამ მატჩში შედეგიანობით ვერ გამოირჩა. ზაზა ტრადიციულად სასტარტო ხუთეულში იყო და მოედანზე გატარებულ 13 წუთში 1 მოხსნა და 1 პასი მიითვალა. ფაჩულიამ სამივე სროლა ააცილა, ბურთი 4-ჯერ დაკარგა და ამდენჯერვე დაჯარიმდა.

უქულოდ დაასრულა შეხვედრა კლივლენდელთა ცენტრმა ტრისტან ტომპსონმაც, ხოლო ლებრონ ჯეიმსმა შეხვედრა 39 ქულით, 11 მოხსნითა და 9 პასით დაასრულა.

აღსანიშნავია, რომ მიმდინარე სეზონში "გოლდენ სტეიტს" პლეი ოფში ჯერ არ წაუგია, ოკლენდელები ლიგის რეკორდის მფლობელები არიან, ამ დროისთვის მათი მოგებებების სტატისტიკა 15:0-ია.
მორიგი ფინალური მატჩი, რომლის მოგების შემთხვევაშიც "გოლდენ სტეიტი" ჩემპიონი გახდება, 10 ივნისს, კლივლენდში გაიმართება.