ლეგიონი: ვაკოს გოლმა "ფეიენოორდის" მეკარე გაშტერებული დატოვა [VIDEO]

ჰოლანდიის ერედივიზიონში "ვიტესმა" "ფეიენოორდს" სტუმრად 4:1 მოუგო. მატჩის მე-12 წუთზე ვაკო ყაზაიშვილმა კი ანგარიში ეფექტური გოლით გახსნა.

საქართველოს ნაკრების 22 წლის შემტევმა კარიდან წინ გამოსული მეკარე შენიშნა და საჯარიმოს გარედან თავზე გადაუგდო ბურთი (მე-9 გოლი მიმდინარე ჩემპიონატში).

ყაზაიშვილი 76-ე წუთზე შეცვალეს, ხოლო რაც შეეხება გურამ კაშიას, ვისთვისაც ეს 150-ე მატჩი იყო "ვიტესის" შემადგენლობაში, მან სრულად ითამაშა.

საქართველოს ეროვნული ნაკრების ნახევარმცველმა სანდრო კობახიძემ უკრაინის ჩემპიონატში ხარკოვის "მეტალისტის" კარი აიღო (მე-40 წუთი).

ამ გუნდთან მისმა "ვოლინმა" 3:3 ითამაშა. კობახიძე 75-ე წუთზე შეცვალეს.
რუსეთის ჩემპიონატში უცნაური მარცხი იწვნია "სპარტაკმა", რომელმაც რიცხობრივი უპირატესობა ვერ შეირგო და "ტერეკთან" 2:4 დათმო. ჯანო ანანიძემ მინდორზე ბოლო 5 წუთი გაატარა.

ამ ქვეყნის პირველ დივიზიონში კი "სკა ენერგიამ" გასვლაზე 2:1 მოუგო სანკტ-პეტერბურგის "დინამოს". ყვითელი ბარათი მიიღო გოგიტა გოგუამ, რომელმაც თავიდან ბოლომდე ითამაშა.

ლატვიის ჩემპიონატის მორიგ ტურში "სკონტომ" შინ 4:1 მოუგო "დაუგავპილსს". თამაზ პერტიას მიერ გაწვრთნილ მასპინძელთა რიგებში 90 წუთი ითამაშა მცველმა ლევან მახარაძემ.

ფინეთის ჩემპიონატში ირაკლი სირბილაძის "კუპსი" გასვლაზე განადგურდა სიკ-თან - 0:5. სირბილაძემ მინდორზე 90 წუთი გაატარა.