ჰოკეის ეროვნული ლიგის რეგულარულ ჩემპიონატში ბოლო დროს აშკარად უკლო თამაშს აღმოსავლეთ კონფერენციის ერთ-ერთმა ლიდერმა და ფავორიტმა "პიტსბურგ პინგვინზმა". 14 ნოემბერს შედგა სახელგანთქმული პენსილვანიური დაპირისპირება - "პინგვინები" ფილადელფიელი "მფრინავების" წინააღმდეგ. ბოლო ხუთი წლის განმავლობაში ეს გუნდები 42-ჯერ (!) შეხვდნენ ერთმანეთს და მიუხედავად იმისა, რომ 14 ნოემბერს "პიტსბურგმა" წააგო, მას მაინც დადებითი ბალანსი აქვს: 23 მოგება 19-ის წინააღმდეგ.ორჯერ ისინი პლეი ოფის პირველ რაუნდში შეხვდნენ ერთმანეთს და იქ სიმბოლური ფრე დაფიქსირდა: 2009 წელს სერია "პიტსბურგმა" მოიგო, სამი წლის შემდეგ კი "ფლაიერზი" იყო
14 ნოემბრის დუელი ნაკლებად შედეგიანი აღმოჩნდა. მასპინძლები მატჩის დიდი ნაწილი უფრო აქტიურები იყვნენ და მხოლოდ მესამე პერიოდში უკლეს, მაგრამ "პინგვინების" აქტიურობას კარგად ახშობდა "ფილადელფიას" მეკარე რეი ემერი, რომელმაც 30 დარტყმა მოიგერია. მან მხოლოდ სიდნი კროსბის დარტყმის მოგერიება ვერ შეძლო მაშინ, როცა "ფლაიერზი" რიცხობრივ უმცირესობაში იმყოფებოდა.
თუმცა ეს უსიამოვნება იოლად გამოასწორა ბრეიდენ შენმა, რომელმაც პირველი და მეორე პერიოდების ბოლოს ორჯერ აიღო მარკ-ანდრე ფლერის კარი. მესამე პერიოდში გუნდებმა ჯამში მხოლოდ ცხრა დარტყმა შეასრულეს და ანგარიში აღარ შეცვლილა.
"ფილადელფიამ" ზედიზედ მესამე მატჩი მოიგო და გაიზარდა მისი შანსები პლეი ოფში მოსახვედრად. "პიტსბურგისთვის" კი ეს ზედიზედ მესამე მარცხი იყო და მის ლიდერობას მეტროპოლიტენის დივიზიონში საფრთხე დაემუქრა.
თავისი გუნდის მსგავსად, ბოლო დროს არ მისდის თამაში ჩემპიონატის საუკეთესო ბომბარდირს სიდნი კროსბის და მას უკვე ავიწროებენ კონკურენტები ბომბარდირის ტიტულისთვის ბრძოლაში. კროსბიმ მატჩის შემდეგ თავადაც აღნიშნა საკუთარი პასიურობა და განაცხადა, რომ მან და ევგენი მალკინმა უფრო შედეგიანად უნდა ითამაშონ.
* * *
უნიკალური შემთხვევა მოხდა "ედმონტონისა" და "დალასის" შეხვედრაში. მასპინძლები 0:1-ს აგებდნენ, როცა მეკარე დევან დუბნიკი წინა ხაზის მეექვსე მოთამაშით შეცვალეს. და სწორედ ამ დროს, "დალასმა", 38 წამის ინტერვალით, ორი შაიბა გაიტანა ცარიელ კარში.
"ედმონტონმა" ზედიზედ მეოთხე შეხვედრა წააგო და კვლავაც ბოლო, მე-14 ადგილზეა დასავლეთ კონფერენციაში.
მინესოტა-ტორონტო 2:1 (ბ)
0:0, 0:1, 1:0, 0:0
გოლები: 0:1 რეიმონდი-6 (რაილი-6, კადრი-9), 1:1 პარიზე-9 (კოილი-2, მ. კოივუ-11).
ბულიტები გაიტანეს: პარიზე (მინესოტა), პომინვილი (მინესოტა).
პიტსბურგი-ფილადელფია 1:2
0:1, 1:1, 0:0
გოლები: 0:1 ბრეიდენ შენი-5 (სიმონდსი-6), 1:1 კროსბი-9 (მალკინი-13, ი. იოკინენი-4), 1:2 ბრეიდენ შენი-6 (დაუნი-8, ვორაჩეკი-5).
ედმონტონი-დალასი 0:3
0:0, 0:1, 0:2
გოლები: 0:1 პევერლი-4 (ჯორდი ბენი-4, რუსელი-3), 0:2 სეგუინი-8, 0:3 რუსელი-2 (დელეი-3, ლეჰტონენი-2).
ყოველდღიური სპორტული გაზეთი "ლელო"
ასევე იხილეთ:
NHL. რეგულარული ჩემპიონატი: "ბაფალომ" მწვრთნელი გაუშვა
