მამაკაცმა სამთო მოთხილამურეებმა იტალიის კურორტ მადონა დი კამპილიოში გადაინაცვლეს, სადაც ღამის სლალომი გაიმართა.ეტაპი მსოფლიოს თასის მოქმედი მფლობელის - ავსტრიელი მარსელ ჰირშერის სრული ტრიუმფით დასრულდა. მან ორივე ცდაზე საუკეთესო დრო აჩვენა, რითაც უახლოეს მდევარს წამნახევარზე მეტი მოუგო.
ამ ეტაპზე სენსაციის მოწმენიც გავხდით. მისი ავტორი გახდა იაპონელი ნაოკი იუასა. პირველი ცდის შემდეგ აზიელმა მხოლოდ 26-ე დრო აჩვენა და ბუნებრივია, მას სათვალავში არავინ იღებდა.
მაგრამ მეორე ცდა იუასას ფანტასტიკური გამოუვიდა. მის შემდეგ სტარტზე კიდევ 25 მოთხილამურე უნდა გასულიყო, მაგრამ დრო გადიოდა და
საბოლოოდ, მან პოდიუმი გაინაღდა მას შემდეგ, რაც მეორე ცდის შესასრულებლად ტრასაზე მხოლოდ გერმანელი ფელიქს ნოიროიტერი და ჰირშერი დარჩნენ.
სწორედ ამ ორმა მოთხილამურემ მოახერხა იაპონელის დროის გაუმჯობესება და იუასა მესამე ადგილამდე დაქვეითდა, მაგრამ ეს მაინც უდიდესი წარმატება იყო, რადგან აზიელი სამთო თხილამურებში ცხრაწლიანი კარიერის განმავლობაში პირველად ავიდა პოდიუმზე.
მეორე ადგილი დაიკავა ნოიროიტერმა, პირველობა კი არავის დაუთმო ჰირშერმა, რომელმაც ამ გამარჯვებით საერთო ჩათვლაში მეორე ადგილი მოიპოვა - გაუსწრო ამერიკელ ტედ ლიგეტის. ეს უკანასკნელი მეცხრე ადგილზე გავიდა, თუმცა ეს არც არის გასაკვირი - ამერიკელი თავის კარიერაში არასოდეს ასულა სლალომის ეტაპის პოდიუმზე.
ასევე არ არის მოხერხებული ეს დისციპლინა მსოფლიოს თასის ამჟამინდელი ლიდერისთვის - ნორვეგიელი აქსელ ლუნდ სვინდალისთვის. ის საერთოდ არ გასულა სტარტზე, თუმცა შეინარჩუნა გენერალურ კლასიფიკაციაში ლიდერობა - 614 ქულა აქვს, ჰირშერი მას 54 ქულით ჩამორჩება, ლიგეტი - 67 ქულით.
რაც შეეხება სლალომის ჩათვლას, აქ ჰირშერმა პირველობა მოიპოვა - მან ჩამოაქვეითა შვედი ანდრე მიურერი, რომელიც მადონა დი კამპილიოში მეოთხეზე გავიდა.
ჰირშერისთვის ეს იყო მეორე მოგება ამ სეზონში. მანამდე ის პირველი გახლდათ ვალ დ'იზერში გიგანტური სლალომის ეტაპზე. ავსტრიელი წელს შვიდივე ტექნიკური სტარტის პოდიუმზე ავიდა, სულ კი კარიერაში 14 გამარჯვება დაუგროვდა.
არ გაუმართლა რამდენიმე ფავორიტს. მაგალითად, იტალიელი ოლიმპიური ჩემპიონი ჯულიანო რაცოლი მესამე დროს უმიზნებდა, როცა მეორე ცდისას მარჯვენა თხილამური გასძვრა და ფინიშამდე ვერ მივიდა. ასევე ვერ დაასრულა დაშვება ვალ დ'იზერში ბოლო სლალომის გამარჯვებულმა, ფრანგმა ალექსის პინტურომ.
იტალიური სტარტი ერთი უსიამოვნო მომენტით აღინიშნა. პირველი ცდა დაახლოებით 15 წუთით შეწყდა იმის გამო, რომ ზედ ტრასაზე გარდაიცვალა მომსახურე პერსონალის ერთ-ერთი წევრი. როგორც მოგვიანებით დადგინდა, გარდაცვალების მიზეზი გულის შეტევა იყო.
სლალომი
1. მარსელ ჰირშერი (ავსტრია) - 1:42.50; 2. ფელიქს ნოიროიტერი (გერმანია) - 1:44.17; 3. ნაოკი იუასა (იაპ) - 1:44.78, 4. ანდრე მიურერი (შვედ) - 1:44.84; 5. მანფრედ მოელგი (იტალია) - 1:45.02; 6. მარკუს ფოგელი (შვედ) - 1:45.18...
საერთო ჩათვლა
1. აქსელ ლუნდ სვინდალი (ნორვეგია) - 569 ქულა; 2. მარსელ ჰირშერი (ავსტრია) - 560; 3. ტედ ლიგეტი (აშშ) - 537; 4. ფელიქს ნოიროიტერი (გერმანია) - 296; 5. მანფრედ მოელგი (იტალია) - 281; 6. ჩიეტილ იანსრუდი (ნორვეგია) - 272...
ყოველდღიური სპორტული გაზეთი "ლელო"
