ნინო სალუქვაძის შემდეგ ტყვიის სროლაში რიო დე ჟანეიროს ოლიმპიადის ლიცენზია მისმა შვილმა ცოტნე მაჭავარიანმაც მოიპოვა. 18 წლის ჩუბინმა ეს უნგრულ დიორში დასრულებულ ევროპის ჩემპიონატზე გააკეთა, რომელიც პნევმატური პისტოლეტიდან სროლაში ჩატარდა. ლიცენზია, პირადი რეკორდი და ერთ-ერთ სერიაში მაქსიმალური, 100-ქულიანი შედეგი - ასეთია მაჭავარიანის გამოსვლა, რომელმაც საკვალიფიკაციო ეტაპზე საკუთარი მაჩვენებელი ერთი ქულით გააუმჯობესა, 579 ქულა დააგროვა და ფინალში მეექვსე შედეგით შევიდა, საბოლოოდ კი ევროპის ჩემპიონატზე გამოსვლაც მეექვსე ადგილით დაასრულა.
საქართველო ულიცენზიოდ არც ერთ ოლიმპიადაზე არ დარჩენილა და თითოეულში სამ ათეულზე მეტ საგზურსაც
თუმცა, ოჯახურ დუეტზე ლაპარაკისას, ნუ დაგვავიწყდება, რომ ბრაზილიაში ამ ოჯახის ერთბაშად სამი თაობა იქნება წარმოდგენილი: მამა, შვილი და შვილიშვილი.
მაჭავარიანმა საკვალიფიკაციო ეტაპზე გამოსვლა კარგად დაიწყო და 10-იანს მხოლოდ ორჯერ ააცილა - 98 ქულა დააგროვა. არც მომდევნო ორს უშავდა რამე, რომლებიც ერთნაირი შედეგით - 96-ით დაასრულა; აი, მეოთხეში კი, უბრალოდ, ჩინებულად ისროლა და ყველა გასროლა 10-იანში გაარტყა - 100 ქულა. ვერ გეტყვით, ამან ემოციურად იმოქმედა ან გადაიღალა თუ რა მიზეზი იყო, მაგრამ მომდევნოებში ცოტა მოუკლო - 95 და 94 აჩვენა. თუმცა საბოლოოდ პირადი რეკორდიც გააუმჯობესა და საკმაოდ კარგი მაჩვენებელიც გამოუვიდა - 579 ქულა. ამდენივე ქულა ხუთმა მონაწილემ დააგროვა, რომლებიც მეოთხე-მერვე ადგილებს ინაწილებდნენ, ანუ ყველა შევიდა ფინალში, მათ შორის ადგილები კი დამატებითმა მაჩვენებელმა გადაწყვიტა.
საბოლოოდ მაჭავარიანს მეექვსე ადგილი ერგო, რადგან ცენტრთან ახლოს 19 გასროლა ჰქონდა. თუმცა ეს არ იყო მთავარი, მთავარი ის გახლდათ, ფინალისტებიდან ხუთს ადრევე ჰქონდა მოპოვებული ლიცენზია, რაც იმას ნიშნავდა, რომ დარჩენილი სამი ავტომატურად იღებდა საგზურს, რადგან დიორში ზუსტად სამი იღბლიანი უნდა გამოვლენილიყო.
ქართველმა ჩუბინმა ასპარეზობა ფინალშიც კარგად დაიწყო და თავიდან ლიდერთა შორის იყო, თუმცა მერე ჩავარდნა აქაც დაეწყო და საბოლოოდ 118.3 ქულით მეექვსე ადგილზე დარჩა.
ჩემპიონი თურქი იუსუფ დიკეცი გახდა 198.5 ქულით, ვინც ფინალში მერვე ადგილით შევიდა. მეორეზე ესპანელი პაბლო კარერა გავიდა 197.6-ით, ვინც საკვალიფიკაციო ეტაპი მშვენიერი შედეგით - 587 ქულით მოიგო და მთელი 4-ით გაუსწრო უკრაინელ პავლო ხოროშილოვს, რომელმაც საბოლოოდ ბრინჯაო დაისაკუთრა 178.4-ით.
ვაჟთა ტურნირში ჩვენგან ლევან ქადაგიძეც გამოდიოდა, რომელიც 566 ქულით 61-ე ადგილზე გავიდა.
სამწუხაროდ, ქალებმა დასახულ მიზანს ვერ მიაღწიეს - სალუქვაძე უმედლოდ დარჩა, ლიზი კილაძე - ულიცენზიოდ, თუმცა იქამდე ბევრიც არ დააკლდა. გეგონება, კილაძე და სალუქვაძე ერთმანეთს ეჯიბრებიან - უკვე მერამდენედ, ერთნაირი შედეგით და ერთმანეთის მეზობლად ასრულებენ შეჯიბრებას. დიორში ორივემ 378 ქულა დააგროვა, თუმცა კილაძეს უფრო მეტი "ცენტრალური" გასროლა ჰქონდა და მე-15 ადგილი ერგო, სალუქვაძე კი მე-17-ზე გავიდა.
კილაძეს 2 ქულით მეტი რომ დაეგროვებინა, ფინალში შევიდოდა სერბთა ევროპის ორგზის ჩემპიონ ბობანა ველიკოვიჩის ნაცვლად. მართალია, მაჭავარიანისგან განსხვავებით, ეს ავტომატურად ვერ მოუტანდა ლიცენზიას, რადგან ფინალში მეოთხე უსაგზურო იქნებოდა, მაგრამ იქ რა მოხდებოდა, კაცმა არ იცის. მაგალითად, ერთ-ერთი ულიცენზიო, მასპინძელი ვიქტორია ეგრი, პირველივე წრეში გამოვარდა. კილაძე ულიცენზიოდ კი დარჩა, მაგრამ 16 წლის სპორტსმენისთვის (ისიც რამდენიმე დღის წინ გახდა) ეს არაა ტრაგედია - მას ყველაფერი წინ აქვს.
ევროპის ჩემპიონი უკრაინელი ევროპის, მსოფლიოსა და ოლიმპიური ჩემპიონი ოლენა კოსტევიჩი გახდა, რომელმაც შესარჩევშიც მშვენივრად ისროლა (388) და ფინალშიც 200.9 ქულით გაიმარჯვა. მეორეზე ბულგარელი ანტოანეტა ბონევა გავიდა 199.0-ით. საინტერესოა, რომ შესარჩევშიც მეორე იყო 385 ქულით. ბრინჯაოს სერბი მსოფლიოს ჩემპიონი ზორანა არუნოვიჩი დაეუფლა, რომელმაც მედალთან ერთად ლიცენზიაც მიიღო, ანუ ეს ამხელა ტიტულის მფლობელი ოლიმპიური მატარებლის ბოლო ვაგონს შეახტა.
მის გარდა, საგზურები ეგრიმ და ხორვატმა მარია მაროვიჩმა მიიღეს. ულიცენზიოდ დარჩნენ ბულგარელთა ორგზის ოლიმპიური ჩემპიონი მარია გროზდევა და გერმანელთა მონღოლური წარმოშობის ორ-ორგზის მსოფლიოს ჩემპიონი და ოლიმპიური ბრინჯაოსმედალოსანი მუნკბაიარ დორჯსურენი. შეგახსენებთ, რომ ისინი შემოდგომაზე თბილისშიც ჩამოვიდნენ სალუქვაძესთან მოსამზადებლად.
ამდენად, ევროპის წლევანდელი ჩემპიონატი წარმატებული გამოდგა ქართველი მსროლელებისთვის - ერთი მედალი და ერთი ლიცენზია მოიპოვეს. შეგახსენებთ, რომ ტურნირის პირველივე დღეს გოგონებში ვერცხლის მედალი ქუთაისელმა ნინო ხუციბერიძემ მოიპოვა.
(იბეჭდება მცირე ცვლილებით)
ყოველდღიური სპორტული გაზეთი "ლელო"
