რაგბი ევროპის მესამე, 2023 წლის გათამაშების ფინალურ შეხვედრას 22 დეკემბერს თბილისი, ავჭალის რაგბის სტადიონი უმასპინძლებს."შავ ლომსა" და ისრაელის "თელ-ავივ ჰითს" შორის გადამწყვეტი თამაში 17 საათზე დაიწყება.
რაგბი ევროპის სუპერთასი მესამედ ტარდება და ფინალურ მატჩს თბილისი მეორედ მასპინძლობს. მიუხედავად იმისა, რომ პირველ გათამაშებაში "შავ ლომს" უკეთესი შედეგები ჰქონდა, ფინალი ლისაბონში დაინიშნა. ჩვენმა გუნდმა ადგილობრივ "ლუზიტანუშს" 17:14 სძლია და ჩემპიონი გახდა.
მეორე გათამაშების ფინალს უკვე თბილისმა უმასპინძლა და "შავმა ლომმა" "ჰითი" შარშან 29:17 დაამარცხა.
წელს ეს გუნდები ზედიზედ მეორე ფინალს ითამაშებენ.
ჯგუფის დასკვნით მატჩში, კვიპროსში, ლიმასოლში, "შავმა ლომმა" პირველ ტაიმში დიდი უპირატესობა მოიპოვა. "ჰითმა" შესვენების შემდეგ შეძლო ჩამორჩენის შემცირება, თუმცა გამარჯვება ქართველებს დარჩათ – 29:27.
ნახევარფინალში ორივე გუნდმა უპრობლემოდ იმარჯვა. "შავმა ლომმა" "იბერიანსი" "ავჭალაზე“ 41:0 დაამარცხა. "ჰითი" მეორე ჯგუფის გამარჯვებულ "ვულვზს" რუმინეთში ეწვია და 31:6 სძლია.
სულხან ჩიხლაძე მესამე ადგილისთვის იმსაჯებს
სუპერთასის ფინალამდე "შავი ლომი" უელსში, ჰლანეჰლიში, ადგილობრივ "სქარლეთს" ჩელენჯ თასის მეორე ტურში ერკინება. შეხვედრა 15 დეკემბერს, ჩვენი დროით 23:55 საათზე იწყება.
მიმდინარე კვირის ბოლოს, 16 დეკემბერს, გაიმართა რაგბი ევროპის სუპერთასის სამი თამაში, სადაც მე-7 (ვორიორზი - დელტა), მე-5 (დევილზი - ლუზიტანუში) და მესამე (იბერიანსი - ვულვზი) ადგილები გათამაშდება.
რადგან ქართული გუნდი ყოველ წელს ფინალში თამაშობს, იქ ქართველი რეფერის დანიშვნა ვერ ხერხდება და შესაბამისად, ჩვენს ბრიგადებს ბრინჯაოს ფინალის მსაჯობა უწევთ.
ამჯერად "იბერიანსისა" და "ვულვზის" შეხვედრას, რომელსაც ამსტერდამი უმასპინძლებს, სულხან ჩიხლაძე განსჯის. მან 7-კაცა რაგბიში დიდი პროგრესი განიცადა და მსოფლიო სერიის ჩელენჯერში მიიწვიეს, პარალელურად კი, 15-კაცა რაგბიშიც წინ მიიწევს და მნიშვნელოვანი თამაშის განსჯა ანდეს.
სასიხარულოა, რომ ჩიხლაძე ამსტერდამში ერთადერთი ქართველი არ იქნება. მას კიდიდან პაპუნა ჭიქაბერიძე დაეხმარება, რომელიც პირველი ასისტენტია, მეორე ასისტენტი კი მოლდოველი ეუგენიო პროკოპი იქნება.
Rugby.ge
ჩელენჯ თასი | ხუთი დებიუტანტი და ექვსი ცვლილება სასტარტოში
!["შავი ლომი" "კლერმონთან" უშანსოდ დამარცხდა [VIDEO]](/pictures/image7/45ad77661f2e6a973532f658ddd1c73e.jpg "\"შავი ლომი\" \"კლერმონთან\" უშანსოდ დამარცხდა [VIDEO]")
