3×3 კალათბურთში Urban Fest-ის თბილისის თასის გამარჯვებული გუნდი Scooby გახდა

გუნდი Scooby-ს გამარჯვებით დასრულდა მასშტაბური ტურნირი 3×3 კალათბურთში, სახელწოდებით Urban Fest-ი, რომლის მთავარი ორგანიზატორი თბილისის მერია და მასთან ერთად საქართველოს კალათბურთის ფედერაცია გახლდათ. ტურნირი 2 ნაწილად ჩატარდა, რომლის შესარჩევი ეტაპი 2 ივლისს გაიმართა, ხოლო 9-ში გიორგი სააკაძის მოედნის მიმდებარედ ფინალური ტურნირი ჩატარდა.

გამარჯვებულისა და ფინალისტისთვის სოლიდური პრიზები იყო დაწესებული. ფინალში წაგებულ გუნდ "ბავშვს" (საბა გეგუჩაძე, დავით აბულაძე, ბექა ქარცივაძე, ლევან გოგალაძე) 2000-ლარიანი ვაუჩერი გადაეცა, ხოლო გამარჯვებულს – 3000-იანი. Urban Fest-ის გამარჯვებული Scooby, რომლის ღირსებასაც მამუკა ბაზუაშვილი, ბილი ალიევი, დავით დადუნაშვილი და ირაკლი გლუნჩაძე იცავდნენ, თბილისის ჩემპიონის ტიტულს დაეპატრონა.

9 ივლისს გამართულ ფინალური ტურნირის დასკვნით ნაწილს საქართველოს ეროვნული ნაკრების წევრები – გიორგი შერმადინი და ილია ლონდარიძე დაესწრნენ. ნაკრების კიდევ რამდენიმე წევრი ტურნირის არც ერთ მატჩს არ გამოჰკლებია. თბილისის მერიის დახმარებით დამზადდა ჩვენი ნაკრების წევრების – გოგა ბითაძის, სანდრო მამუკელაშვილის, გიორგი ცინცაძის, თორნიკე შენგელიას, გიორგი შერმადინის ორიგინალური სიმაღლის ბანერები, რომლებიც Urban Fest-ის მიმდინარეობისას მოედანთან განთავსდა.

ფინალურ ტურნირში მონაწილე 12 გუნდი 4 ჯგუფში განაწილდა. პლეი-ოფში თითოეულიდან საუკეთესო გავიდა და ნახევარფინალში ასეთი წყვილები მივიღეთ: "ბავშვი" – "იახვბა" 21:18, Scooby – მუხბე 19:7. ფინალური დაპირისპირება Scooby-ს დამაჯერებელი გამარჯვებით – 21:7 დასრულდა, რომლის კაპიტანმა დავით დადუნაშვილმა გამარჯვებულის თასი თბილისის მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის ხელმძღვანელის, ირაკლი ლაგვილავასგან ჩაიბარა.