ფიბა-ს ჩემპიონთა ლიგის საკვალიფიკაციოში თსუ-ს მეტოქე პორტუგალიის "ბენფიკაა"

5 ივლისს შვეიცარიის ქალაქ ჟენევაში მდებარე ფიბა-ს “კალათბურთის სახლში” ჩემპიონთა ლიგის წილისყრა გაიმართა, სადაც რიგით მე-7 სეზონის მონაწილეები ჯგუფებში განაწილდა. ასევე გაიმართა საკვალიფიკაციო ტურნირის წილისყრაც, სადაც 24 გუნდი მონაწილეობს და ჩემპიონთა ლიგაში მოსახვედრი 3 ადგილისთვის იბრძვის. ამ 24 გუნდს შორისაა თბილისის სახელმწიფო უნივერსიტეტის გუნდი, რომელიც გასულ სეზონში საქართველოს ჩემპიონი გახდა და კალათბურთის ეროვნული ფედერაციის რეკომენდაციითა და მხარდაჭერით ევროსარბიელზე გავიდა.

თსუ-ს გადადგმული ნაბიჯით ქართული საკლუბო კალათბურთი ევროპის საკლუბო რუკაზე დაბრუნდა, სადაც ბოლოს ჩვენებურმა გუნდმა 5 წლის წინ ითამაშა. "დინამო თბილისმა" ჩემპიონთა ლიგის საკვალიფიკაციო ტურნირზე ითამაშა, თუმცა ორმატჩიანი დუელი ესპანურ "ხუვენტუდთან" დათმო და 2017-2018 წლების სეზონის ევროპის თასზე იასპარეზა. თსუ-ც ანალოგიურ სიტუაციაშია. თუკი ჩემპიონთა ლიგის საკვალიფიკაციო ეტაპი ვერ დაძლია, ფიბა ევროპის თასზე გადაინაცვლებს და პირდაპირ ჯგუფურ ეტაპზე ითამაშებს, რომლის ფარგლებშიც 3 მატჩს თბილისში ითამაშებს, სამსაც – გასვლაზე.

ჟენევაში გამართულ წილისყრაზე ჩემპიონთა ლიგის რეგულარული ჩემპიონატის მონაწილე 29 გუნდი ჯგუფებში განთავსდა. წილისყრით ჯგუფებში განაწილდა ის 3 ადგილიც, რომლებსაც საკვალიფიკაციო ტურნირების გამარჯვებულები დაიკავებენ. ჩემპიონთა ლიგის მომავალ სეზონში გათამაშების ფორმატი უცვლელი დარჩება. მონაწილე 32 გუნდი 8 ჯგუფში იქნება განაწილებული და მომდევნო, მე-2 ჯგუფურ ეტაპზე 16 საუკეთესო გავა. ჩვენ ამ ეტაპზე საკვალიფიკაციო ეტაპი გვაინტერესებს, სადაც თსუ ასპარეზობს და მისი ფორმატი შემდეგნაირია:

ჯგუფურ ეტაპზე დარჩენილი 3 ადგილისთვის, როგორც ვთქვით, 24 გუნდი იბრძვის. ამ გუნდებიდან 8 არის თავისი ქვეყნის ჩემპიონი, რომლებსაც ფიბა-მ ცალკე საკვალიფიკაციო ტურნირი დაუთმო, რომელსაც პირობითად “ჩემპიონთა გზა” (Champions path) დაარქვა. ამ 8 გუნდიდან საუკეთესო მიიღებს ჩემპიონთა ლიგის ჯგუფური ეტაპის საგზურს, ხოლო დარჩენილი 2 ადგილისთვის კიდევ 16 გუნდი ცალ-ცალკე (8-8) იბრძოლებს. ანუ 3 8-გუნდიანი ბადე შეიქმნა, რომლებშიც ბრძოლა თავისთავად მეოთხედფინალიდან დაიწყება და თითოეული ბადის გამარჯვებული მიიღებს ჩემპიონთა ლიგის საგზურს.

თსუ არის ჩემპიონთა ბადეში, რომელშიც ასევე 7 ქვეყნის ჩემპიონი მოხვდა: "ბენფიკა" (პორტუგალია), "ლევიცე" (სლოვაკეთი), "აეკ ლარნაკა" (კვიპროსი), "კალევ-კრამო" (ესტონეთი), "ბაკენ ბიარსი" (დანია), "პეჟა" (კოსოვო) და "ნორჩეპინგ დოლფინსი" (შვედეთი). ამ 8 ქვეყნის ჩემპიონიდან 1 მიიღებს ჩემპიონთა ლიგის საგზურს. საკვალიფიკაციო ტურნირის მონაწილე 16 გუნდი არ არის საკუთარი ქვეყნის ჩემპიონი, თუმცა ისეთ ლიგებს წარმოადგენენ, რომლებიც ევროპაში წამყვანები არიან და ჩემპიონთა ლიგაში არაერთი გუნდი ჰყავთ. მაგალითისთვის: "შოლე" და "სტრასბურგი" საფრანგეთიდან, "ვარეზე" და "ბრინდიზი" იტალიიდან, "ობრადორიო" ესპანეთიდან, "ლეგია" პოლონეთიდან, FMP სერბეთიდან და ასე შემდეგ…

საკვალიფიკაციო ტურნირის მატჩები მთლიანად ანტალიაში, 25 სექტემბრიდან 1-ელი ოქტომბრის ჩათვლით გაიმართება. წილისყრამ თსუ-ს მეტოქედ პორტუგალიის 29-გზის ჩემპიონი "ბენფიკა" არგუნა. ამ გუნდებს შორის გამარჯვებული "ლევიცესა" და "აეკ ლარნაკას" შორის უმჯობესს შეხვდება და “ჩემპიონთა გზის” ფინალში გავა, სადაც ბადის მეორე მხრიდან ("კალევი" v "ნორჩეპინგი", "ბაკენ ბიარსი" v "პეჟა") გამოსულ საუკეთესო გუნდს ჩემპიონთა ლიგის საგზურისთვის დაუპირისპირდება. სერიები ერთმატჩიანია. დამარცხებული გუნდები საკვალიფიკაციო ტურნირში ასპარეზობას ასრულებენ და წინასწარ დაფიქსირებული განაცხადის საფუძველზე ფიბა-ევროპის თასზე ინაცვლებენ. ჩემპიონთა ლიგაში ასპარეზობის განაცხადის გაკეთების დროს თსუ-ს წაგების შემთხვევაში ფიბა-ევროპის თასზე გადასვლის სურვილი უკვე დაფიქსირებული აქვს.

როგორც ვთქვით, გარკვეულია ჩემპიონთა ლიგის ის ჯგუფებიც, რომლებშიც საკვალიფიკაციო ტურნირების გამარჯვებული გუნდები მოხვდებიან. “ჩემპიონთა გზის” გამარჯვებული მოხვდება ჩემპიონთა ლიგის G ჯგუფში, სადაც თავი თურქულმა "გალათასარაიმ", ისრაელის "ჰაპოელმა" და ბერძნულმა "პაოკმა" მოიყარეს. ანუ საკვალიფიკაციოში წარმატების შემთხვევაში თსუ-ს ევროპის ამ სახელიან გუნდებთან მოუწევს ასპარეზობა.

ფიბა-ს “კალათბურთის” სახლში გამართული წილისყრა ტურნირის აღმასრულებელ დირექტორ პატრიკ კომნიოსთან ერთად ჩემპიონთა ლიგის მოქმედმა ჩემპიონმა, "ტელეკომ ბონის" მოთამაშე მიხაილ კესელსმა და ცნობილმა ებრაელმა კალათბურთელმა, იერუსალიმის "ჰაპოელის" ექსკაპიტანმა ლიორ ელიაჰუმ წაიყვანეს.