მორიგი გასვლა თელავში განხორციელდა, სადაც საქართველოს კალათბურთის ეროვნული ფედერაციის რეგიონული განვითარების დეპარტამენტის წარმომადგენლები გასული წლის დეკემბერშიც იმყოფებოდნენ და მაშინ კახეთის ფედერაციას ფარები, პროფესიონალური საკალათბურთო მოწყობილობები და როგორც სათამაშო, ისე სამწვრთნელო ამუნიცია ჩაუტანეს. ამჯერად თელავის სპორტსკოლამ, სადაც ყველა ასაკობრივი კატეგორიის გუნდები ვარჯიშობენ, ფიბა-ს სტანდარტების ტაბლო და 24-წამის მთვლელი მოწყობილობები მიიღო, რაც ადგილობრივებს საშუალებას მისცემს, საქართველოს ჩემპიონატის მატჩებს უმასპინძლონ.
საქართველოს კალათბურთის ეროვნული ფედერაცია საკალათბურთო ინვენტარის ნაწილს ფიბა-ს ახალგაზრდობის განვითარების პროგრამის ფარგლებში იღებს, ნაწილს კი საკუთარი სახსრებით საზღვარგარეთ ყიდულობს, რომლებსაც რეგიონების განვითარების დეპარტამენტის ორგანიზებით ჩვენი ქვეყნის მასშტაბით ანაწილებს. დახმარებას იღებენ რეგიონებში არსებული ადგილობრივი საკალათბურთო ფედერაციები, რომლებიც თავის მხრივ ინვენტარს საჭიროებისამებრ საკუთარ რეგიონში ანაწილებენ.
თელავში ტაბლო და 24 წამის მთვლელი მოწყობილობები რეგიონების განვითარების დეპარტამენტის ხელმძღვანელ შალვა ონიანთან და წარმომადგენელ ალეკო პეტრიაშვილთან ერთად საკუთარი ავტომობილით ჩაიტანა საქართველოს კალათბურთის ფედერაციის ვიცე-პრეზიდენტმა ნიკოლოზ ცქიტიშვილმა. კახეთის კალათბურთის ფედერაციის პრეზიდენტის, სოსო იაგორაშვილის განცხადებით, თელავის სპორტსკოლის პატარა ტაბლო დიდი ხანია, მწყობრიდან იყო გამოსული და ამის გამო დარბაზი, სადაც თითოეულ ასაკობრივ კატეგორიაში რამდენიმე გუნდი ვარჯიშობს, რომლებიც საქართველოს ჩემპიონატებშიც მონაწილეობენ, ოფიციალურ მატჩებს ვერ მასპინძლობდა.
აღნიშნული პროგრამის ფარგლებში, ბოლო ერთ თვეში უკვე სამი ქალაქის – გორის, ბათუმის და თელავის საკალათბურთო სკოლებმა მიიღეს ფიბა-ს სტანდარტების ტაბლო, რის შემდეგაც მათ გუნდებს შესაძლებლობა ეძლევათ, მეტი ინტენსივობით აწარმოონ საკალათბურთო მეურნეობა და ნებისმიერი დონის ოფიციალურ თუ ამხანაგურ მატჩებს უმასპინძლონ.
GBF
