საფრანგეთის ნაკრების ყოფილი ფეხბურთელი დავიდ ჟინოლა კომაშია

საფრანგეთის ნაკრების ყოფილი ნახევარმცველი დავიდ ჟინოლა კომატოზურ მდგომარეობაში იმყოფება. ამის შესახებ L'Equipe-ი იუწყება.

49 წლის ჟინოლამ თავი შეუძლოდ ნიცაში, ფეხბურთის თამაშის დროს იგრძნო, რის შემდეგაც ის მონაკოს სამედიცინო ცენტრში შვეულმფრენით გადაიყვანეს. როგორც ირკვევა, ყოფილ ფეხბურთელს გულის შეტევა ჰქონდა. ამ დრომდე ის უგონო მდგომარეობაშია.

დავიდ ჟინოლამ "პარი სენ-ჟერმენის" შემადგენლობაში 1994 წელს საფრანგეთის ჩემპიონატი მოიგო, 1993 და 1995 წლებში კი ქვეყნის თასი დაისაკუთრა. ეროვნულ ნაკრებში ჟინოლამ 17 მატჩი ჩაატარა და 3 გოლი გაიტანა. სხვადასხვა დროს მას ასევე უთამაშია "ნიუკასლში", "ტოტენჰემში", "ასტონ ვილასა" და "ევერტონში". საფეხბურთო კარიერა ჟინოლამ 2002 წელს დაასრულა.

2015 წელს დავიდ ჟინოლამ ფიფას საპრეზიდენტო არჩევნებში კანდიდატად მონაწილეობის სურვილი გამოთქვა.