მუნდიალის მეოთხედფინალში პორტუგალიისა და მაროკოს შეხვედრის შემდეგ (0:1) სოციალურ ქსელში ვირუსულად გავრცელდა ერთი პატარა გოგოს ვიდეო, რომელიც საკუთარი ნაკრების გამარჯვების შემდეგ კრიშტიანო რონალდოზე ხუმრობს.
"პორტუგალიის აეროპორტი ამ გზაზეა (თითით აჩვენებს). და სად არის რონალდო? საკუთარ მანქანაში ტირის ალბათ, საწყალი რონალდო".
ამ სიტყვების შემდეგ კრიშტიანოს მხარდამჭერებისგან და არამხოლოდ მათგან პატარა გოგონას თავს კრიტიკა და ბულინგი დაატყდა, რის გამოც ფსიქოლოგიური პრობლემები შეექმნა. ამ ამბავზე მისმა დედამ ისაუბრა და ქომაგებს გაჩერებისკენ მოუწოდა:
"მოგესალმებით, მე იმ პატარა გოგონას დედა ვარ, რომელიც კრიშტიანო რონალდოს ვიდეოს
ჩაწერის შემდეგ პოპულარული გახდა. პირველ რიგში, ჩემი ინგლისურისთვის ბოდიშს მოგიხდით. მინდა გითხრათ, რომ ის ახლა მძიმე ფსიქოლოგიურ მდგომარეობაშია, შექმნილი ვითარებიდან გამომდინარე, უარს ამბობს საუბარსა და ჭამაზე. გთხოვთ, გაჩერდით, მან ფეხბურთის შესახებ არაფერი იცის, ის უბრალოდ იმეორებდა იმას, რასაც გარშემომყოფებისგან ისმენდა, არ უნდოდა თქვენი პროვოცირება... ის 9 წლისაა, პატარა გოგონაა, რომელიც სოციალური ქსელიდან დიდ ზეწოლას იღებს, მსხვერპლია ერთი უნებლიე ხუმრობის... ბოდიშს გიხდით შექმნილი ვითარებისთვის, გთხოვთ, გაუფრთხილდით მის მენტალურ მდგომარეობას, მისი მეგობრებიც კი აბულინგებენ. გთხოვთ, აპატიეთ მას. ვწუხვარ, გთხოვთ, შეწყვიტეთ, გთხოვთ...".
