ევროპის 21-წლამდელთა ჩემპიონატის მეოთხედფინალში საქართველოს ნაკრები ისრაელთან პენალტების სერიაში დამარცხდა.
ჩვენი გუნდის მწვრთნელმა სვანაძემ წინა მატჩისგან განსხვავებით მხოლოდ ერთი ცვლილება განახორციელა, სასტარტოში ლომინაძის ნაცვლად გაგნიძე დააყენა. მეტოქე დებიუტში უკეთ გამოიყურებოდა და მამარდაშვილთან პირისპირ გასულმა ტურგემანმა ვერ გაიტანა. ამას გარდა, ოთხჯერ შორიდან უშედეგოდ სცადეს კარის დალაშქვრა. ქართველ ფეხბურთელებს ბურთის დაჭერა და იერიშების ორგანიზება უჭირდათ. სტუმრებმა კი კიდევ ერთი მომენტი შექმნეს, როდესაც გლუხის დარტყმული ბურთი მამარდაშვილმა მოიგერია. პირველი ტაიმის დასასრულს საქართველოს ნაკრები გააქტიურდა, გამოსვლაზე მეკარე პერეცის შეცდომის შემდეგ მექვაბიშვილმა კარში დაარტყა, მაგრამ ბურთი მცველს მოხვდა და კუთხურზე გადავიდა.
მეორე ტაიმის დასაწყისში ისრაელს ისევ მიეცა შანსი - ერთი ერთზე გასულ ტურგემანს მამარდაშვილმა არ დაანება გატანა, მერე კი ბურთი ძელს მოხვდა. აქედან მოყოლებული უპირატესობას საქართველოს ნაკრები დაეუფლა, წიტაიშვილის სწრაფმა დრიბლინგმა შედეგი არ გამოიღო. სტუმრებმა სახიფათო კონტრიერიშებით გვიპასუხეს და კიდევ ორჯერ გადაგვარჩინა მეკარემ. თამაში უკვე მაღალ ტემპში მიმდინარეობდა, ვიზავი ჩვენს გუნდს წნეხის ქვეშ ჰყავდა, თუმცა რეალური მომენტის შექმნას ვერ ახერხებდა. კარგად შევიდა შცვლაზე მოისწრაფიშვილი, რომლის ჩაწოდებული ბურთი გაგუამ კარს ააცილა, ბოლოს გაგუას მიერ ზედ საჯარიმოს ხაზთან მოპოვებული საჯარიმოდან დავითაშვილის დარტყმული ბურთი ცოცხალ კედელს მოხვდა, ძირითად დროში გოლი არ გავიდა და ექსტრა-ტაიმები დაინიშნა.
თამაშის სურათი ექსტრა ტაიმებშიც არ შეიცვალა, სვანაძის შეგირდები უპირატესობას ფლობდნენ, საჯარიმოდან ჩაწოდებულ ბურთზე გაგუამ მეურვეს დაასწრო, მაგრამ კარში ვერ გადაგზავნა. მეორე დამატებულ ტაიმში საქართველოს ნაკრები შტურმზე გადავიდა, სტუმრებმა თავდაცვა შეძლეს, პენალტების სერიაში კი 4:2 იმარჯვეს.
საქართველო - ისრაელი 0:0 (პენ 2:4)
საქართველო: მამარდაშვილი, გოჩოლეიშვილი, კალანდაძე, გელაშვილი (ხვადაგიანი 46), საზონოვი, გაგნიძე (გულიაშვილი 97), მექვაბიშვილი, დავითაშვილი, წიტაიშვილი (მოისწრაფიშვილი 70), აზაროვი, გაგუა
დიდი მატჩის დღე! ერთ ნაბიჯში ნახევარფინალსა და ოლიმპიადასთან - გადაჭედილი "დინამოს" ძალა...
![U21: საქართველოს ნაკრებმა ჩრდილოეთი მაკედონია დაჯაბნა და მამაცაშვილის ულამაზესი გოლით უმნიშვნელოვანესი სამი ქულა მოიპოვა [VIDEO]](/pictures/image7/072f4b70c38039ac3b32ae8e8043c2bf.jpg "U21: საქართველოს ნაკრებმა ჩრდილოეთი მაკედონია დაჯაბნა და მამაცაშვილის ულამაზესი გოლით უმნიშვნელოვანესი სამი ქულა მოიპოვა [VIDEO]")
