კვარცხლბეკზე იასონ აბრამაშვილი და ჯაბა გელაშვილი

ევროპაში კარგა ხანია, დაიწყო სათხილამურო სეზონი. სპორტსმენები გამალებით ემზადებიან 2014 წლის ზამთრის ოლიმპიური თამაშებისთვის. სტარტს სტარტი ენაცვლება და მოთხილამურეებიც რეიტინგს იუმჯობესებენ. პლანეტის უძლიერეს ათლეტებს შორის არიან ქართველებიც.

დეკემბერში საქართველოს სათხილამურო ნაკრების წევრებმა - იასონ აბრამაშვილმა და ჯაბა გელაშვილმა იყოჩაღეს.

ზამთრის ოლიმპიადის ლიცენზიანტმა იასონ აბრამაშვილმა საფრანგეთის კურორტ ისოლაში იასპარეზა საერთაშორისო ფედერაციის (ფის-ის) ეგიდით გამართულ შეჯიბრებაში - ქართველმა სპორტსმენმა სლალომში მე-3 ადგილი დაიკავა, რითაც მსოფლიო რეიტინგი გაიმყარა.

პირველ და მეორე ადგილებზე ფრანგი მოთხილამურეები - ანტონი ობერტი და რობინ ბუფეტი გავიდნენ.

ჯაბა გელაშვილმაც ფის-ის ეგიდით ჩატარებულ სლალომებში მიიღო მონაწილეობა, ოღონდ ახალგაზრდებში. მასპინძელი იყო იტალიური კურორტი პასო მონტე კროჩე. ქართველი მოთხილამურე ორჯერვე მეორე ადგილზე გავიდა.

პირველი დაშვებისას ბულგარელმა ჯორჯ ნუშევმა გაიმარჯვა, მეორე სლალომი კი შვეიცარელმა ლუკა ლუვაშმა მოიგო. ჯაბა გელაშვილი ოლიმპიადის ლიცენზიის მოსაპოვებლად იბრძვის, დრო 20 იანვრამდე აქვს.

ევროპულ ტურნირებში საქართველოს ჭაბუკთა ნაკრების წევრებმა - შოთა ნათაძემ და სოსო ჯაფარიძემაც მოსინჯეს ძალები და მსოფლიო რეიტინგი გაიუმჯობესეს.

ყოველდღიური სპორტული გაზეთი "ლელო"