ინგლისის ნაკრები: საუთგეიტის სია კაპიტნის გარეშე

ინგლისის ნაკრების მთავარმა მწვრთნელმა გარეთ საუთგეიტმა ნაკრების განაცხადი გამოაქვეყნა და მთავარ სიახლედ ის შემოგვთავაზა, რომ უეინ რუნი არ გამოიძახა.

არადა, 2003 წლის მერე, ანუ იქიდან მოყოლებული, როდესაც რუნის სანაკრებო დებიუტი ჰქონდა, პირველად ხდება ისე, რომ იგი გამოძახებული არ არის. რუნი ნაკრების ყველა დროის საუკეთესო ბომბარდირია, მან სერ ბობი ჩარლტონს გადაასწრო და 53 გოლზე ავიდა. ეს ყველაფერი უეინმა 119 მატჩში მოახერხა, რომელთა საკმაოდ დიდი ნაწილიც კაპიტნის რანგში ჩაატარა. ამაზე მეტი სანაკრებო შეხვედრა მხოლოდ მეკარე პიტერ შილტონს აქვს (125) ნათამაშები.

არის სხვა ამბებიც, განაცხადს მიღმა დარჩენილები ან კიდევ ცოტა მოულოდნელად მოწვეულები.

ნაკრების კაპიტანი, სავარაუდოდ, გარი კეჰილი იქნება, რომელიც კლუბშიც გაკაპიტნდა, "ჩელსიდან" ჯონ ტერის წასვლის შემდეგ. "ლომები" 10 ივნისს, "ჰემპდენ პარკზე" ერთ-ერთ ისტორიულ მეტოქეს, შოტლანდიას შეებმებიან. ბრიტანული დერბი საკვალიფიკაციო ეტაპის შეხვედრაა, ხოლო 13 ივნისს "სტად დე ფრანსზე" საფრანგეთთან გასამართი დაპირისპირება ამხანაგური მატჩია.

ინგლისელები თავიანთ ჯგუფში 5 ტურის მერე 13 ქულით ლიდერობენ. მეორეადგილოსან სლოვაკეთს - 9 ქულა აქვს, სლოვენიას - 8, შოტლანდიას - 7, ლიტვას - 5, ხოლო მალტას - 0.

ჯერ გამოძახებულთა სიას გაეცანით:
მეკარეები: ჯეკ ბატლენდი (სტოკი), ფრეიზერ ფორსტერი (საუთჰემპტონი), ჯო ჰარტი (სიტი), ტომ ჰიტონი (ბარნლი);

მცველები: რაიან ბერტრანი (საუთჰემოტონი), გარი კეჰილი (ჩელსი), ნათანიელ კლაინი (ლივერპული), აარონ კრისუელი (ვესტ ჰემი), ბენ გიბსონი (მიდლსბრო), ფილ ჯონსი (მანჩესტერი), კრის სმოლინგი (მანჩესტერი), ჯონ სტოუნსი (სიტი), კირან ტრიპიერი (ტოტენჰემი), კაილ უოკერი (ტოტენჰემი);

ნახევარმცველები: დელე ალი (ტოტენჰემი), ერიკ დაიერი (ტოტენჰემი), ადამ ლალანა (ლივერპული), ჯესი ლინგარდი (მანჩესტერი), ჯეკ ლივერმორი (ვესტ ბრომვიჩი), ალექს ოქსლეიდ-ჩემბერლენი (არსენალი), რაჰიმ სტერლინგი (სიტი);

თავდამსხმელები: ჯერმეინ დეფო (სანდერლენდი), ჰარი კეინი (ტოტენჰემი), მარკუს რაშფორდი (მანჩესტერი), ჯეიმი ვარდი (ლესტერი).

მეკარეები
ჯეკ ბატლენდი ცოტა ხნის წინ დაბრუნდა და ნაკრებში ადგილიც დაიბრუნა. "სტოკის" გოლკიპერმა მომჯობინების მერე რამდენიმე მატჩი უკვე ჩაატარა და ერთი-ორი წვრილი შეცდომა დაუშვა, მაგრამ გაცილებით მეტი მშვენიერი "სეივი" შემოგვთავაზა. ის ალბათ, ნელ-ნელა ფორმას ბოლომდე აღიდგენს და სტატუსი შენარჩუნებული აქვს - პირველ ნომრობას უწინასწარმეტყველებენ.

გამომდინარე იქიდან, რომ კანდიდატი ბევრია, საუთგეიტმა გამოსავალი რაოდენობის ერთით გაზრდაში იპოვა და ადგილი შეუნარჩუნა როგორც ჯო ჰარტს, ასევე "ბარნლის" ტომ ჰიტონს და თვალი ვერც "საუთჰემპტონის" ფრეიზერ ფორსტერზე დახუჭა. დიდებული სეზონი ჰქონდა "სანდერლენდის" ჯორდან პიკფორდს, მაგრამ მისი გამოძახება ჯერ ადრეა. "ვესტ ბრომვიჩის" ბენ ფოსტერის ადგილიც აღარ არის.

მცველები
დაცვაში ახალი ის არის, რომ ადგილი დაიბრუნა "ვესტ ჰემ იუნაიტედის" არონ კრისუელმა, ის კვლავაც მიიღებს შანსს. გახსოვთ, ალბათ, რა კარგ ფორმაში იყო, სანამ დაშავდებოდა. დაბრუნებულიც უმატებს და ნაკრების თავკაციც არ ტოვებს უყურადღებოდ. როგორც "მიდლსბროს" "ლობისტი", საუთგეიტი გავარდნილი რივერსაიდელების მცველს, ბენ გიბსონს ასპარეზს აძლევს, მას მართლაც შთამბეჭდავი სეზონი ჰქონდა.

ზოგადად, მისტერ გარეთი გავარდნილი გუნდებიდან ფეხბურთელების გამოძახებას არ ერიდება, თუ ისინი იმსახურებენ, ჯერმეინ დეფომდეც მივალთ. სამაგიეროდ, ვეღარ ვხედავთ "ბარნლის" მაიკლ კინს, რადგანაც ის დაშავებულია. ძალიან საინტერესოა ის, რომ გამოძახებულია კირან ტრიპიერი. მაურისიო პოჩეტინოს კაილ უოკერთან კონფლიქტი აქვს და ტრიპიერმა ის მშვენივრად ჩაანაცვლა კლუბში, ახლა კი ნაკრებშიც გაუწევს წინააღმდეგობას. მწყობრში კვლავაც არ არის მათი თანაკლუბელი დენი როუზი.

ნახევარმცველები
შუა ხაზში კონკურენცია ძალიან დიდია. არიან ტრავმირებულებიც, მაგალითად, "ჩაქუჩების" მაიკლ ანტონიო. ლაზარეთში რჩება "ლივერპულის" კაპიტანი ჯორდან ჰენდერსონი, მაგრამ მისი თანაკლუბელი ადამ ლალანა მინდორზე დაბრუნებასთან ერთად, ნაკრებშიც დაბრუნდა.

ალექს ოქსლეიდ-ჩემბერლენი სანაკრებო პერსპექტივაზე ნერვიულობს ხოლმე და მართალია, "არსენალში" იმდენი სათამაშო დრო ისევ არ აქვს, რამდენიც უნდა, მაგრამ მიწვეულთა სიაში ისიც რჩება. ადგილს ინარჩუნებენ საუთგეიტის სიმპათია "ვესტ ბრომის" ჯეკ ლივერმორიც და "მანჩესტერ იუნაიტედის" ჯესი ლინგარდიც.

თავდასხმა
თაობათა ცვლა სწორედ ამას ჰქვია - ..."მანჩესტერიდან" გამოძახებულია 19 წლის მარკუს რაშფორდი და არ არის 31 წლის უეინ რუნი. ჟოზე მოურინიოს მერე "შრეკს" ნაკრების დამრიგებელმაც აგრძნობინა, რომ ცვლილებების დროა. გამოცდილი, სამაგალითო პროფესიონალისა და ბიჭების "დამმოძღვრავის" როლს რუნისგან ჯერმეინ დეფო გადაიბარებს. ხანგრძლივი პაუზის შემდეგ ნაკრებში დაბრუნება 34 წლის ფორვარდმა უკვე აღნიშნა გოლით და შეეცდება, ასევე გააგრძელოს.

თავის ნიშასა და "კონკიას კვოტას" ინარჩუნებს "ლესტერის" ჯეიმი ვარდი, ვისაც გადასარევი სეზონი არ გამოუვიდა, მაგრამ ბოლოსკენ ისევ შევიდა ფორმაში. ბუნებრივია, არის "ტოტენჰემისა" და მთლიანად პრემიერლიგის საუკეთესო ბომბარდირი ჰარი კეინიც. დანიელ სტარიჯი, თეო უოლკოტი, დენი უელბეკი და სხვანი კი - არა.

გარეთ საუთგეიტი (ინგლისის ნაკრების თავკაცი): "შოტლანდია-ინგლისი ერთ-ერთი გამორჩეული საფეხბურთო დაპირისპირებაა და ჩვენთვის ძალიან მნიშვნელოვანი. ჯგუფში ჩვენ ახლა კარგ მდგომარეობაში ვართ და მოგება საერთოდ კომფორტულ სიტუაციაში ჩაგვაყენებდა, სწორედ ეს არის ჩვენი მიზანი. საფრანგეთშიც კარგი სპარინგი იქნება, ჩვენი ამბიცია და სურვილია, ამხანაგური შეხვედრები რაც შეიძლება ძლიერ მეტოქეებთან ჩავატაროთ.

უკვე ვეთამაშეთ ესპანეთსა და გერმანიას, ახლა კი საფრანგეთის ჯერია. სწორედ ასეთ ძლიერ გუნდებთან გვინდა გამოვცადოთ საკუთარი თავი, ვისწავლოთ და მოვუმატოთ. "სტად დე ფრანსზე" თამაში ბიჭებისთვის მშვენიერი შანსია, ისევე, როგორც შოტლანდიასთან საგარეო შეხვედრა".

ყოველდღიური სპორტული გაზეთი "ლელო"