ლევან კობიაშვილი გაისად ფეხბურთის ფედერაციის საპრეზიდენტო არჩევნებში მიიღებს მონაწილეობას - ეს მან გუშინ, თოქ-შოუ "არენაში" პირდაპირი ჩართვისას განაცხადა. ანუ დადასტურდა ის, რაზეც დიდი ხანია, ლაპარაკობენ. კობიაშვილი ყოველთვის ამბობდა, რომ განზე გადგომას არ აპირებდა; ოღონდ იქვე დასძენდა, რომ ვიდრე გადაწყვეტილებას მიიღებდა, უნდა დაფიქრებულიყო...
აი, რა პასუხი გასცა კობიაშვილმა გადაცემის წამყვანს კითხვაზე - აპირებს თუ არა, მონაწილეობა მიიღოს ფეხბურთის ფედერაციის საპრეზიდენტო არჩევნებში?
"ვიდრე ამ კითხვას ვუპასუხებდე, თემურ ქეცბაიას მიერ 2010 წელს გაკეთებულ განცხადებას გავიხსენებ. მაშინ მან თქვა, რომ ქართული ფეხბურთი გაპარტახებული იყო,
მაშინ ამ ოთხ წელიწადში რა ხდებოდა? რა გზა გავიარეთ? აქ ვისი პასუხისმგებლობის საკითხი დგება? არა მხოლოდ ნაკრების მთავარი მწვრთნელის - ერთხელ და სამუდამოდ, ფეხბურთის ფედერაციამ საკუთარ თავზე უნდა აიღოს პასუხისმგებლობა იმ წარუმატებლობაზე, რაც ქართულ ფეხბურთში ხდება.
ჩვენი პრობლემა მხოლოდ ეროვნული ნაკრები არ არის. უამრავი სხვა სატკივარია, იგივე ეროვნული ჩემპიონატი, რომელიც ლამის ყოველ წელს სხვადასხვა ფორმატით ტარდება. არ ჩანს, რომ ფედერაციას ერთი სტრატეგიული გზა, კონცეფცია გააჩნია, რომელსაც მიჰყვება.
ამიტომ არის ქართულ ფეხბურთში ცვლილებები საჭირო, უპირველესად კი, იქ, საიდანაც ჩვენი ფეხბურთი იმართება - ეს არის ფეხბურთის ფედერაცია. ახლა რაც შეეხება კითხვას - ბერლინის "ჰერტაში" ვმუშაობ, თავს კარგად ვგრძნობ და აქ ყველაფერი მშვენიერია, მაგრამ ჩემთვის უმთავრესია ქართული ფეხბურთი. აუცილებლად ჩამოვალ, ფედერაციის საპრეზიდენტო არჩევნებში მივიღებ მონაწილეობას და გაძლევთ პირობას, რომ არასოდეს ვიტყვი - აქ სად ჩამომიყვანეთო", - თქვა კობიაშვილმა.
