ისევ განაცხადს მიღმა - საბა კვირკველიას რუსეთის ჩემპიონატში შანსი არ ეძლევა

საქართველოს ეროვნული ნაკრების და ყაზანის "რუბინის" მცველი საბა კვირკველია კვლავ რუსული კლუბის განაცხადს მიღმა დარჩა.

ყაზანელები რუსეთის პრემიერლიგის მე-8 ტურში დღეს "ტომს" მასპინძლობენ, კვირკველია კი განაცხადშიც არაა შეყვანილი. კვირკველიამ, რომელიც სეზონის დაწყებიდან გუნდის განაცხადში ვერ ხვდებოდა, ამ სეზონში პირველი მატჩი 22 სექტემბერს "ჩიტასთან" რუსეთის თასის 1/16-ფინალურ მატჩში ჩაატარა. ამ შეხვედრაში მან მოედანზე 90 წუთი დაყო და თავი საკმაოდ კარგად წარმოაჩინა, ხოლო "რუბინმა" მინიმალური ანგარიშით იმარჯვა და 1/8-ფინალის საგზური მოიპოვა.

რუსეთის ჩემპიონატში კი კვირკველიას ამ სეზონში ჯერ არ უთამაშია.