ქართველმა თავისუფალი სტილით მოჭიდავეებმა მსოფლიო ჩემპიონატი მარცხით დაიწყეს

დღეს, 19 სექტემბერს, ყაზახეთის დედაქალაქ ნურსულთანში სტარტი აიღო მსოფლიო ჩემპიონატმა თავისუფალი სტილით მოჭიდავეებს შორის და სამწუხაროდ, ლადო ხინჩეგაშვილი და ოთარ გოგავა ოქროს მედლისთვის ბრძოლას უკვე გამოეთიშნენ.

ხინჩეგაშვილმა (65) პირველი ბრძოლის მოგება მოახერხა. ლადომ პირველ ეტაპზე კორეელი ჯუნსინ იუნი 4:0 დაამარცხა. მეორე შეხვედრაში უნგრეთის სახელით მოასპარეზე ისმაილ მუსზუკაევთან 1:5 დამარცხდა. მუსზუკაევი ამ ეტაპზე 1/4-ფინალში არის გასული და თუ თურქ სელაჰატინ კილიჯსალაიანის დამარცხებას მოახერხებს, ხინჩეგაშვილი რეპეშაჟში განაგრძობს ბრძოლას ბრინჯაოს მედლისათვის.

ოთარ გოგავა (57) პირველივე ბრძოლაში სომეხ არსენ არუთინიანთან 4:9 დამარცხდა. არუთინიანმა კიდევ 2 შეხვედრის მოგება უნდა შეძლოს, რათა გოგავამ რეპეშაჟში ბრძოლის უფლება მოიპოვოს.