ფესტივალი 2017: დიდი ძიუდოს პატარა რაინდები

უნგრულ დიორში, ევროპის ახალგაზრდობის ზაფხულის ოლიმპიური ფესტივალის ბოლო დღეს სამი მონაწილე გვყავდა, თუმცა სამივე ტიტულოვანი და თავისი წონის ლიდერი. შედეგიც შესაბამისი მივიღეთ - სამივე ნახევარფინალში გავიდა.

იქ ერთი მონაწილე კი გამოგვაკლდა - მძიმეწონოსანი ლევან ჭელიძე დამარცხდა, მაგრამ ამ სამეულიდან ორი ოქრო და ერთი ბრინჯაო მაინც მოვიპოვეთ. ოქროები ბიჭებმა და გოგონებმა თანაბრად გაინაწილეს. ბიჭებში ევროპის წლევანდელმა ფინალისტმა მიხეილ ბექაურმა (90) გაიმარჯვა, გოგონებში კი მძიმეწონოსანმა სოფიო სომხიშვილმა ევროპის ჩემპიონატის დარად, ეს შეჯიბრებაც ძალზე იოლად, ლამის ცალი ხელით და ძალების დაუძაბავად მოიგო. ბრინჯაო ჭელიძემ მოიპოვა.

ამდენად, ჩვენმა ნაკრებმა დიორში 7 მედალი მოიპოვა: 4 ოქრო, 1 ვერცხლი და 2 ბრინჯაო. აქედან გოგონებმა ორი ოქრო ირგუნეს, დანარჩენი კი ბიჭების მონაგარია. ჩემპიონები მარიამ ჭანტურია (63) და გიორგი ჩიხელიძე (66) გახდნენ, ვერცხლი ბექა წიფიანმა (55), ბრინჯაო კი ჭელიძესთან ერთად ვლადიმერ ახალკაცმაც (81) მოიპოვა. არაოფიციალურ გუნდურ ჩათვლაში ჩვენმა ნაკრებმა გაიმარჯვა. კონკრეტულად ბიჭებშიც ჩვენი გუნდია საუკეთესო. გოგონების 4-კაციანმა გუნდმა ხარისხობრივად გაიმეორა ორი წლის წინ თბილისში ანალოგიურ ფესტივალზე ნაჩვენები შედეგი - მაშინაც ორი ოქრო ჰქონდათ, თუმცა თან ერთი ბრინჯაოც იყო.

ევროპის ჩემპიონატზე დამაჯერებელი გამარჯვების შემდეგ სომხიშვილი უნგრეთშიც ფავორიტად ჩავიდა და ეს იმიჯი სრულად გაამართლა, კვლავ "ცალი ხელით" მოიგო ტურნირი. პრაქტიკულად, მას წინააღმდეგობა ვერც ამჯერად გაუწია ვინმემ. ფიზიკურად იმდენად ძლიერია, პრაქტიკულად, ვერავინ ეწინააღმდეგება, თუმცა ძალა არაა მისი ერთადერთი ღირსება - ილეთებსაც ბლომად აკეთებს და დგომში თუ დაბლაჭიდში ერთნაირად საშიშია. ფინალში ჩვენებურმა ლიტველი იუსტინა კმილიაუსკაიტე წუთ-ნახევარში დგომში ზედა ჩავლებიდან გადმოიღო იპონზე, თუმცა მანამდეც იყო მომენტი, როცა ვაზარს იმსახურებდა.

ნახევარფინალში ისევ იოლად დააიპონა ჰოლანდიელი ევროპის პრიზიორი მარიტ კამპსი, ვისაც ევროპაზეც მოუგო, მანამდე კი გერმანელი ლეა შტაინი დაჩაგრა ფიზიკურად: ილეთზე ხომ გადმოიღო, იქვე შებოჭა კიდეც. თითქოს ცოტა ფრანგ კრისტალ გარსიასთან გაუჭირდა, თუმცა ისიც კარგ ილეთზე დააგდო.

ბექაური ერთ თვეში ზედიზედ მეორედ გავიდა ევროპული მასშტაბის შეჯიბრების ფინალში, თუმცა ევროპირველობისგან განსხვავებით, ამჯერად მოიგო. თანაც, როგორ: 14 წამში გამოცერა სლოვაკი დენის ტუპაცი. მას არც სხვა შეხვედრებში გაჭირვებია გამარჯვება და წინა სამ შეხვედრაშიც ბლომად ილეთები გვაჩვენა: ლიტველი დევის ციუციონასი ვაზარ-იპონით გაიარა, კოსოვოელ შპატ ზეკას 3 გდება გაუკეთა, ნახევარფინალში აზერბაიჯანელ ადილ კარიმლის - ორი. ის ევროპის ჩემპიონატზეც კარგად გამოვიდა, თუმცა მაშინ ფინალში უყურადღებობისთვის დაისაჯა, ახლა კი ბოლომდე მოწოდების სიმაღლეზე იყო.

ჭელიძემ ნახევარფინალში უნგრელთა მომავალ ჩემპიონ რიხარდ სიპოჟთან წააგო, ვინც საკმაოდ ძლიერი ფალავანია - ევროპის ჩემპიონატზეც ფინალში გავიდა, თუმცა მაშინ დამარცხდა. ფიზიკურად ძალიან ძლიერი ჩვენებური საკმაოდ დაკვირვებითაც ჭიდაობს, დიორში კი უმეტესი ორთაბრძოლები იპონით მოიგო, მათ შორის - პირველიც ესტონელ მარტინ ზუევთან. ბულგარელ ივაილო დიმიტროვს ვაზარი კი დაუთმო, მაგრამ თვითონაც აუღო რევანში და ბეჭებზეც დააგდო. თურქ აიდინ ომერს, ცოტა არ იყოს და საკალათბურთო ანგარიშით აჯობა - 5 ილეთი ჩაუტარა, ბოლოს კი ყველაფერი იპონით დაასრულა. ფიზიკურად თუ ტექნიკურ-ტაქტიკურად პირწმინდად დაჩაგრა თურქი, როგორც ბრინჯაოსთვის შეხვედრაში - სლოვენიელი ტიმ კელცი (ვაზარ-იპონი). მან ევროპაზეც და ახლაც დაამტკიცა, რომ კარგი მძიმეწონოსანი გვეზრდება.

დიორში ფესტივალის ფარგლებში გუნდური ტურნირიც გაიმართა, ოღონდ მასში ჩვენგან მხოლოდ ბიჭები გამოვიდნენ, გოგონები კი ისედაც მხოლოდ ოთხი მონაწილით იყვნენ. აქ ცოტა უჩვეულო ამბავიც მოხდა - ჩვენები დამარცხდნენ და ბრინჯაოს დასჯერდნენ, რაც იშვიათად ხდება. შეგახსენებთ, რომ მათ ევროპის ჩემპიონატიც რიხით მოიგეს, ახლა კი ნახევარფინალში რუსებთან 1:4 წააგეს, თუმცა ამ შეხვედრის გამო მსაჯებზე საყვედური ნამდვილად გვეთქმის.

მანამდე ჩვენებმა "მშრალად" მოუგეს ლატვიას - 5:0, მესამე ადგილისთვის შეხვედრაში კი იმავე ანგარიშით უკვე ესტონეთს აჯობეს.

(იბეჭდება მცირე ცვლილებით)
ყოველდღიური სპორტული გაზეთი "ლელო"