ქართველ მოჭადრაკეებს წლეულს უმნიშვნელოვანესი შეჯიბრებები ელით: ეს არის ქალთა მსოფლიოს ინდივიდუალური და გუნდური ჩემპიონატები, ვაჟთა მსოფლიოს თასი, რომელსაც თბილისი უმასპინძლებს, ქალ-ვაჟთა ევროპის პირადი და გუნდური ჩემპიონატები და სხვა ტურნირები, რომელთა შესახებ საქართველოს ჭადრაკის ფედერაციის პრეზიდენტი დიდოსტატი გიორგი გიორგაძე გვიამბობს.- მეტად დატვირთული კალენდარი გვაქვს, - გვითხრა მან. - 69 ღონისძიება დავგეგმეთ. სეზონი ვეტერანმა მოჭადრაკეებმა გახსნეს საქართველოს პირველობით. ეს უპრიანიცაა, რადგან შარშან სენიორებში ნონა გაფრინდაშვილი და გიორგი ბაღათუროვი მსოფლიოს ჩემპიონები გახდნენ, ხოლო თამარ ხმიადაშვილმა და ზურაბ სტურუამ მესამე ადგილები დაიკავეს. საქართველოს
დღეს ჭადრაკის სასახლეში მნიშვნელოვანი შეჯიბრება იწყება - მოჭადრაკე ვაჟთა ეროვნული ჩემპიონატის უმაღლეს ლიგაში 10 დიდოსტატი წრიული სისტემით იბრძოლებს მედლებისთვის.
- მათ შორის არ იქნება ბაადურ ჯობავა.
- რამდენიმე წელიწადია, ბაადურს ესპანეთის ერთ-ერთ კლუბთან კონტრაქტი აქვს გაფორმებული, რომელსაც ვერ დაარღვევდა, არადა, ჩვენი და ესპანელთა გუნდური ჩემპიონატები ერთმანეთს დაემთხვა. თუმცა, უნდა გითხრათ, რომ ჯობავას გარეშეც ძლიერი ჩემპიონატი იქნება - ბოლო წლებში მსგავსი სიძლიერის შემადგენლობა არ გვყოლია.
- 10 თებერვლიდან ირანი ნოკაუტსისტემით ქალთა მსოფლიოს ჩემპიონატს უმასპინძლებს.
- მასში მონაწილეობის უფლება საქართველოს რვა წარმომადგენელმა მოიპოვა, რაც უპრეცედენტო შემთხვევაა. მონაწილეთა რაოდენობით მხოლოდ რუსეთს ჩამოვრჩებით.
- მთავარია, როგორ გამოვალთ.
- ჩვენი მანდილოსნები კარგა ხანია, ინტენსიურად ემზადებიან დიდოსტატებთან - დავით ჯოჯუასა და მერაბ გაგუნაშვილთან. ფედერაცია რვავე მონაწილეს მგზავრობასა და თეირანში ცხოვრებას დაუფინანსებს პირველ ეტაპზე, მერე თავად უნდა მიხედონ თავს.
- აქედანვე ცნობილია, რომ მეორე რაუნდში ერთი მონაწილე აუცილებლად გვეყოლება.
- სამწუხაროა, რომ წილისყრამ პირველ წრეში სოფიო გვეტაძე და ნინო ბაციაშვილი დაუპირისპირა ერთმანეთს. რადგანაც ჩემპიონატი ნოკაუტსისტემით ტარდება, დამარცხებული შეჯიბრებას გამოეთიშება. მეორე წრეში გასვლის კარგი შანსი აქვთ ნანა ძაგნიძეს, ლელა ჯავახიშვილსა და ბელა ხოტენაშვილს, რადგან მათი მეტოქეები - ეგვიპტელი ხალედი მონა, ვიეტნამელი ნგუენ თაო ლი და იტალიელი ოლგა ზიმინა უმაღლესი რანგის მოჭადრაკეები არ არიან, თუმცა ეს როდი ნიშნავს, რომ ჩვენებს იოლი გასეირნება ელით - მსოფლიოს ჩემპიონატზე ორი პარტია წყვეტს მატჩის ბედს, სადაც ერთმა უნებლიე შეცდომამ შეიძლება მშრალზე დაგტოვოს.
ნინო ხურციძე ორგზის ევროპის ჩემპიონ ნატალია ჟუკოვას (უკრაინა) შეხვდება, სალომე მელია თურქეთის სახელით მოასპარეზე 2005 წლის ევროპის ჩემპიონ ეკატერინა ატალიკს ეთამაშება. სოფიკო გურამიშვილის მეტოქეა მასპინძელი სარასადათ ხადემალშარიეხი, რომელიც ბოლო დროს საგრძნობლად დაწინაურდა.
ყოველივეს მიუხედავად, მჯერა, რომ ჩვენი მოჭადრაკე ქალები, რომლებსაც წინ გუნდური მსოფლიო ელით, ირანში წარმატებისთვის არაფერს დაიშურებენ.
- ხანტი-მანსიისკში ჩვენებს ტიტულის დაცვა მოუწევთ...
- დიახ, ასეა, ოღონდ მანამდე ქალთა (10-23 აპრილი, რიგა) და ვაჟთა (29 მაისი-10 ივნისი, მინსკი) ევროპის პირადი ჩემპიონატებია. სწორედ ამ შეჯიბრების შემდეგ დავაკომპლექტებთ ქალთა ნაკრებს, რომელიც 16-28 ივნისს ხანტი-მანსიისკში გუნდურ მსოფლიოს ჩემპიონატზე ტიტულის შესანარჩუნებლად იბრძოლებს.
- წლეულს დიდი ტურნირი თბილისსაც ეწვევა...
- შემოდგომით საჭადრაკო ეპიცენტრი საქართველოს დედაქალაქში გადმოინაცვლებს - 1-25 სექტემბერს მოჭადრაკე ვაჟთა მსოფლიოს თასის გათამაშებას ვუმასპინძლებთ. მთავარი პრიზისთვის ნოკაუტსისტემით პლანეტის უძლიერესი 128 დიდოსტატი ითამაშებს.
ქართველებს ორი მონაწილე გვეყოლება. ერთ-ერთია ბაადურ ჯობავა, მეორეს ვინაობას მოგვიანებით გადავწყვეტთ. ეს შეჯიბრება, ფაქტობრივად, 2018 წლის მსოფლიო საჭადრაკო ოლიმპიადის გენერალური რეპეტიცია იქნება. ფიდეს რეგულაციებით, ის ქვეყანა, რომელიც ოლიმპიადის მასპინძლობის უფლებას მოიპოვებს, ვალდებულია, ვაჟთა მსოფლიოს თასის გათამაშებაც ჩაატაროს.
2015 წელს ჩვენ ბაქოში ვესწრებოდით მსგავს შეჯიბრებას. მაშინ მეზობლები შეგვპირდნენ, რომ საორგანიზაციო საკითხების მოგვარებაში დაგვიდგებოდნენ გვერდით და ინვენტარითაც დაგვეხმარებოდნენ. ცხადია, მათს მხარდაჭერას აუცილებლად გამოვიყენებთ - ასეთი მასშტაბის ღონისძიება საქართველოში ჯერ არ ჩატარებულა და სერიოზული მომზადებაა საჭირო. ტურნირის საპრიზო ფონდია მილიონ ექვსასი ათასი დოლარი. 2014 წელს ჭადრაკის განვითარების ოთხწლიან სახელმწიფო პროგრამაში, ცხადია, მსოფლიოს თასის გათამაშებაც იყო გათვალისწინებული, მაგრამ, ლარის კურსის ცვლილებასთან დაკავშირებით, სერიოზული პრობლემების წინაშე აღმოვჩნდით. მის მოგვარებას ფიდესთან თანამშრომლობით ვცდილობთ.
ჭადრაკის საერთაშორისო ფედერაცია გარკვეულ დათმობებზე წავიდა, თასის გათამაშების ბიუჯეტის დანაკლისი სხვა წყაროებით უნდა შევავსოთ. სპორტის სამინისტრო და თბილისის მერია ზრუნავს საამისოდ, მხარდაჭერას გვპირდება ჩვენი გენერალური სპონსორი "სოკარი".
ყველაფერს გავაკეთებთ, რომ საქართველომ ამ ტურნირთან დაკავშირებული ყველა ფინანსური ვალდებულება პირნათლად შეასრულოს.
- წლეულს ქალ-ვაჟთა ევროპის გუნდური ჩემპიონატებიცაა დაგეგმილი.
- ეს შეჯიბრება 25 ოქტომბრიდან 5 ნოემბრის ჩათვლით ჰალკიდიკიში გაიმართება. საინტერესო საერთაშორისო შეჯიბრებები ჩვენც გვექნება - ნონა გაფრინდაშვილისა და მაია ჩიბურდანიძის თასების გათამაშება, ჯერ ბათუმის, მერე ფოთის საჭადრაკო ფესტივალი, სადაც ნანა ალექსანდრიას თასს გავათამაშებთ.
- 2017 თქვენ ბავშვთა ჭადრაკის წლად გამოაცხადეთ...
- დიახ და ყველაფერს გავაკეთებთ მოზარდების ჭადრაკში მასობრივად ჩასაბმელად. 8-20 წლის მოჭადრაკეთა საქართველოს პირველობების გარდა, დამატებით საქართველოს სასკოლო პირველობებსაც გავმართავთ 7, 9, 11 და 13 წლის მოჭადრაკეთა შორის. გამარჯვებულებს მსოფლიოს სასკოლო ჩემპიონატზე გასამგზავრებლად დავაფინანსებთ.
ჩვენი მოზარდები, ტრადიციულად, ითამაშებენ ასაკობრივ ევროპისა და მსოფლიოს პირველობებში, იქ გამგზავრებამდე კი საწვრთნელ შეკრებებს ჩავუტარებთ, რაშიც თბილისის საერთაშორისო საჭადრაკო აკადემია დაგვიდგება გვერდით. წარმატებული მოჭადრაკეების მწვრთნელებისთვის წლეულს პრემიები დავაწესეთ.
როგორც ხედავთ, დაძაბული სეზონი გველის და ყველაფერს გავაკეთებთ, რომ ის უხვი ნადავლით დავასრულოთ.
ყოველდღიური სპორტული გაზეთი "ლელო"
