ბასილაშვილი VS ნადალი - შეხვედრა "როლან გაროსის" რეკორდსმენთან

დღეს, 2 ივნისს, საქართველოს ვაჟ ჩოგბურთელთა ლიდერი ნიკოლოზ ბასილაშვილი საფრანგეთის ღია პირველობაზე, ტურნირის ერთ-ერთ მთავარ ფავორიტს, ესპანელ რაფაელ ნადალს დაუპირისპირდება. "როლან გაროსზე" 1/16-ფინალური შეხვედრა თბილისის დროით 15:00 სთ-ზეა დანიშნული.

ნიკოლოზ ბასილაშვილი, რომელიც მსოფლიო რეიტინგში 68-ე ადგილზეა, რაფაელ ნადალს (4) აქამდე არასდროს დაპირისპირებია.

30 წლის ესპანელმა, რომელსაც "როლან გაროსზე" სარეკორდო - ცხრა გამარჯვება აქვს მოპოვებული (2005-08, 2010-14 წლები), მიმდინარე ტურნირზე პირველი ორი შეხვედრა, ბენუა პერსა და რობინ ჰაასესთან, იოლად მოიგო.

რაც შეეხება 25 წლის ქართველ ჩოგბურთელს, ბასილაშვილმა, რომელიც კარიერაში მესამედ გამოდის "როლან გაროსზე", წელს პირველ წრეში ფრანგი ჟილ სიმონი (32) დაამარცხა, მეორეში კი სერბ ვიქტორ ტროიცკის (38) სძლია.