ტყვიის სროლა. ევროპის ჩემპიონატი: უფინალოდ და ულიცენზიოდ

AutoSharing Option
ბაქოში გრძელდება ევროპის ჩემპიონატი სროლის სახეობებში, რომელშიც ჩვენები წარუმატებლად გამოდიან.

ქართველთაგან ყველაზე უკეთ ოლიმპიური და მსოფლიოს ჩემპიონი, ევროპის სამგზის გამარჯვებული ნინო სალუქვაძე გაისარჯა, ვისაც სპორტული პისტოლეტით სროლაში ფინალამდე 3-იოდე ქულა დააკლდა: 579 ქულით მე-11 ადგილზე გავიდა.

ქალებშიც და ვაჟებშიც საკვალიფიკაციო ეტაპი ორ დღეზე გადანაწილდა. სალუქვაძემ პირველად საკმაოდ კარგად ისროლა: პირველ სერიაში 98 ქულა დააგროვა, მომდევნო ორი 96-ით დაამთავრა და 290 ჯამური ქულით მე-7 ადგილზე იყო. სამწუხაროდ, მეორე დღეს ძალიან სუსტად დაიწყო გამოსვლა და პირველი სერია ჩააგდო - 91.

სავარაუდოდ, ტექნიკური
პრობლემა იყო და ამან გამოიწვია ასეთი შედეგი, თორემ მომდევნო ორში ჩვენმა ლიდერმა მხოლოდ თითო გასროლა ააცილა ათიანს, ეს სერიები 99-99 ქულით დაამთავრა, მაგრამ ფინალურ ოქტეტში შესასვლელად არ ეყო. მან ჯამში 579 ქულა დააგროვა და, როგორც გითხარით, მე-11 ადგილზე გავიდა. ფინალში გამსვლელი ქულა 582 აღმოჩნდა, რისი რესურსიც სალუქვაძეს ნამდვილად ჰქონდა მეოთხე სერიაში...

ევროპის ჩემპიონი რიო დე ჟანეიროს ოლიმპიადის ვიცე-ჩემპიონი ამავე დისტანციაზე, გერმანელი მონიკა კარში გახდა 39 ქულით. ბევრისთვის მოულოდნელად, ვერცხლი პოლონელმა კლაუდია ბრესმა მოიპოვა 33-ით, ბრინჯაოს კი 29-ით ბულგარელთა ორგზის ოლიმპიური ჩემპიონი მარია გროზდევა დაეუფლა.

სამწუხაროდ, ჩვენები სუსტად გამოვიდნენ მსოფლიოს მესამე ახალგაზრდული ოლიმპიადის შესარჩევ შეჯიბრებაში, რომელიც ამავე ტურნირის ფარგლებში ჩატარდა, ოღონდ - პნევმატური პისტოლეტიდან სროლაში. იქ ორი მონაწილე გვყავდა, თუმცა ფინალში ვერ გავიდნენ და უსაგზუროდ დარჩნენ, რადგან ლიცენზიას მხოლოდ საპრიზო სამეულში შესვლა იძლეოდა.

ჩვენი დუეტიდან უფრო უკეთ ახალგაზრდებში ევროპის ვიცე-ჩემპიონმა ნინო ხუციბერიძემ ისროლა - 369 ქულით მე-13 ადგილზე გავიდა. ესეც არაა დიდი შედეგი და ნინოს მეტიც შეუძლია, მაგრამ განსაკუთრებით დასანანი ლიზი კილაძის გამოსვლაა: 364 ქულა და მე-20 ადგილი. არადა, მისი პირადი რეკორდი 386-ია. მართალია, ეს შედეგი ერთხელ აჩვენა და მეტად ვერა, თუმცა 377-378-ის ფარგლებში სტაბილურად იყო დამკვიდრებული, ახლა კი ამ ნიშნულსაც საგრძნობლად ჩამორჩა.

ფედერაციამ რაღაც თუ არ იღონა, გაისადაც დავრჩებით ახალგაზრდული ოლიმპიადის ლიცენზიის გარეშე. გაისად არგენტინაში გასამართავი ამ შეჯიბრების საგზურები მიიღეს რუსმა ნადეჟდა კოლოდამ, ფრანგმა კამილე იედრჟევსკიმ და იტალიელმა ჯულია კამპოსტრინიმ, საკვალიფიკაციო ეტაპის მომგები რუმინელი, ოლიმპიადის თანამოსახელე დარია-ოლიმპია ჰარისტიადე კი ოლიმპიადის საგზურის გარეშე დარჩა.

ევროპის ჩემპიონატში გუშინ მესტენდური ვაჟებიც ჩაებნენ, რომლებმაც ამჯერად მრგვალ სტენდზე ისროლეს, თუმცა საკვალიფიკაციო ეტაპის მხოლოდ ნაწილია ჩატარებული, 3 სერია. ჩვენებურთაგან ჯერჯერობით ყველაზე უკეთ თენგიზ იმნაიშვილი გამოდის, ვინც 64 ქულით 50-ეა: 19, 22 და 23 ქულა. მას ორი ქულით ჩამორჩება ვლადიმერ ნარჩემაშვილი - 55-ე ადგილი (21, 20, 21), დავით ქვათაძე კი 59 ქულით 59-ე ადგილზეა (21, 20, 18).

მესტენდურთა შეჯიბრება დღეს დასრულდება.

(იბეჭდება მცირე ცვლილებით)
ყოველდღიური სპორტული გაზეთი "ლელო"
მკითხველის კომენტარები / 0 /
კომენტარი ჯერ არ გაკეთებულა.

სიახლეები პოპულარული