საქართველოს წყალბურთელ ვაჟთა ნაკრებს რევაზ ჩომახიძე გაწვრთნის

AutoSharing Option
2018 წელს საქართველოს წყალბურთელ ვაჟთა ნაკრებს ორი მნიშვნელოვანი შეჯიბრება ელის - ევროპის თასი და კონტინენტის ჩემპიონატი. ამ ტურნირებისთვის ჩვენს გუნდს სახელოვანი ქართველი წყალბურთელი რევაზ ჩომახიძე გაწვრთნის. ამის შესახებ საწყლოსნო სახეობათა ეროვნული ფედერაციის პრეზიდენტმა დავით რურუამ გვაცნობა.

რევაზ ჩომახიძე ქუთაისში დაიბადა და გაიზარდა, წყალბურთის თამაშიც იქვე დაიწყო გიორგი ქუთათელაძის ხელმძღვანელობით. 1989-93 წლებში თბილისის "დინამოში" გამოდიოდა. იყო "რარი ნანტესის" (იტალია, 1993-97), მოსკოვ
ის "დინამოს" (1997-2000), "პრო რეკოს" (იტალია, 2000-01), "მლადოსტის" (ხორვატია, 2001-04) წევრი, 2004-დან 2009 წლამდე ჩეხოვის (პოდმოსკოვიე) "შტურმი 2002-ში" თამაშობდა.

1997 წელს ის რუსეთის ეროვნულ ნაკრებში მიიწვიეს. მომდევნო წელს "კეთილი ნების თამაშებზე" პირველი ადგილი დაიკავა, 2000 წლის სიდნეისა და 2004 წლის ათენის ოლიმპიადებზე, შესაბამისად, ვერცხლისა და ბრინჯაოს მედლები დაიმსახურა, 2001 წლის მსოფლიოს ჩემპიონატის მესამე პრიზიორმა 2002 წელს მსოფლიოს ლიგის თამაშები და მსოფლიოს თასიც მოიგო. რუსეთის მრავალგზის ჩემპიონმა ევროპის ჩემპიონატებზე ორჯერ მესამე ადგილი დაიკავა.

2001 წელს კონტინენტის საუკეთესო მოთამაშედ აღიარეს. მოსკოვის "დინამოს" შემადგენლობაში ევროპის თასების თასის მფლობელია, ხოლო "შტურმთან" ერთად - "ლენტროფის" გამარჯვებული.

2009 წელს სამშობლოს დაუბრუნდა და იმავე წელს საქართველოს წყალბურთელ ვაჟთა ნაკრებთან ევროპის ჩემპიონატის B ჯგუფში ითამაშა.

"გარემოებამ მაიძულა საზღვარგარეთ წასვლა, თორემ არასდროს მიფიქრია, მთელი ცხოვრება უცხოეთში გამეტარებინა. შანსი მომეცა და სამშობლოში დაბრუნებაზე უარს როგორ ვიტყოდი", - გვითხრა მაშინ რევაზ ჩომახიძემ, რომელიც აქტიურ სპორტთან განშორების შემდეგ 19-წლამდელთა გუნდს ჩაუდგა სათავეში და ევროპის პირველობის ფინალურ ეტაპზე გაიყვანა. წლეულს კი მისმა შეგირდებმა 2000 წელს დაბადებულთა ევროპის ჩემპიონატის გადამწყვეტ რაუნდში ითამაშეს და 16 რჩეულ ნაკრებს შორის მე-10 ადგილი დაიკავეს.

და აი, იგი ახალ ამპლუაში მოგვევლინა.

- საქართველოს ნაკრების მთავარი მწვრთნელობა პატივიცაა და უდიდესი პასუხისმგებლობაც, - გვითხრა რევაზ ჩომახიძემ. - გუნდმა ზედიზედ ორჯერ ევროპის ჩემპიონატის ფინალში ითამაშა. თამასის ქვემოთ დაშვება შეუძლებელია. როცა შენგან ახალ წარმატებას ელიან, ეს მეტ ენთუზიაზმს გმატებს და მუშაობა უფრო საინტერესოა.

მას შემდეგ, რაც 2009 წლიდან ქართული წყალბურთის აღორძინება დაიწყო, რამდენიმე თაობა აღვზარდეთ და ეს ახალი ნაკრების ფორმირებისთვის დიდი პოტენციალია. უახლოეს წლებში ამ ახალგაზრდებისგან ისეთ ნაკრებს შევკრავთ, რომელიც მთელ მსოფლიოში ანგარიშგასაწევი ძალა იქნება.

- წინ ორი მნიშვნელოვანი შეჯიბრება გელით. როგორ მოემზადებით ამ ტურნირებისთვის?
- ნაკრების კანდიდატებს ნოემბრის ბოლოსთვის შევკრებთ და მზადების გეგმასაც გავაცნობთ, თუმც, ის წევრები, რომლებიც საქართველოში დარჩნენ და ეროვნულ ჩემპიონატში ჩაებმებიან, უკვე ინტენსიურად ვარჯიშობენ ახალი სეზონისთვის. 11 ლეგიონერი გვყავს. თან ისეთი ქვეყნების კლუბებში თამაშობენ, სპორტის ამ სახეობაში მოწინავეებად რომ ითვლებიან - იტალია, სერბეთი, საბერძნეთი, მონტენეგრო, სლოვაკეთი.

ერთი სიტყვით, სანაკრებო შეკრებისთვის ამ წყალბურთელებს კარგი ფიზიკური და ტექნიკური მომზადება ექნებათ. ამდენად, მათთან მუშაობა გაადვილდება, თანაც, ეს მომავლის გუნდის მშენებლობაში მნიშვნელოვანი წინგადადგმული ნაბიჯია.

- ევროპის თასი საქართველოს ნაკრებისთვის ახალი გამოწვევაა...
- აქცენტს ამ შეჯიბრებაზე არ გავაკეთებთ - მას ევროპის ჩემპიონატისთვის მოსამზადებლად გამოვიყენებთ. ევროპის თასი თებერვლის შუა რიცხვებში გაიმართება, ჩვენ კი 24 თებერვალს და 3 მარტს კონტინენტის პირველობის პლეი- ოფი გველის.

ფინალურ ეტაპზე მოსახვედრად შინ და სტუმრად, სავარაუდოდ, ბელორუსს, უკრაინას, პოლონეთს ან ისრაელს შევხვდებით. არა მგონია, ამ ბარიერის გადალახვა გაგვიჭირდეს. ივლისში კი ბარსელონა ფინალურ ეტაპს უმასპინძლებს.

ჩვენი მიზანი სწორედ იქ მოხვედრა და დასკვნით რაუნდში ღირსეული გამოსვლაა.

- ნაკრებში მნიშვნელოვან ცვლილებებს გეგმავთ?
- სამომავლოდ, რა თქმა უნდა, მაგრამ ამ შეჯიბრებებისთვის უფრო გამოწრთობილ წყალბურთელებს დავეყრდნობით, რადგან ახალგაზრდებს ჯერ გამოცდილება არ ეყოფათ. თუმცა ნაკრების კარი ღიაა და იქ მოხვედრის შანსი ყველას ექნება სათანადოდ მზადყოფნის შემთხვევაში. საკმაოდ სოლიდური რესურსი გვყავს და მას აუცილებლად გამოვიყენებთ.

- წლების განმავლობაში ჩვენს გუნდში ნატურალიზებული წყალბურთელები თამაშობდნენ...
- და ამით დიდი საქმე გაკეთდა: საქართველოს ნაკრების წინსვლასა და ბიჭების სპორტული დონის ამაღლებაში ნატურალიზებულ სპორტსმენებს მიუძღვით დიდი წვლილი - მათ გვერდით ბიჭებმა ბევრი რამ ისწავლეს, გაიზარდნენ, დაოსტატდნენ და ამის დაუნახაობა სიბეცე იქნებოდა.

წინა წლებთან შედარებით, ქართულ წყალბურთში სიტუაცია რადიკალურად შეიცვალა. უწინ თუ ჩვენ ჩამოგვყავდა უცხოელები, ახლა ქართველ წყალბურთელებს საზღვარგარეთ იწვევენ მოწინავე კლუბები.

ყველაფერი უნდა გავაკეთოთ საიმისოდ, რომ ქართველთა ლეგიონი უცხოეთში გაიზარდოს, რაც მათი დაოსტატების საუკეთესო საშუალება იქნება. სულ მალე უცხოელი სპორტსმენების დახმარება აღარ დაგვჭირდება - საქართველოს ნაკრები მთლიანად ჩვენთან აღზრდილი ბიჭებით დაკომპლექტდება. ქართულ წყალბურთს დიდი მომავალი აქვს.

ყოველდღიური სპორტული გაზეთი "ლელო"
მკითხველის კომენტარები / 1 /
რა განატლებააქ ამას რატო არცერტ გაუნატლებლებმა დაგუპეს ქარტული სპორტი.
bajo
15:35 12-10-2017
3
სიახლეები პოპულარული