ირაკლი აბუსერიძე: ეს სიბინძურე ყველამ ერთად უნდა გამოვააშკარაოთ

ინტერნეტში გავრცელდა ვიდეო, რომელშიც სრკ-ის ყოფილი პრეზიდენტი გიორგი ნიჟარაძე და სრკ-ის პრეზიდენტობის ყოფილი კანდიდატი ირაკლი აბუსერიძე ფიგურირებენ. აუდიოჩანაწერში საუბარია თანხების არამიზნობრივ ხარჯვაზე.

აღნიშნულ ინფორმაციასთან დაკავშირებით, რაგბის კავშირის პრეზიდენტობის ყოფილ კანდიდატ ირაკლი აბუსერიძეს ვესაუბრეთ.

"ის, რაც მოხდა, არის სიბინძურე და ყველამ ერთად უნდა გამოვააშკარაოთ ამ ყველაფრის გამკეთებელი.

აუდიტი ჯანსაღი სამუშაო პროცესია - მმართველობა რომ იცვლება, წინა წლებში გაწეული საქმიანობის შემოწმება უნდა განხორციელდეს. ის ყველგან ხდება და ამაში გასაკვირი არაფერია.

ვის ინტერესებში შედიოდა ამ ჩანაწერის გამოქვეყნება, ეს გიორგი ნიჟარაძეს ჰკითხეთ.

მან ტელეეთერში განაცხადა, "ყოჩაღ ბიჭებსო"... ჰოდა, მოვუწოდებ, გამოვიდეს და დაასახელოს იმ "ბიჭების" სახელები და გვარები, ვინც იგულისხმა. ძალიან მაინტერესებს...

ჩვენ რომ რაიმე მასალა გვქონოდა, მას წინასაარჩევნოდ გამოვიყენებდით. ეს ყველაფერი აბსურდია და ასეთ ბინძურ თამაშს ყოველთვის ვემიჯნებოდი და დღესაც ვემიჯნები", - გვითხრა აბუსერიძემ.