საქართველოს ჩემპიონატის უმაღლესი ლიგის გუნდები საზამთრო არდადეგებზე არიან. გათამაშება 1-ელ მარტს, მე-13 ტურის შეხვედრებით განახლდება. მანამდე კი, სატრანსფერო
ციებ-ცხელებისას, აქამდე ქართულ რაგბიში არნახული ამბები მოხდა.
როგორც ჩანს, სატრანსფერო ფანჯარა ყველაზე უკეთ საქართველოს ჩემპიონატის აუტსაიდერმა "ბათუმმა" გამოიყენა.
შავიზღვისპირელებს, სხვებთან შედარებით, ორი თამაშით ნაკლები აქვთ გამართული და 6 ქულით ბოლო ადგილზე არიან. მდგომარეობის გამოსწორების მიზნით, გუნდის გამოცდილმა მთავარმა მწვრთნელმა ლევან მგელაძემ თვალი უცხოეთს მიაპყრო.
არ გეგონოთ, ბათუმელები საზღვარგარეთ მოთამაშე ქართველებით დაინტერესდნენ. არა, დღეიდან საქართველოს ჩემპიონატში "ბათუმის" ღირსებას ერთი ახალზელანდიელი, ორი სამხრეთაფრიკელი და
ჯო საიგო ახალზელანდიელია, კორნე ნიუვენჰეიზენი და ჟაკ ხოუვსი სამხრეთაფრიკელები არიან, თიმოთი ვენი, ჩარლი რუქი და სემ ჰემპსონი ნისლიანი ალბიონიდან გვეწვივნენ.
ცხადია, ლეგიონერების გამოჩენა საქართველოს ჩემპიონატში უაღრესად დადებითი მოვლენაა. მით უფრო, რომ ისინი ასეთი ძლიერი სარაგბო ქვეყნების წარმომადგენლები არიან.
ვფიქრობთ, მათი "ბათუმში" გამოჩენა რაგბის კიდევ უფრო პოპულარულს გახდის საქართველოს ამ რეგიონში და შორს აღარ იქნება ის დრო, როცა ჩვენი ქვეყნის ეროვნულ გუნდში აჭარული რაგბის რამდენიმე წარმომადგენელი ითამაშებს. სამწუხაროა, მაგრამ ამჟამად ამ კუთხეს "ბორჯღალოსანთა" რიგებში მოთამაშე არ ჰყავს.
ყოველივე ეს გვაფიქრებინებს, რომ ბათუმურ გუნდს მიზნად მარტო უმაღლეს ლიგაში ადგილის შენარჩუნება როდი აქვს დასახული.
კულუარული ინფორმაციით, კლუბის ხელმძღვანელებს უახლოეს ორ ან სამ წელიწადში ევროპის საკლუბო ტურნირებზე ასპარეზობა სურთ.
საამისოდ ბათუმში სწორედ ამ პერიოდისთვის, სავარაუდოდ, სათანადო დონის სარაგბო სტადიონიც იქნება, რომელსაც "ფონდი ქართუ" აშენებს.
გარკვეული ცვლილებებია სხვა გუნდებშიც. "არმიას" რუმინეთიდან დაუბრუნდა მგეზავი მამუკა ნინიძე, რომელიც იქ კონსტანცას "ფარულში" ასპარეზობდა და რუმინეთის ჩემპიონატის ბრინჯაოს მედლის მფლობელი გახდა.
კარგი შევსება აქვს ლიდერთა ჯგუფის კიდევ ერთ წარმომადგენელს, ქუთაისის "აიას". მის რიგებში მოსკოვის "სპარტაკიდან" დაბრუნდნენ ძმები გიორგი და ზურაბ თუთბერიძეები, ასევე მესამეხაზელი გიორგი მინაძე, რომელსაც რუსეთის ნაკრებში თამაშის გამოცდილებაც აქვს.
ქვეყნის მრავალგზის ჩემპიონ თბილისის "ლოკომოტივს" ფრანგული "პერიგოდან" დაუბრუნდა შერკინების ბურჯი ნიკოლოზ მაღალდაძე. მასთან ერთად რკინიგზელებმა მეორეხაზელი გიორგი ტალახაძეც დაიმატეს.
სამი ახალი მოთამაშეა ერთ-ერთ აუტსაიდერ რუსთავის "ხარებში". გუნდს ბოლნისის "ყოჩებიდან" დაუბრუნდა თავისი აღზრდილი ლაშა შუბითიძე. გუნდი ორი ახალგაზრდა მორაგბით - გიორგი კოშაძითა და ბექა გორგაძით გაძლიერდა. ორივე მათგანი 17 წლისაა.
წლევანდელ სეზონს უწინდელზე უკეთესად ატარებს ბოლნისის "ყოჩები", რომელმაც სატრანსფერო ციებ-ცხელებისას რუმინეთიდან დაბრუნებული შერკინების ბურჯი გიორგი ხოსიტაშვილი დაიმატა. ის "ტიმიშოარას" შემადგენლობაში ასპარეზობდა და რუმინეთის ჩემპიონი გახდა. "ყოჩებს" დაუბრუნდა მესამეხაზელი რატი ურუშაძეც, რომელიც წლების განმავლობაში რუსეთში ასპარეზობდა. გასულ სეზონში ის კრასნოიარსკის "ენისეის" შემადგენლობაში რუსეთის ჩემპიონატის ვერცხლის მედლის მფლობელი გახდა.
ჯერჯერობით ცვლილებები არ არის გათამაშების ლიდერის, "ლელოს" შემადგენლობაში. სავარაუდოდ, ასევე ძველი შემადგენლობით იასპარეზებენ "არმაზი", "ჯიქები" და "აკადემია".
ტრანსფერები
არმია
მამუკა ნინიძე
აია
გიორგი თუთბერიძე
ზურაბ თუთბერიძე
გიორგი მინაძე
ლოკომოტივი
ნიკოლოზ მაღალდაძე
გიორგი ტალახაძე
ხარები
ლაშა შუბითიძე
გიორგი კოშაძე
ბექა გორგაძე
ყოჩები
გიორგი ხოსიტაშვილი
რატი ურუშაძე
ბათუმი
თიმოთი ვენი
კორნე ნიუვენჰეიზენი
ჩარლი რუქი
ჯო საიგო
ჟაკ ხოუვსი
სემ ჰემპსონი
გრიგოლ ცირეკიძე
ერეკლე ხელაძე
ყოველდღიური სპორტული გაზეთი "ლელო"
