ოთხი ერი 2017: ვინ შეაჩერებს "ოლ ბლექსს"?

AutoSharing Option
19 აგვისტოს ოთხი ერის (ოფიციალურად, რაგბის ჩემპიონატი) გათამაშება დაიწყება. ავსტრალიის ნაკრები პირველ ტურში სიდნეიში "ოლ ბლექსს" ეთამაშება. სამხრეთ აფრიკის ეროვნული გუნდი კი "ნელსონ მანდელა სთედიუმზე" არგენტინას უმასპინძლებს.

ცხადია, ეს სანაკრებო ტურნირი დიდ ინტერესს იწვევს რაგბის მოყვარულებში მთელს მსოფლიოში.

სამხრეთი აფრიკა
სამხრეთ აფრიკის ნაკრები წლევანდელ ტურნირს მოკრძალებული ოპტიმიზმით შეიძლება შეხვდეს. შარშანდელი კატასტროფული სეზონის შემდეგ, "ბოკემ" წლეულს ოდნავ გააუმჯობესა თამაში და ივნისის ტესტებზე შესუსტებულ საფრანგეთის ნაკრებს სერია 3:0 მოუგო.

ამჯერად, გუნდში მოთამაშეთა უმრავლესობა იოჰანესბურგის "ლაიონზიდანაა", რომელმაც წლეულს ზე რაგბის ფინალში ითამაშა.

შარშან "ბოკემ" ოთხი ერის გათამაშებაში ექვსიდან მხოლოდ ორი მატჩი მოიგო და ისტორიაში პირველად წააგო არგენტინასთან. აფრიკელებმა ნოემბრის ტესტებზე ასევე პირველად ისტორიაში წააგეს იტალიასთან, მერე ინგლისთან და უელსთან. ყველა ამ მატჩში "ბოკე" ისე გამოიყურებოდა, თითქოს, ის არავის უვარჯიშებია. მწვრთნელმა ალისტერ კუციამ გუნდში ადგილი მაინც შეინარჩუნა. თუმცა, დამხმარედ ბრენდან ვენტერი და ფრანკო სმიტი მიუჩინეს.

დღესდღეობით, გუნდში შესანიშნავად გამოყურება ცხრა ნომრისა და მგეზავის დუეტი: როს კრონი და ელტონ იაიკნკისი ერთმანეთს უგებენ. სეზონის აღმოჩენა კი, მეორეხაზელი ფრანკო მოსტერტია.

წესით, გუნდს პრობლემები არ უნდა შეექმნას არგენტინასთან ორივე მატჩში. შინ აუცილებლად უნდა დაამარცხოს ავსტრალია და სტუმრად ეცადოს, წარმატებას მიაღწიოს. სხვა საქმეა "ოლ ბლექსი" - შინ, კეიპთაუნში მას დიდი ბრძოლა უნდა გაუმართოს.

სამხრეთი აფრიკა
15. ენდრიუ კუცია, 14. რაიმონდ რულე, 13. ჯესი კრილი, 12. იან სერფონტეინი, 11. კორალ სკოსენი, 10. ელტონ იაინკისი, 9. როს კრინი 1. ტენდაი მთავარირა, 2. მალკოლმ მარქსი, 3. კონი ოოსტუიზენი, 4. ებენ ეცებესი, 5. ფრანკო მოსტერტი, 6. სიია კოლიზი, 7. ჯაკო კრილი, 8. უზაირ კასიემი
სათ: 16. ბონგი მბონამბი, 17. სტივენ კიტშოფი, 18. ტრევორ ნიაკანე, 19. პიტერ სტეფ დუ ტუა, 20. ჯან ლუკ დუ პრი, 21. ფრასნუა ჰუგარი, 22. კერვინ ბოსხი, 23. დამიენ დე ალენდე

ავსტრალია
ავსტრალიის ნაკრები დიდი მონდომებით ემზადება ტურნირისთვის, მწვრთნელმა მაიკ ჩეიკამ საწვრთნელ შეკრებაზე ყურადღება ფიზიკური კონდიციების ამაღლებასა და ფსიქოლოგიურ მზადყოფნაზე გაამახვილა. მან შთააგონა ნაკრების წევრებს, რომ ახალი ზელანდიის დამარცხება რეალურად ძალუძთ.

"ვოლაბებს" პირველი თამაში სწორედ "ოლ ბლექსთან" აქვს, რომლისთვისაც 2015 წლის შემდეგ არ მოუგია. ავსტრალიის ნაკრებს ივნისის ტესტებზე ცუდი შედეგები ჰქონდა - შინ წააგო შოტლანდიასთან და გაჭირვებით გაუმკლავდა იტალიას. ახლა, "ვოლაბებმა" ყველა ღონე უნდა იხმარონ, რომ ავსტრალიელ ქომაგებს სახეზე ღიმილი დაუბრუნონ.

ოთხი ერის შარშანდელ გათამაშებაში ავსტრალიის ნაკრებმა მეტ-ნაკლებად კარგად ითამაშა და საბოლოოდ მეორე ადგილი დაიკავა. სავარაუდოდ, "ვოლაბები" წლეულსაც იმავე შედეგს გაიმეორებენ.

საინტერესო სანახავი იქნება შერკინების ბურჯ ალან ალაალატოას თამაში. ცხადია, ნებისმიერი მეტოქე უნდა უფრთხოდეს ფულბეკ იზრაელ ფოლაუს, მგეზავ ბერნარ ფოლისა და გუნდის კაპიტან მაიკლ ჰუპერს.

ავსტრალია
15. იზრაელ ფოლაუ, 14. ჰენრი სპეითი, 13. სამუ კერევი, 12. კარტლი ბილი, 11. კურტის რონა, 10. ბერნარ ფოლი, 9. ვილი გენია 1. სკოტ სიო, 2. სტივენ მური, 3. ალან ალაალატოა, 4. რორი არნოლდი, 5. ადამ კოლემანი, 6. ნედ ჰანიგანი, 7. მაიკლ ჰუპერი, 8. შონ მაკმაჰონი
სათ: 16. ტატაფუ პოლოტა-ნაუ, 17. ტომ რობერტსონი, 18. სეკოპე კეპუ, 19. რობ საიმონსი, 20. ლოპეტი ტიმანი, 21. ნიკ ფიპსი, 22. როს ჰოგი, 23. ტევიტა კურიდრანი

ახალი ზელანდია
ახალი ზელანდიის ნაკრები ოთხი ერის უდავო ფავორიტია. მიუხედავად იმისა, რომ ივნისის ტესტების დროს "ბრიტანელ ლომებთან" საბოლოოდ ფრეზე გაიყარნენ, "ოლ ბლექსი" მაინც რჩება დომინანტად.

მას შემდეგ, რაც 2012 წლიდან სამ ერს არგენტინა დაემატა, ახალი ზელანდიის ნაკრებმა ხუთი გათამაშებიდან ოთხი მოიგო და მხოლოდ ერთხელ დათმო ტიტული (2015 - ავსტრალია). შარშან კი, საერთოდ ისტორია გადაწერა: "ოლ ბლექსმა" ყველა თამაში საპრემიო ქულით მოიგო.

ახალზელანდიური რაგბის სიდიადე, ახლახან, ზე რაგბის გათამაშებაში ქრაისჩერჩის "კრუსეიდერზის" ტრიუმფმაც გაამყარა. "ოლ ბლექის" მწვრთნელ სტივ ჰანსენს საკმაოდ დიდი არჩევანი აქვს. იმდენად, რომ შეუძლია ისეთ მოთამაშეზე თქვას უარი, როგორიც გარემარბი ჯულიან სავეაა.

"ოლ ბლექსის" სული და გული ახლა მგეზავი ბოდენ ბარეტია, რომლის ფენომენალური თამაში, განსაკუთრებით ფეხით, უბრალოდ შეუდარებელია. საინტერესო იქნება ასევე დისკვალიფიკაციის შემდეგ გუნდში დაბრუნებული შუამარბის, სონი ბილ უილიამსის ნახვა. ის ჰანსენმა ავტრალიასთან მატჩში ძირითად შემადგენლობაში დააყენა.

ყველა პროგნოზის მიხედვით, ახალი ზელანდიის ნაკრებს პირველობას ვერავინ შეეცილება.

ახალი ზელანდია
15. დამიან მაკკენზი, 14. ბენ სმითი, 13. რაიან კროტი, 12. სონი ბილ უილიამსი, 11. რეიკო იოანე, 10. ბოდენ ბარეტი, 9. აარონ სმითი. 1. ლუის მუდი, 2. კოდი ტეილორი, 3. ოუენ ფრენქსი, 4. ბროდი რეტალიკი, 5. სემ ვაითლოქი, 6. ლიამ სქუირე, 7. კირან რიდი, 8. სემ კენი
სათ: 16. ნათან ჰარისი, 17. ვაით კროკეტი, 18. ოფა ტუუნგაფასი, 19. ლუკ რომანო, 20. არდი სავეა, 21. თი ჯეი პერენარა, 22. ლიმა სოპოაგა, 23. ენტონი ლინერტ-ბრაუნი

არგენტინა
"პუმები" მუდამ მეოთხე ადგილზე არიან. თუმცა, მცირე გამონათებები მათ თამაშში მაინც შეინიშნება. შარშანდელ ტურნირში არგენტინელებმა შინ დაამარცხეს სამხრეთ აფრიკის ნაკრები, დიდი ბრძოლა გაუმართეს ახალ ზელანდიას, მაგრამ საკმაოდ ეფექტური და იმედისმომცემი სტარტის შემდეგ ზედიზედ ოთხჯერ დამარცხდნენ.

ივნისის ტესტებზე "პუმებმა" შინ ორჯერ წააგეს ინგლისის შესუსტებულ გუნდთან და დაამარცხეს საქართველოს ნაკრები.

არგენტინა
შერკინება: მატიას ალემანო, როდრიგო ბაესი, ავგუსტინ კრევი, სანტიაგო გარსია, რამირო ერერა, მარკოს კრემერი, ტომას ლავანინი, ხუან მანუელ ლეგუსამონი, ტომას ლასანა, ბენჟამინ მაკომე, პაბლო მატერა, ხულიან მონტოია, ლუკას ნოგიერა, ხავიერ დესიო, გვიდო პეტი, ენრიკე პიერეტო, ლეონარდო სენატორე, ნოელ ჩაპარაო.
უკანა ხაზი: გონსალო ბარტრანუ, ემილიანო ბოფელი, სანტიაგო კორდერო, ტომას კუბელი, ხერონიმო დე ლა ფუენტე, ბაუტისტა ესკურა, სანტიაგო იგლესიასი, ხუან მარტინ ერნანდესი, მარტინ ლანდახო, მანუელ მონტერო, მატიას მორინი, რამირო მოიანო, მატიას ორლანდო, ნიკოლას სანჩესი, ხოაკიმ ტუკულეტი.

ოთხი ერი 2017,  I ტური
შაბათი. 19 აგვისტო
ავსტრალია-ახ. ზელანდია 14:00
ს. აფრიკა-არგენტინა 19:05


(იბეჭდება მცირე ცვლილებით)
ყოველდღიური სპორტული გაზეთი "ლელო"
კიმ ჩენ ინის გარდა ვერავინ და ვერაფერი :)
0
სიახლეები პოპულარული