რაგბი. ლეგიონი: არჩუაშვილის "სტიაუა" დაუმარცხებელია

რუმინეთის სუპერლიგაში მეშვიდე ტურის ცენტრალური შეხვედრა ლიდერის, ბუქარესტის "სტიაუასა" და სარაგბო კლუბ "ბუქარესტს" შორის გაიმართა. თამაში, მოლოდინისამებრ, დაძაბული, საინტერესო გამოდგა და არმიელთა გუნდმა ერთით მეტი საჯარიმოს წყალობით მოიგო - 15:12.

ამდენად, "სტიაუას" ექვს მატჩში ხუთი მოგება და ერთი ფრე დაუგროვდა.

ლაშა აზალაძემ და ომარ ბალიაშვილმა "ბუქარესტის" რიგებში ძირითად შემადგენლობაში ითამაშეს. მატჩის დასაწყისიდანვე ირჯებოდა "სტიაუასთვის" ქართველი მეორეხაზელი მიხეილ არჩუაშვილიც.

უმნიშვნელოვანესი გამარჯვება მოიპოვა საკუთარ მოედანზე ბიძინა სამხარაძისა და ირაკლი ნატრიაშვილის "ბაია მარემ". ჩვენებურთა ამ გუნდმა შერკინების ქართველი კვაჭის, მერაბ მატკავას ბუქარესტის "დინამო" დაამარცხა - 22:16. სამივე ქართველი მორაგბე ძირითად შემადგენლობაში იყო.

რუმინეთის სუპერლიგა. VII ტური
ტიმიშოარა-იაში 54:20, ბაია მარე-დინამო 22:16, ბუქარესტი-სტიაუა 12:15

სატურნირო მდგომარეობა
1. სტიაუა - 25 ქულა, 2. ბაია მარე - 19, 3. ტიმიშოარა - 18, 4. ბუქარესტი - 17, 5. დინამო - 13, 6. კლუჟი - 4, 7. იაში - 2

(იბეჭდება მცირე ცვლილებით)
ყოველდღიური სპორტული გაზეთი "ლელო"