"ბორჯღალოსნებმა" ბელგიის ნაკრები სარეკორდო ანგარიშით დაამარცხეს [VIDEO]

AutoSharing Option
არსებობის 29-წლიან ისტორიაში ბორჯღალოსნებმა ქუთაისში მესამედ ითამაშეს და მესამე გამარჯვება იზეიმეს. ამჯერად მათი მეტოქე ბელგიის ნაკრები იყო და ის სარეკორდო სხვაობით, 47:0 დაამარცხეს.

ჩვენმა ნაკრებმა საქართველოს სიდიდით მეორე ქალაქში პირველ, ისტორიულ მატჩში 1989 წლის 12 სექტემბერს ზიმბაბვეს 16:3 მოუგო; 16-წლიანი პაუზის შემდეგ, 2005 წლის 12 ივნისს ამ ქალაქში ჩეხეთს უმასპინძლა, 11 ლელო გაუტანა, სარეკორდო სხვაობით (75:10) დაამარცხა, გატანილ-გაშვებული ქულების უკეთესი სხვაობით რუმინეთი უკან მოიტოვა და იმ წელს ერთა თასი პირველ ადგილზე დაასრულა; გავიდა კიდევ 13 წელი და კვლავ ქუთაისში საქართველომ
სარეკორდო სხვაობა უკვე ბელგიელებთან გააუმჯობესა.

წინა ორი თამაშისგან განსხვავებით, ამჯერად შეხვედრა ‘აია არენაზე’ გაიმართა. გულშემატკივარმა ტრიბუნები პირთამდე შეავსო, საოცარი ატმოსფერო შქმნა და ბიჭებმა ბოლომდე მონდომებით ითამაშეს. მაყურებელმა იხილა 7 ლელო, რაც ბელგიასთან ასევე რეკორდული მაჩვენებელია.

ბელგიელებისთვის ეს საქართველოში მეორე სტუმრობა იყო და ქულა ამჯერადაც ვერ აიღეს. წინა ჯერზე, 2014 წელს, ბორჯღალოსნებმა მათ ‘ავჭალაზე’ 6 ლელო გაუტანეს და 35:0 სძლიეს, ახლა კი მიღწევა ერთი ლელოთი და 12 ქულით გააუმჯობესეს.

ამ შეხვედრაში კიდევ რამდენიმე გამორჩეული მომენტი დაფიქსირდა: სასტარტო შემადგენლობაში პირველად ითამაშა 9 ნომერმა გელა აფრასიძემ; შედგა ორი მორაგბის სანაკრებო დებიუტი და ბორჯღალოსნების რაოდენობა 254-მდე გაიზარდა; ანზორ სიჭინავამ, რომელმაც მეორე კეპი მოიხვეჭა პირველი სანაკრებო ლელო გაიტანა.

დებიუტანტები მიხეილ გაჩეჩილაძე და გურამ შენგელია იყვნენ. პირველმა მეორე ტაიმი სრულად ჩაატარა და შეტევები გაამწვავა, ხოლო მეორე ასევე შეცვლაზე 12 წუთი გაისარჯა.

თამაშის დაწყებამდე რაგბის კავშირის პრეზიდენტმა გოჩა სვანიძემ და ვიცე-პრეზიდენტმა გიორგი გორგასლიძემ 2017 წლის საქართველოს საუკეთესო მორაგბეს, ‘მონპელიეს’ ბურჯ მიხეილ ნარიაშვილს მისთვის განკუთვნილი პრიზები გადასცეს.

საქართველოს ჰიმნი ბორჯღალოსნებთან ერთად იმერეთის გუბერნატორმა და ვეტერანმა მორაგბემ, გივი ჭიჭინაძემ შეასრულა.

მატჩის დღეს იმერეთში გამოიდარა და მასპინძლებმაც პირველივე წუთებიდან შეუტიეს. ფაზები კარგად აეწყო და ანგარიშის გახსნის შანსი ბექა წიკლაურს მე-3 წუთზე ჰქონდა, მაგრამ ხელსაყრელი სიტუაციიდან ჯარიმა გაუცუდდა. გავიდა კიდევ 3 წუთი და სტუმრებმა ქართველთა სწრაფ, ხელდახელ შეტევებს ვერაფერი მოუხერხეს. ალექსანდრე თოდუამ და ოთარ გიორგაძემ ბურთი ლელოს ხაზთან მიიტანეს, ბელგიელებმა ფორვარდების რამდენიმე დარტყმას გაუძლეს, მაგრამ მოიქაცნენ და ლევან ჩილაჩავა ვეღარავინ შეაჩერა.

მე-14 წუთზე ბორჯღალოსნებმა დერეფნიდან ორჯერ სცადეს მოლის დაყენება, მეტოქე მძლავრად დაგვიხვდა, თუმცა დაცვის დალაგება ვეღარ მოახერხა, რაც შალვა მამუკაშვილმა შენიშნა, ბურთი რაქიდან სწრაფად აიტაცა და 50-ე სანაკრებო მატჩი მე-5 ლელოთი აღნიშნა.

ტაიმის შუაში პირველხაზელთა ესტაფეტა ზურაბ ჟვანიამ გადაიბარა. ამჯერად ლელო ხელდახელ შეტევას მოყვა, რომელსაც ‘სტად ფრანსეს’ ბურჯი მარცხენა კიდესთან დახვდა, დავით კაჭარავას, რომელმაც ორი მცველი აიყვანა გარჯა დაუფასა და ბურთი მშვიდად დაამიწა.

ტაიმის მიწურულს რეზი ჯინჭველაშვილმა ბურთი ფეხით მარცხენა ფლანგზე ჩაკიდა, სადაც მას წიკლაური დახვდა. წიკლაურმა ოთხივე ლელო გარდასახა და ტაიმი 28:0 დასრულდა.

შესვენებამდე ბელგიელებმა ერთადერთხელ შეგვაწუხეს, 24 ფაზა ააწყეს, მაგრამ გაუვალ დაცვას წააწყდნენ. ამ ეპიზოდს ჯარიმა მოყვა და სტუმრებმა 3 ქულის აღება სცადეს, მაგრამ დამრტყმელმა ვერ იყოჩაღა.

მეორე ტაიმის დასაწყისში რეფერიმ მამუკაშვილი სახიფათო ბოჭვაში დაადანაშაულა და 10 წუთით გაასინბინა. ბორჯღალოსნებმა ძალის გამოყენებაზე თითქმის სრულად თქვეს უარი და მაყურებელს გაშლილი რაგბი შესთავაზეს. ამის გამო პირველი ლელო 55-ე წუთზეღა გავიდა. მშობლიურ ქალაქში თავი გიორგი ფრუიძემ გამოიჩინა და ლამაზი შეტევა ლოგიკურად დაასრულა. ჩვენი ნახევრიდან დაწყებულ იერიშში ფაქტობრივად მთელი უკანა ხაზი მონაწილეობდა, ხაზი თოდუამ გაჭრა, ხოლო დამაგვირგვინებელ ფაზაში წიკლაურმა ჭკვიანურად ითამაშა და პასიც დოულად გასცა.

ფრუიძეს დუბლის შესრულებაც შეეძლო, მაგრამ ჯინჭველაშვილის ფეხით გადაკიდებული ბურთი ვერ შეიმაგრა. შემდეგი ლელო 67-ე წუთზე გავიდა. შეტევა გოირგი ჭყოიძემ დაიწყო, ის რომ შეაჩერეს თამაში უკანახაზელებმა ააჩქარეს, სამი პასით ბურთი მარჯვენა ფლანგამდე სწრაფად ჩაიტანეს და მისი დამჭერი აღარავინ იყო. შეხვედრის მიწურულს გაჩეჩილაძემ თამაში ერთხელაც გაამწვავა, გიორგაძის მძლავრი მიძალების შეჩერებას რამდენიმე კაცი დაჭირდა, ლაშა მალაღურაძემ, რომელმაც მე-80 კეპი მოიხვეჭა, ბურთს ხელი ოსტატურად წაკრა და სიჭინავა ალამთან მარტოობაში დატოვა. წიკლაურმა ბოლო ორი ლელო გარდასახა და თამაში 47:0 დასრულდა.

ბორჯღალოსნები მომდევნო მატჩს 17 თებერვალს, ოფენბახში გამართავენ და მასპინძელ გერმანიას საქართველოს დროით 17:30 საათზე შეხვდებიან.

მომზადებულია rugby.ge-ს მიხედვით
მკითხველის კომენტარები / 0 /
კომენტარი ჯერ არ გაკეთებულა.
ასევე დაგაინტერესებთ
სიახლეები პოპულარული