ფიფა და კორუფცია ბოლო წლებში ერთად ხშირად ხდება განხილვის თემა, რაც ამ ორგანიზაციის ავტორიტეტზე დამღუპველად მოქმედებს. ის, რაც ამ დღეებში მოხდა უკვე მეტისმეტია, საერთაშორისო არასამთავრობო ორგანიზაცია “ტრანსპარანსი ინტერნეშენელმა” (ითარგმნება, როგორც საერთაშორისო გამჭვირვალობა) მსოფლიო ფეხბურთის მმართველ ორგანიზაციასთან თანამშრომლობა შეწყვიტა. მოკლედ მოგახსენებთ, თუ რას წარმოადგენს ეს უკანასკნელი. ის 1993 წელს მსოფლიო ბანკის ყოფილმა დირექტორმა პეტერ აიგენმა დააარსა და მისი უმთავრესი მიზანი მსოფლიოში სწორედ კორუფციის დონის შესწავლაა. ორგანიზაციის სპორტულმა კონსულტანტმა სილვი შენკმა (ყოფილი მორბენალი, ესტაფეტაში 1972 წლის ოლიმპიადის მონაწილე, ყოფილი ველომრბოლი, გერმანიის ველომრბოლის
“მათ ჩვენი რეკომენდაციები საერთოდ არ გაითვალისწინეს. უბრალოდ შოკირებული ვარ. მართლა ვერაფერს ვიგებ. ახლა უფრო მეტად დავინტერესდებით ფიფას ყოველდღიურობით. ნებისმიერ შემთხვევაში მოხარული ვარ, რომ ამ გაუგებრობაში ჩვენ მონაწილეობას აღარ მივიღებთ. ვითხოვეთ, რომ მსოფლიოს 2018 და 2022 წლების ჩემპიონატების მასპინძელი ქვეყნების არჩევნების საკითხების დამოუკიდებლად შესწავლის უფლება მოეცათ, ამაზე დაგვთანხმდნენ, მაგრამ უარი მივიღეთ უფრო ძველის საქმეების გამოძიებაზე. თუკი ასეთი მიდგომა არ შეიცვლება, ფესვი უვნებელი დარჩება და პრობლემას ვერაფერს მოვუხერხებთ.
რაც შეეხება ჰერ პითს, რაკი ანაზღაურებას ის სწორედ ამ ორგანიზაციიდან იღებს, ჩვენ ვერ ვენდობით მისი დამოუკიდებლობის ხარისხს. მან პირველივე პრესკონფერენციაზე განაცხადა, რომ მისთვის პრიორიტეტია, ასწავლოს ადამიანებს, რომ შავი ფული აღარ გააკეთონ მომავალში და არა ის, რომ უკვე კორუმპირებული ადამიანების საქმე სასამართლომდე მივიდეს,” – განაცხადა სილვი შენკმა.
კომენტარი გააკეთა კონტრაქტის გაწყვეტის ერთ-ერთმა მიზეზმა, ფიფას რეფორმების კომიტეტის ხელმძღვანელმა მარკ პითმა. ის ჯერაც იმედოვნებს, რომ ავტორიტეტული ორგანიზაცია მათთან ყოველგვარ კონტაქტს არ გაწყვეტს: “რა თქმა უნდა, ყველას სურს გვერდით ისეთი ადამიანი ჰყავდეს, რომელსაც ბოლომდე ენდობა, მაგრამ ასეთ ადამიანებსაც უნდა გადაუხადო ხელფასი. არ მესმის რა პრობლემას ქმნის ჩემი ანაზღაურება. იმედს ვიტოვებ, რომ “ტრანსპარენსი ინტერნეშენელი” ჩვენ გვერდით მაინც დარჩება, თუნდაც როგორც დამკვირვებელი ან კრიტიკოსი. მიმაჩნია, რომ მისი დახმარება ძალიან გვჭირდება”.
ყოველდღიური სპორტული გაზეთი "ლელო"
