გორტატი დედაქალაქში გაუშვეს

ბოლო დროს NBA-ს არც ისე აქტიური სატრანსფერო ბაზარი, როგორც იქნა, გამოცოცხლდა. კერძოდ, საინტერესო გარიგება განახორციელეს "ვაშინგტონმა" და "ფინიქსმა", რომლის მიხედვითაც, დედაქალაქურ კლუბში აღმოჩნდა პოლონელი ცენტრი მარცინ გორტატი, აგრეთვე, მცველები - შენონ ბრაუნი, კენდალ მარშალი და მალკოლმ ლი. საპირისპირო მიმართულებით გაემგზავრა ემეკა ოკაფორი, რასაც "უიზარდსმა" დაუმატა 2014 წლის დრაფტის პირველ რაუნდში არჩევის უფლება.

"ვაშინგტონისთვის" ეს არის შესანიშნავი გარიგება, რადგან ახლა მის რიგებს შეავსებს კარგი შემტევი ცენტრი, ანუ ჯონ უოლს პიკ-ნ-როლების გათამაშებისთვის კიდევ ერთი პარტნიორი დაემატება. გარდა ამისა, პოლონელის მისვლა საშუალებას მისცემს ნენეს, მძიმე ფორვარდის პოზიციაზე გადაინაცვლოს.

რაც შეეხება "ფინიქსს", ეს გუნდი აგრძელებს გარდაქმნას და უკვე დიდი ხანია უნდოდა გორტატის თავიდან მოშორება. აშკარაა, რომ "სანზს" 2014 წლის დრაფტის დიდი იმედი აქვს. "ვაშინგტონთან" გაცვლის შემდეგ "ფინიქსს" მომავალი დრაფტის პირველ რაუნდში ოთხი (!) კალათბურთელის არჩევის უფლება ექნება.

კობი ბაზარზე გავა
დიდი ალბათობით შეიძლება იმის თქმა, რომ მომავალ ზაფხულს "ლოს ანჯელეს ლეიკერსის" ლიდერი კობი ბრაიანტი თავისუფალი აგენტი გახდება. თუმცა კალიფორნიელ გულშემატკივრებს ჯერჯერობით ნერვიულობის საბაბი არ გააჩნიათ.

კლუბის ბოსის, ჯიმი ბასის თქმით, მას ცოტა ხნის წინ საუბარი ჰქონდა კობისთან. რაზე მოილაპარაკეს მათ? ბრაიანტი მიიღებს თავისუფალი აგენტის სტატუსს და შეინარჩუნებს მას იქამდე, სანამ "ლეიკერსი" შემადგენლობის გაძლიერებაზე იზრუნებს. მოგვიანებით კი, როცა შემადგენლობა დაკომპლექტდება, გუნდი დარჩენილი თანხით თავის ლიდერს გაიფორმებს.

გეგმა ცუდი არ არის, მაგრამ მაინც სარისკოა, რადგან კობის საინტერესო შესაძლებლობა მიეცემა: მომავალ ზაფხულს მას შეუძლია გადახედოს გუნდის შემადგენლობას და გადაწყვიტოს – დარჩეს იქ თუ სხვაგან წავიდეს. ამიტომაც "ლეიკერსს" შემადგენლობის დაკომპლექტებისას გონივრული მოქმედება დასჭირდება.

გუნდისთვის კარგია, რომ მომავალ ზაფხულს ბაზარზე ბევრი საინტერესო თავისუფალი აგენტი გამოჩნდება. გარდა ამისა, კლუბის ბოსებს მანევრებისთვის კარგი შესაძლებლობები აქვთ, რადგან 2014-15 წლების სეზონისთვის გარანტირებული კონტრაქტები მხოლოდ ნეშს, საკრსა და ჰარისს გააჩნიათ.

* * *
თუმცა ამ დღეებში "ლეიკერსის" გულშემატკივრები არა ბრაიანტმა, არამედ სულ სხვა ადამიანმა აანერვიულა. ეს არის ბილ შერმანი, რომელიც 87 წლის ასაკში გარდაიცვალა. ის თავის დროზე "ბოსტონში" თამაშობდა, სახელი კი იმით გაითქვა, რომ 1971 წელს, მწვრთნელის რანგში ჩემპიონის პირველ ტიტულამდე მიიყვანა "ლეიკერსი".

სწორედ იმ სეზონში კალიფორნიულმა კლუბმა დაამყარა რეკორდი, რომელიც დღემდე ძალაშია - ზედიზედ 33 მოგება.

შერმანის დამსახურება სათანადოდ არის დაფასებული. 1976 წელს ის მოთამაშის რანგში შეიყვანეს დიდების დარბაზში, 2004 წელს კი - როგორც მწვრთნელი.

ბოგუტი: ახალი სამი "მეომრებში"
"გოლდენ სტეიტ უორიორზის" ხელმძღვანელობამ ძირითად ცენტრთან, ავსტრალიელ ენდრიუ ბოგუტთან კონტრაქტის გაგრძელების შესახებ გამოაცხადა. კლუბის გენერალურმა მენეჯერმა ბობ მაიერსმა და ავსტრალიელის აგენტმა შეიმუშავეს კონტრაქტი, რომელიც მოედანზე მიღწეული წარმატებების მიხედვით, ფინანსურად ცვალებადი იქნება.

Yahoo! Sports-ი იტყობინება, რომ ენდრიუ ბოგუტი სამი სეზონის განმავლობაში მიიღებს 36 მილიონ დოლარს, თუმცა ეს თანხა სხვადასხვა ბონუსის მეშვეობით, შესაძლოა, 43 მილიონამდე გაიზარდოს.

ამ ახალი ამბის შემდეგ ამერიკული პრესა ლოგიკურ კითხვას სვამს – "მეომრებმა" ავსტრალიელს ზედმეტი ხომ არ გადაუხადეს? ეჭვგარეშეა, რომ ბოგუტი პლანეტის ერთ-ერთი საუკეთესო ცენტრია, მაგრამ ჯანმრთელობასთან დაკავშირებით, სერიოზული პრობლემები აქვს. საკმარისია გავიხსენოთ, რომ ბოლო ორ რეგულარულ სეზონში მან მხოლოდ 44 მატჩი ჩაატარა.

გარდა ამისა, ბოგუტის კონტრაქტი ერთგვარად ჩრდილს აყენებს "უორიორზის" მომავალს, რადგან 2015 წელს გუნდმა ახალი ხელშეკრულება უნდა გაუფორმოს ტომპსონს, ერთი წლის შემდეგ კი ბარნსს. შესაძლოა, ისე მოხდეს, რომ ავსტრალიელის გამო "გოლდენ სტეიტმა" დაკარგოს ამ ორი ნიჭიერი მოთამაშიდან ერთ-ერთი.

ყოველდღიური სპორტული გაზეთი "ლელო"

ასევე იხილეთ:
კობი ბრაიანტი: ჩემი ჭიქა ყოველთვის ცარიელია