საქართველოს კალათბურთელთა ნაკრები მსოფლიოს შესარჩევში მეტოქეებს მაისში გაიგებს

საქართველოს ნაკრები 20 ნოემბერს თავის ისტორიაში პირველად ჩაერთვება მსოფლიოს ჩემპიონატის შესარჩევ ტურნირში.

წინასწარ შეიძლება იმის თქმა, თუ გუნდის ძირითადი ბირთვი შენარჩუნდა, მსოფლიოს 2019 წლის ჩემპიონატზე მოხვედრის შანსიც რეალურია. საქმე ის არის, რომ 2019 წლის მსოფლიოსთვის, რომელიც ჩინეთში გაიმართება, გუნდების რაოდენობა 32-მდე გაიზრდება. ევროპიდან მასში 12 ნაკრები მიიღებს მონაწილეობას.

ახლახან შვეიცარიაში გამართულ ფიბას გენერალურ ასამბლეაზე გადაწყდა, რომ მსოფლიოს ჩემპიონატის შესარჩევი ეტაპის წილისყრა 7 მაისს ჩინეთის ქალაქ გუანჯოუში გაიმართება.

წილისყრის წინ გუნდები ორ დივიზიონად არიან გაყოფილნი. მეორეში ის ნაკრებები თამაშობენ, რომლებმაც ევრობასკეტი 2017-ის საგზური ვერ მოიპოვეს. ისინი ჯგუფებში უკვე განაწილდნენ და წინასწარ საკვალიფიკაციოს აგვისტოში ითამაშებენ. ოთხი ჯგუფის საუკეთესო ორ-ორი ნაკრები შესარჩევი ეტაპის მონაწილე გუნდებს შეუერთდება და 20 ნოემბრიდან ისინიც მსოფლიოს ჩემპიონატისკენ მიმავალ გზას დაადგებიან.

შესარჩევ ეტაპზე, რომელშიც საქართველოს ნაკრები ითამაშებს, 32 გუნდი 8 ოთხგუნდიან ჯგუფად გაიყოფა. მომდევნო ეტაპზე 24 გავა, მხოლოდ ბოლოადგილოსნები ვერ განაგრძობენ გზას. შემდეგ შეიქმნება ექვსგუნდიანი ოთხი ჯგუფი, საიდანაც მსოფლიოს ჩემპიონატის საგზურს სამ-სამი ტოპ-გუნდი, სულ 12 მიიღებს.

დაველოდოთ 7 მაისს და ვნახოთ, ვის გვარგუნებს მეტოქედ გუანჯოუს წილისყრა.

(იბეჭდება მცირე ცვლილებით)
ყოველდღიური სპორტული გაზეთი "ლელო"