ბედის ი-რუნი-ა: სერიდან შრეკამდე და ვიქტორიადან ელისაბედამდე

1970 წლიდან აქამდე ინგლისის ნაკრების ყველა დროის საუკეთესო ბომბარდირი სერ ბობი ჩარლტონი გახლდათ 49 გოლით. 8 სექტემბერს კი უეინ რუნიმ შვეიცარიის ნაკრების კარში 50-ე სანაკრებო ბურთი შეაგდო და ახალი ისტორია დაწერა.

"რასაკვირველია, როდესაც შენი ქვეყნის საუკეთესო ბომბარდირი ხდები, ეს შესანიშნავი შეგრძნებაა. დიდი მომენტი და მოვლენაა ჩემთვის და ჩემი ოჯახისთვის. საოცრად ამაყი ვარ. მართალია, ძალიან კარგად არ გვითამაშია, მაგრამ სასურველ შედეგს მივაღწიეთ და მთლიანობაში, ჩემთვის განსაკუთრებული მატჩი გამოვიდა. ეს საღამო არასოდეს დამავიწყდება" - ამბობდა მატჩის შემდეგ გაღიმებული უეინ რუნი.

"შრეკი" ბობი ჩარლტონს სან მარინოსთან გატანილი პენალტით დაეწია, ხოლო შვეიცარიასთან ასევე თერთმეტმეტრიანით გადაასწრო მას და, რამდენიც არ უნდა ილაპარაკონ, რუნის ჩარლტონამდე და სერობამდე ბევრი უკლიაო, ფაქტია, რუნიმ ინგლისის ნაკრების ისტორია გადაწერა.

"საუცხოო გრძნობაა. ბოლო პერიოდში ცოტა გაღიზიანებული ვიყავი, რადგან ამ გოლებს ველოდი, ახლა კი დამშვიდებული, კმაყოფილი და ბედნიერი ვარ. ახლა უკვე შემიძლია, მხოლოდ ფეხბურთზე ვიფიქრო. თავდამსხმელისთვის გოლები ისედაც ყოველთვის ძალიან მნიშვნელოვანია, მით უმეტეს, მსგავს სიტუაციაში. ეს თავდაჯერებას გმატებს. ცხადია, ცოტა ემოციური ვიყავი. სხვაგვარად, ასეთ გამორჩეულ მომენტსა და სიტუაციაში ვერც იქნება. ეს ჩემი ცხოვრებისა და კარიერის ერთ-ერთი უდიდესი მიღწევა და პერიოდია" - თქვა რუნიმ, რომელიც 24 ოქტომბერს 30 წლის გახდება.

ზოგადად, მისთვის სექტემბერი კარგი თვეა, რადგან 12 წლის წინათ, თავისი პირველი სანაკრებო გოლიც ამ თვეში, კერძოდ კი, 6 სექტემბერს გაიტანა, მაკედონიასთან მოგებულ შეხვედრაში (2:1). მისი დებიუტი კი 2003 წლის 12 თებერვალს შედგა, როდესაც ავსტრალიასთან ამხანაგურ შეხვედრაში ითამაშა. მაშინ უეინი 17 წლისა და 111 დღის გახლდათ და იმ მომენტისთვის ნაკრების ყველაზე ახალგაზრდა ფეხბურთელად იქცა.

სიმბოლურია, რომ მან შვეიცარიასთან შეხვედრაში ჩარლტონს ჩატარებული მატჩებითაც გადაასწრო, რუნის ახლა 107 შეხვედრა აქვს ნაკრების მაისურით ნათამაშები. ამ მხრივ, პირველ ადგილამდეც არ არის ძალიან შორი, რომელზეც პიტერ შილტონია 125 შეხვედრით.

სერ ბობი კი ერთ-ერთი პირველი გახლდათ, ვინც "შრეკს" მიულოცა. მათ კიდევ ერთი დიდი საერთო აქვთ: მართალია, რუნი "ევერტონში" იწყებდა, მაგრამ ორივე "მანჩესტერ იუნაიტედის" ლეგენდაა.

"უკვე მივიღე არაერთი მილოცვა. სერ ბობის მესიჯი ერთ-ერთი პირველი გახლდათ. დარწმუნებული ვარ, ის ძალიან ამაყია. შეიძლება ცოტა გულდაწყვეტილიც, რომ მისი რეკორდი გააუმჯობესეს, მაგრამ ამაყი იმით, რომ ეს "მანჩესტერ იუნაიტედისა" და ინგლისის ნაკრების კაპიტანმა გააკეთა.

ის ნამდვილი გმირი იყო და ნაკრებს მსოფლიოს ჩემპიონატი მოაგებინა. ის ლეგენდაა და ჩემთვის დიდი პატივია, რომ ასეთი ადამიანის შედეგი გავაუმჯობესე. სერ ბობის ყოველ კვირა ვნახულობ და იგი ძალიან მეხმარება. ძალიან მადლიერი ვარ მთელი იმ დახმარებისა და რჩევებისთვის, რომელსაც ათ წელზე უფრო დიდი დროის განმავლობაში ვიღებდი" - განაცხადა რუნიმ.

რა თქმა უნდა, "წითელი ეშმაკების" თავდამსხმელმა, რომელსაც ეს გოლები და რეკორდი მართლაც თავდაჯერებას შემატებს და კლუბს უფრო პროდუქტიულად ათამაშებაშიც დაეხმარება, მილოცვები მინდორზევე მიიღო თანაგუნდელებისგან, უშუალოდ გოლის აღნიშვნისას და მერე გასახდელში.

ჯო ჰარტი და სხვანი "რუნი, რუნის" სკანდირებდნენ, ხოლო როი ჰოჯსონმა მას სპეციალური 50-ნომრიანი მაისურა გადასცა და მერე სიტყვით გამოსვლაც სთხოვა. რუნიმ იქაც მადლობები იხადა და აღნიშნა, რომ უხარია ბევრი ნიჭიერი ახალგაზრდის ნაკრებში გამოჩენა, კერძოდ კი, როს ბარკლი და ჰარი კეინი ახსენა.

ოფიციალურად უეინის დაჯილდოების ცერემონია ინგლისის ნაკრების შემდეგი მატჩისას იგეგმება, როდესაც "ლომები" 9 ოქტომბერს "უემბლიზე" ესტონეთს უმასპინძლებენ. 12-ში კი უკვე ლიტვასთან სტუმრობაა, რასაც წლის დაგვირგვინება მოჰყვება, 17 ნოემბერს ევროპის ჩემპიონატის მასპინძელ საფრანგეთთან ამხანაგური შეხვედრით.

"მწვრთნელმა და ბიჭებმა 50-ნომრიანი მაისურები გადმომცეს, როგორიც ახლა მხოლოდ მე მაქვს და ამითაც ვამაყობ. ბიჭების სიმღერა, ეს მაისურა და წუთები არასოდეს დამავიწყდება, ყველას დიდი მადლობა. ინგლისის ნაკრებში უკვე დიდი ხანია, ვირიცხები და ყოველთვის ვფიქრობდი, რომ თუ სისტემატურად თამაშის საშუალება მექნებოდა, ამ რეკორდს დავამყარებდი. ბოლო წლებში ბევრი გოლი გამქონდა და მიხარია, რომ ბოლოს და ბოლოს მიზანს მივაღწიე" - აღნიშნა რუნიმ.

როი ჰოჯსონი: "ჩვენ წელიწადში საშუალოდ 10 მატჩს ვატარებთ და თუ სხვადასხვა შეჯიბრებაზე უკეთ გამოვალთ, მატჩების რაოდენობაც ცოტათი მოიმატებს. ასე იქნება 2018 წლამდე მაინც. ეს ნიშნავს, რომ წინ 20-30 მატჩი მაინცაა და რუნის კიდევ 10-15 გოლის გატანა შეუძლია.

ვიცი, რომ იგი ძალიან ბედნიერია. ისაუბრა, თუ როგორი ამაყია და რამდენს ნიშნავს ეს მისთვის და მისი ოჯახისთვის, მაგრამ ზუსტად ვიცი ისიც, რომ ის, როგორც ნაკრების ფეხბურთელია გახარებული და მუდამ ფიქრობს იმაზე, როგორ შეიძლება გააუმჯობესოს ჩვენი თამაში და რით დაგვეხმაროს. "როგორ გავაძლიერო გუნდი? როგორ დავემსგავსო მართლაც ბობი ჩარტლონს? ინგლისს ტურნირზე კარგ თამაშსა და მის მოგებაში უნდა დავეხმარო?" - ის ამ კითხვებს უსვამს თავის თავს.

ცხადია, გოლეადორთა სიაში პირველ ადგილზე წინ ვერ წახვალ, მაგრამ რუნი არ ფიქრობს, რომ 50 გოლი გაიტანა და ამით დამთავრდა, ის ლეგენდაა... იგი ისეთივე შემართებით აგრძელებს შრომას, როგორც ამას 19 წლის ასაკში აკეთებდა და როდესაც პროვოკაციაზე წამოვაგე და სიტყვით გამოსვლისკენ ვუბიძგე, მშვენიერი სიტყვა თქვა, მართალია, ცოტა მოკლე, მაგრამ აღვფრთოვანდი იმით, როგორი ამაყია საკუთარი მიღწევით და როგორ არ აპირებს ამაზე გაჩერებას.

არავინ არ აყენებს ჩრდილს ბობი ჩარლტონს, რომელიც უდავოდ ლეგენდა და ერთ-ერთი საუკეთესო მოთამაშეა, ვინც კი ოდესმე მინახავს. მისი სტატუსი ურყევია. რუნი ისტორიაში ასევე გამორჩეული ფეხბურთელია. მიხარია, რომ ამ ორიდან ერთი ისევ თამაშობს და მისი მინდორზე გაშვება შემიძლია".

"რასაკვირველია, ვერ უარვყოფ იმას, რომ გული მწყდება რეკორდის დაკარგვის გამო, თუმცა ძალიან მახარებს, რომ ამ მიღწევის გაუმჯობესება უეინმა შეძლო, ჩემი საყვარელი გუნდის ამჟამინდელმა კაპიტანმა. ჩემი და "მანჩესტერ იუნაიტედის" სახელით ვულოცავ რუნის ამ წარმატებას, მას წინ ბევრი რამ აქვს. ეს, როგორც უეინისთვის, ასევე მისი ოჯახისთვის საამაყო მომენტია" - ამბობს სერ ბობი ჩარლტონი.

"როდესაც დააკვირდები, თუ რამდენი ხანი იყო ეს რეკორდი ძალაში, მიღწევა ორმაგად ფასეული ხდება. ეს საუცხოო შედეგი, ფანტასტიკური რეკორდია, რომელიც დიდი ხანი დარჩება ძალაში. უახლოეს წლებში ვერავის ვხედავ ისეთს, რომელიც რუნის სტატუსსა და რეკორდს ჩამოართმევს" - თქვა ალან შირერმა, რომელსაც ნაკრებში ჩატარებულ 63 შეხვედრაში 30 გოლი აქვს გატანილი.

ინგლისის ნაკრების ყოფილი კაპიტანი ჯონ ტერი: "ვულოცავ რუნის, ის ინგლისის საუკეთესო გოლეადორია. მქონდა პატივი, მასთან ერთად მეთამაშა. ვინც მინახავს, იგი საუკეთესო ინგლისელი ფეხბურთელია, რომელიც ბურთთან ერთად ისეთ რაღაცებს აკეთებდა, რაც იქამდე არ მენახა. გამარჯვებული, ლიდერი, ლეგენდა".

ტრადიციულად იოხუნჯა გარი ლინეკერმა:
"ძალიან ბედნიერი ვარ რუნის გამო. უეინი ბრწყინვალე ფეხბურთელია და მისი რეკორდი ძალიან, ძალიან დიდხანს გასტანს... თუ არც ისე დიდხანს, ჰარი კეინ?".

სხვათა შორის, "დეილი მეილი" მკითხველთა გამოკითხვას აწარმოებს - არის თუ არა რუნი ინგლისის ნაკრების ყველა დროის საუკეთესო ფორვარდი და ჯერჯერობით, ამ კითხვას დადებითად მხოლოდ გამოკითხულთა 34%-მა უპასუხა.

P.S. რუნის ერთადერთ რამეში არ გაუმართლა - ახლა ინგლისში მის რეკორდზე მეტად სხვა რეკორდზე ლაპარაკობენ - 89 წლის ელისაბედ II 9 სექტემბერს ბრიტანეთის ისტორიაში ყველაზე ხანგრძლივი ვადით მმართველი მონარქი გახდა, მან დედოფალ ვიქტორიას "გადაასწრო". დღეისთვის, ელისაბედ II უკვე 23 227 დღეა სამეფო ტახტზეა.

ინგლისის ნაკრების საუკეთესო ბომბარდირები
გოლი (თ.) ფეხბურთელი დრო
50 (107) უეინ რუნი 2003-
49 (106) ბობი ჩარლტონი 1958-70
48 (80) გარი ლინეკერი 1984-92
44 (57) ჯიმი გრივსი 1959-67
40 (89) მაიკლ ოუენი 1998-2008
30 (33) ნეტ ლოფტჰაუსი 1950-58
30 (63) ალან შირერი 1992-2000
30 (76) ტომ ფინი 1946-58
29 (23) ვივიან ვუდვორდი 1903-11
29 (106) ფრენკ ლამპარდი 1999-2014

დოსიე
უეინ მარკ რუნი
დაიბადა: 1985 წ. კროქსტეთში (ლივერპული)
პოზიცია: ფორვარდი
კარიერა: ევერტონი - 2002-04; მანჩესტერ იუნაიტედი - 2004-დან
ტიტულები: პრემიერლიგის ჩემპიონი (5), ლიგის თასი (2), ინგლისის სუპერთასი (3), ჩემპიონთა ლიგა, მსოფლიოს საკლუბო ჩემპიონი

ყოველდღიური სპორტული გაზეთი "ლელო"