თბილისში, "შატილის" სტადიონზე, საქართველოს ჩემპიონატის მეორე ლიგის მატჩში მომხდარ ჩხუბთან დაკავშირებით ერთი პირი დააკავეს. როგორც "ინტერპრესნიუსს" შინაგან საქმეთა სამინისტროში განუცხადეს, აღნიშნული პირი საქართველოს სისხლის სამართლის კოდექსის 239-ე მუხლის 1-ლი და მე-3 მუხლით, ხულიგნობის ბრალდებით არის დაკავებული. გამოძიება გრძელდება სსსკ-ის 118-ე მუხლით, რაც ჯანმრთელობის განზრახ ნაკლებად მძიმე დაზიანებას გულისხმობს.
ინციდენტი 16 მარტს, თბილისის "მარკ სტარისა" და გურჯაანის "ალაზნის" შეხვედრის დროს მოხდა, რომელიც მოედანზე შეჭრილი გულშემატკივრის გამო შეწყდა. მოედანზე დაწყებული არეულობა კი სტადიონის მიმდებარე ტერიტორიაზე გაგრძელდა.
საქართველოს საფეხბურთო ჩემპიონატის მეორე ლიგის მატჩის დროს მომხდარ ინციდენტს ფეხბურთის ფედერაციის სადისციპლინო კომიტეტი შეისწავლის.
