30 ივლისს ევროპალიგის მესამე საკვალიფიკაციო ეტაპის პირველი შეხვედრები გაიმართა, რომლებშიც ქართველი ფეხბურთელებისა და მწვრთნელების გუნდები მონაწილეობდნენ.საბა კვირკველიამ 90 წუთი ითამაშა "რუბინის" შემადგენლობაში, "შტურმთან" მოგებულ საგარეო შეხვედრაში. ყაზანელებმა 3:2 იმარჯვეს.
0:0 დასრულდა დანიური "ბრონდბიუსა" და კვიპროსული "ომონიას" მატჩი. ამ უკანასკნელის რიგებში თავიდან ბოლომდე ითამაშა საქართველოს ნაკრების მცველმა უჩა ლობჟანიძემ.
შოთა არველაძის გაწვრთნილმა "ტრაბზონსფორმა" გასვლაზე მინიმალური ანგარიშით, 0:1 წააგო მაკედონიურ "რაბოტნიჩკისთან". ეს იყო შოთას პირველი მარცხი თურქული კლუბის მთავარი მწვრთნელის პოსტზე.
ზაურ სვანაძის თავკაცობით, ბაქოს "ინტერმა" სტუმრად 0:2 წააგო პრიმერადივიზიონურ "ბილბაოსთან".
"ზორიამ" სტუმრად აჯობა ბელგიურ "შარლერუას" - 2:0. უკრაინული გუნდის ქართველი შემტევი ჯაბა ლიპარტია სათადარიგო იყო.
ჰოლანდიურმა "ვიტესმა" მარცხით დაასრულა ინგლისური ვოიაჟი - 0:3 "საუთჰემპტონთან". არნემელთა შორის სრულად ითამაშა გურამ კაშიამ, ხოლო ვაკო ყაზაიშვილი 67-ე წუთზე შეცვალეს.
ყოველდღიური სპორტული გაზეთი "ლელო"
