[ექსკლუზივი] კახა ცხადაძე: ნაკრებში ხელფასს მაისიდან 25 პროცენტით შევიმცირებ!

საქართველოს ნაკრების მთავარი მწვრთნელი კახა ცხადაძე მაისიდან ხელფასს 25 პროცენტით მოიკლებს. ეს მან ექსკლუზიურად აუწყა "ლელოს". ცხადია, ეროვნული გუნდის თავკაცს ამ გადაწყვეტილების მიზეზებზე კონკრეტული განმარტება ვთხოვეთ.

თავიდან კახა ცხადაძემ მასსა და ფეხბურთის ფედერაციის პრეზიდენტს შორის ურთიერთობაზე ჩამოაგდო სიტყვა...

- პირველ რიგში, თქვენი გაზეთის საშუალებით, მინდა გამოვხატო დიდი პატივისცემა საქართველოს ფეხბურთის ფედერაციის პრეზიდენტ ლევან კობიაშვილის მიმართ. მას ყოველთვის დიდ პატივს ვცემდი და ვცემ. როცა მოვიდა პოსტზე, მაშინვე შევხვდით ერთმანეთს...

თუ ვინმე შეეცდება, ჩემსა და კობიაშვილს შორის წარმოქმნას დაპირისპირება, ეს არ არგებს ქართული ფეხბურთის ინტერესებს...

მინდა, თქვენი გაზეთის საშუალებით ერთი განცხადება გავაკეთო...

- ბრძანეთ...
- ვიცი, რომ დღეს ფეხბურთის ფედერაციაში ფინანსურად მძიმე მდგომარეობაა და ზოგადად, არც ქვეყანაა დალხენილი. მაისამდე მე მაქვს გარკვეული ვალდებულება ფეხბურთის ფედერაციის წინაშე, მაისიდან კი, გადავწყვიტე, ხელფასი 25 პროცენტით შევიმცირო.

- რატომ მაისიდან?
- უკვე გითხარით, მაისამდე ფედერაციასთან გარკვეული ვალდებულება მაქვს.

- ანუ ამ გადაწყვეტილების ერთადერთი მიზეზი არის ფეხბურთის ფედერაციის მძიმე ფინანსური მდგომარეობა?
- დიახ, ეს გადაწყვეტილება მივიღე საერთო სიტუაციიდან გამომდინარე. ეს არის ერთადერთი მიზეზი.

ყოველდღიური სპორტული გაზეთი "ლელო"