ლანჩხუთის "გურიაში" არსებული სიტუაცია მკითხველისთვის ცნობილია - ფეხბურთელებმა სახელფასო დავალიანების გამო გრიგოლეთის ბაზა დატოვეს. ეს მოხდა თბილისის "დინამოსთან" მატჩამდე 2 დღით ადრე. დავალიანების დაფარვამდე ფეხბურთელები მოედანზე გასვლას არ აპირებენ. გავრცელებული ინფორმაციით, გუნდი დატოვა უკრაინელმა მთავარმა მწვრთნელმა რომან პოკორამ, თუმცა მისი თანაშემწე დავით მახარაძე "ლელოსთან" ამას არ ადასტურებს:
"ბატონი რომანი უკრაინაში პრო-ლიცენზიის გასახანგრძლივებლად გაემგზავრა და მალე დაბრუნდება. რაც შეეხებათ ფეხბურთელებს, როგორც იცით, საწვრთნელი პროცესი შეჩერებულია.
კლუბის წარმომადგენლები დღეს (ორშაბათს - ავტ.) თბილისში მიემგზავრებიან და ფეხბურთელებს დაელაპარაკებიან.
თამაში "დინამოსთან", ალბათ, შედგება, ოღონდ
ჩვენ კი ლანჩხუთის მუნიციპალიტეტის გამგებლის მოვალეობის შემსრულებელ ზაზა ურუშაძეს დავუკავშირდით:
- ბატონო ზაზა, რაიმე სიახლე ხომ არ გაქვთ "გურიასთან" დაკავშირებით?
- ყველაფერი კარგად იქნება! გავაკეთეთ საგარანტიო წერილები გამგეობისა და საკრებულოს სახელით, რომელსაც კლუბის წარმომადგენლები ფეხბურთელებს გადასცემენ. "გურიის" დირექტორი ორშაბათს მიემგზავრება თბილისში.
- რას სთავაზობთ ამ წერილებით ფეხბურთელებს?
- დავალიანებას სრულად გავუსტუმრებთ 15 იანვრამდე. უკვე გამოძებნილია თანხა და ამის პრობლემა არ იქნება.
- საერთო ჯამში რა თანხაზეა საუბარი?
- 160 ათას ლარზე, რომელიც დეკემბრის ჩათვლით გაისტუმრებს ფეხბურთელთა სახელფასო დავალიანებას, სოციალური გადასახადის ჩათვლით.
- არცთუ ისე დიდი თანხაა...
- დამერწმუნეთ, რომ ბევრ უმაღლესლიგელს ამაზე მეტი დავალიანება ექნება. ჩვენ პრემიალურს შეძლებისდაგვარად ვაძლევთ ფეხბურთელებს. გვაქვს დარჩენილიც და ვეცდებით, ამ თვეში გავისტუმროთ.
- გავრცელდა ინფორმაცია, თითქოს რომან პოკორა "გურიიდან" მიდის...
- არასწორი ინფორმაციაა. ამ თვეს დავასრულებთ და მერე ცვლილებები, ალბათ, იქნება, თუმცა ბატონ პოკორას წასვლაზე ლაპარაკი არ არის.
ყოველდღიური სპორტული გაზეთი "ლელო"
