სერია A. XXI ტური: სექტემბრის შემდეგ პირველად - "მილანის" ზედიზედ 2 მოგება

AutoSharing Option
სერია A-ს მორიგი ტურის სასტარტო მატჩი ძალიან დაძაბული აღმოჩნდა. ლიდერ "ნაპოლის" ურთულესი ჯახი გადახდა ბერგამოში, სადაც მაურიციო სარის გაწვრთნილი გუნდი ყოჩაღ "ატალანტას" ეწვია. ამ მატჩმა ნათლად გამოაჩინა, რომ როცა საჭიროა, სარის გაწვრთნილი გუნდი ძალიან კარგად ასრულებს პრაგმატული ფეხბურთის მოთხოვნებს.

მართალია, ვერ ვნახეთ დიდი სანახაობა, მაგრამ სამაგიეროდ, ვნახეთ ძალიან დაძაბული 90 წუთი. "ნაპოლიმ" მაინც დამსახურებულად მოიგო. სტუმრებმა მოწინააღმდეგეს მაგრად შეუზღუდეს სივრცეები და ჩაკეტეს "ატალანტას" არგენტინელი ლიდერი ალეხანდრო გომესი, თავად კი ძალიან მწარედ იკბინებოდნენ.

სავსებით მოსალოდნელი იყო, რომ მათი რომელიმე შანსი ადრე
თუ გვიან გოლად გარდაისახებოდა და საბოლოოდ, ეს ასეც მოხდა. მატჩის გმირად იქცა დრის მეტენსი. ამ მოგებამ "ნაპოლი" გაახარა და არცთუ ტყუილად. რაც უნდა მოხდეს, ამ ტურის დასრულების შემდეგაც შეინარჩუნებს პირველ ადგილს და კიდევ ერთი ნაბიჯით მიუახლოვდება სკუდეტოს.

საჩემპიონოდაც თითქოს მომწიფებულია სარის გუნდი. ის აღარ არის მხოლოდ მხიარული ფეხბურთის მიმდევარი, ეს კი ძალიან მნიშვნელოვანი მომენტია, როცა საქმე ეხება ტიტულზე ნადირობას.


შესანიშნავ ფორმაშია "ლაციო", რომელიც ამ დროისთვის საუკეთესო ფეხბურთს თამაშობს იტალიის ჩემპიონატში. სიმონე ინძაგის გაწვრთნილმა "ბიანკოჩელესტემ" ამჯერად "კიევო" გაანადგურა. მასპინძელთა შორის საუკეთესო იყო სერგეი მილიონკოვიჩ-სავიჩი. შემთხვევითი არ არის, რომ 22 წლის სერბის თამაშს ყურადღებით ადევნებენ თვალს ევროპული ფეხბურთის გრანდები. უნდა აღვნიშნოთ ისიც, რომ ერთი გოლი პორტუგალიელმა ვეტერანმა ლუიშ ნანიმაც შეაგდო, განსხვავებით ჩირო იმობილესგან - საკვირველია, რომ ამ გოლების წვიმაში სერია A-ს ბომბარდირი "მშრალად" გავიდა მოედნიდან...

დღის მატჩებიდან როგორ არ უნდა აღვნიშნოთ "სამპდორიას" 34 წლის ფორვარდის, ფაბიო კვალიარელას ჰეთ-თრიკი "ფიორენტინას" კარში. იტალიის ნაკრების ყოფილი შემტევი ბომბარდირთა დავაში მესამე ადგილზე აღზევდა.

"მილანმა" უაღრესად დაძაბულ შეხვედრაში მოუგო "კალიარის". მატჩის მთავარი გმირი შეიქნა კოტდივუარელი ფრენკ კესი, რომელმაც დუბლი მიითვალა. ძალიან უხეშ შეხვედრაში ვიხილეთ ორი წითელი ბარათი. "მილანი" ისეთივე იყო, როგორიც ბევრ სხვა მატჩში, უბრალოდ, ცოტა მეტი ფხა გამოიჩინა შეტევაში.


ტურის ცენტრალურ შეხვედრაში მართლაც რომ ძალიან კარგი საფეხბურთო სანახაობა ვიხილეთ. "ინტერმა" ისევ ვერ მოიგო. ამის მიუხედავად, გულშემატკივარს წამითაც არ მოუწყენია.

თვალსასეირო შეხვედრაში ანგარიში მეკარესთან პირისპირ გასულმა რომაელმა სტეფან ელ შაარავიმ გახსნა შესანიშნავი დარტყმით.

გააფთრებულმა "ინტერმა" მოწინააღმდეგის კარზე არაერთი იერიში მიიტანა, თუმცა გატანა გაუჭირდა. როგორც ასეთ შეხვედრებში ხშირად ხდება, იყო რამდენიმე საეჭვო ეპიზოდი. არ უნდა დაგვავიწყდეს "რომას" მეკარე ალისონის შექება, ვინც მთელ რიგ ეპიზოდებში შეუდარებელი იყო.

ლუჩანო სპალეტის გუნდი წასაგებად ცოდო იყო და არც წააგო. შეხვედრის დასრულებამდე 4 წუთით ადრე, მარსელო ბროზოვიჩის ჩაწოდების შემდეგ მატიას ვესინოს თავურმა მიზანს უწია.


ფაქტები
  • სექტემბრის შემდეგ "მილანმა" პირველად შეძლო სერია A-ს ზედიზედ 2 მატჩის მოგება.
  • ფრენკ კესიმ ("მილანი") დუბლი ბოლოს 2016 წლის 21 აგვისტოს შეასრულა, როცა "ატალანტას" შემადგენლობაში დებიუტი ჰქონდა "ლაციოსთან" საშინაო მატჩში (3:4).
  • "მილანმა" სერია A-ს მიმდინარე გათამაშებაში პირველად გაუშვა გოლი საწყის 15 წუთში.
  • ჯაკომო ბონავენტურამ ("მილანი") სერია A-ში მე-200 მატჩი ჩაატარა.
  • ფაბიო კვალიარელამ სერია A-ს მიმდინარე გათამაშებაში 15 გოლი გაიტანა, რაც მისთვის რეკორდია ერთი სეზონის მასშტაბით. კვალიარელას მაქსიმუმი იყო 13-13 გოლი 2014/15, 2008/09 და 2006/07 წლების სეზონებში.
  • დომენიკო ბერარდიმ ("სასუოლო") სერია A-ს ბოლო 10 ტურში პირველი გოლი გაიტანა.
  • დრის მერტენსმა ("ნაპოლი") გაიტანა გოლი 910-წუთიანი "მშრალი" სერიის შემდეგ.
  • "ატალანტამ" სერია A-ს ბოლო 8 ურთიერთდაპირისპირების შემდეგ პირველად ვერ შეძლო გოლის გატანა "ნაპოლის" კარში.
  • პირველად მიმდინარე სეზონში, "ინტერმა" სერია A-ს მატჩის პირველი ტაიმი მდევრის როლში დაასრულა.
სერია A. XXI ტური
ატალანტა-ნაპოლი 0:1
გოლი: 0:1 მერტენსი (65)
ნაპოლი (4-3-3): რეინა - ჰისაი, კულიბალი, ალბიოლი, მარიო რუი - ალანი, ჟორჟინიო, ზელინსკი (86. როგი) - კალიეხონი (90. მაჯო), მერტენსი, ინსინიე (74. ჰამშიკი)

ბოლონია-ბენევენტო 3:0
გოლები: 1:0 დესტრო (35), 2:0 დე მაიო (73), 3:0 ჯემაილი (88)

ლაციო-კიევო 5:1
გოლები: 1:0 ლუის ალბერტო (23), 1:1 პუჩარელი (25), 2:1 მილინკოვიჩ-სავიჩი (31), 3:1 მილინკოვიჩ-სავიჩი (68), 4:1 ბასტოსი (83), 5:1 ნანი (86)
ლაციო (3-5-1-1): სტრაკოშა - ბასტოსი, დე ვრეი, უოლასი - მარუშიჩი, პაროლო, მილინკოვიჩ-სავიჩი (76. ნანი), ლულიჩი (64. ლუკაკუ) - ლუის ალბერტო - იმობილე (35. ანდერსონი)

სამპდორია-ფიორენტინა 3:1
გოლები: 1:0 კვალიარელა (30), 2:0 კვალიარელა (60), 3:0 კვალიარელა (68), 3:1 სანჩესი (80)

სასუოლო-ტორინო 1:1
გოლები: 0:1 ობი (26), 1:1 ბერარდი (54)

უდინეზე-სპალ 1:1
გოლები: 1:0 სამირი (11), 1:1 ფლოკარი (49)

ვერონა-კროტონე 0:3
გოლები: 0:1 ბარბერისი (3), 0:2 სტოიანი (54), 0:3 რიჩი (67)
გაძევება: ძუკულინი (61. ვერონა)

კალიარი-მილანი 1:2
გოლები: 1:0 ბარელა (8), 1:1 კესი (36-პენ), 1:2 კესი (42)
მილანი (4-3-3): დონარუმა - კალაბრია, ბონუჩი, რომანიოლი, როდრიგესი - კესი (86. ბორინი), ბილია, ბონავენტურა (76. ლოკატელი) - სუსო (82. აბატე), კალინიჩი, როდრიგესი
გაძევება: როდრიგესი (80. მილანი), ბარელა (88. კალიარი)

ინტერი-რომა 1:1
გოლები: 0:1 ელ შაარავი (31), 1:1 ვესინო (86)
ინტერი (4-2-3-1): ჰანდანოვიჩი - კანსელო, შკრინიარი, მირანდა, სანტონი (76. დალბერტი) - ვესინო, გალიარდინი (46. ბროზოვიჩი) - კანდრევა (71. ედერი), ბორხა ვალერო, პერიშიჩი - იკარდი.
რომა (4-3-3): ალისონი - ფლორენცი, მანოლასი, ფასიო, კოლაროვი - პელეგრინი, სტროოტმანი, ნაინგოლანი - ჟერსონი (70. პერესი), ელ შაარავი (75. ჟეზუში), ჯეკო (84. შიკი).

ორშაბათი, 22 იანვარი
იუვენტუსი-ჯენოა 23:45

ბომბარდირები: 20 - ჩირო იმობილე (ლაციო); 18 - მაურო იკარდი (ინტერი); 15 - ფაბიო კვალიარელა (სამპდორია); 14 - პაულო დიბალა (იუვენტუსი).

გამოტოვებული მატჩები
24 იანვარი: ლაციო-უდინეზე, სამპდორია-რომა
მომდევნო ტური
27 იანვარი: სასუოლო-ატალანტა, კიევო-იუვენტუსი
28 იანვარი: სპალ-ინტერი, კროტონე-კალიარი, ფიორენტინა-ვერონა, ჯენოა-უდინეზე, ნაპოლი-ბოლონია, ტორინო-ბენევენტო, მილანი-ლაციო, რომა-სამპდორია.

(იბეჭდება მცირე ცვლილებით)
ყოველდღიური სპორტული გაზეთი "ლელო"
მკითხველის კომენტარები / 0 /
კომენტარი ჯერ არ გაკეთებულა.

სიახლეები პოპულარული