თემურ შალამბერიძე: ყველას არ შეუძლია, ფული გადაიხადოს და ფეხბურთზე იაროს

AutoSharing Option
თემურ შალამბერიძე "საბურთალოს" აკადემიის დირექტორი და ამავე კლუბის 19-წლამდელთა გუნდის მწვრთნელია.

მას ასევე ქობულეთის "შუქურაში" და გორის "დილაშიც" უმუშავია, სადაც გუნდს საქართველოს თასი მოაპოვებინა და ევროპის ლიგაზე კი ორი საკვალიფიკაციო ეტაპი გაიარა.

Sportall.ge შალამბერიძეს დაუკავშირდა და საინტერესო საკითხებზე ესაუბრა.

- თქვენ "საბურთალოს" აკადემიის დირექტორის პოსტი გიკავიათ და ასევე, ამავე კლუბის 19-წლამდელთა გუნდის მთავარი მწვრთნელი ხართ. როგორც ცნობილია, "საბურთალოს" აკადემიაში ფეხბურთელის აღსაზრდელად კარგი პირობებია...
- "საბურთალოს" აკადემია საქართველოში ერთ-ერთი გამორჩეულია. შემიძლია ვთქვა, რომ უკვე ბრენდი არის და ამიტომ ყველას სურს აქ
გადმოსვლა.

იმიტომ, რომ კარგი საწვრთნელი პროცესია, კარგი პირობებია და ყველას უნდა კარგ პირობებში ვარჯიში, მით უმეტეს, საქართველოში.

ჩვენ გვაქვს ჩვენი მიმართულება და ამ მიმართულებით ვმუშაობთ. "საბურთალოს", როგორც სათამაშო, ისე სავარჯიშო, თავისი სტილი გააჩნია.

- "საბურთალო" სატრანსფერო ფანჯარაზე საკმაოდ აქტიურობს. რა მიზანი ექნება გუნდს ეროვნულ ლიგაში?
- კლუბმა დაიმატა "ლოკომოტივიდან" გიორგი დიასამიძე და ბექა ქურდაძე, "ჩიხურადან" - თორნიკე გორგიაშვილი და დიმიტრი ტატანაშვილი.

გონსო ვაგნერი ბელგიაში იყო განათხოვრებით და ისევ ჩვენთან ბრუნდება. იგი ერთ-ერთი საუკეთესო ლეგიონერია.

"საბურთალო" ძალიან ძლიერი გუნდი იქნება, სამეულისთვის ბრძოლა მინიმუმ და ჩემპიონობისთვის ბრძოლაც თავისუფლად შეგვიძლია.

- როდესაც ახალგაზრდა ქართველი ფეხბურთელი სათამაშოდ უცხოეთში მიდის, ნაკლები სათამაშო დრო ეძლევა... როგორ ფიქრობთ, რისი ბრალია ეს ყველაფერი?
- სულ იმაზეა ლაპარაკი, რომ 17-18 წლის ბიჭები სად იკარგებიან... ეგ ზუსტად იმის ბრალია, რომ ეს 17-18 წლის ფეხბურთელი, რომ მიაღწევს მაგ ასაკს, აუცილებლად ვიღაცასთან ერთად უნდა ივარჯიშოს, ან ვინმე მაღალკვალიფიციურ ფეხბურთელთან ერთად ითამაშოს.

ამიტომ, სასურველი იქნება, თუ ქართულ კლუბებში ევროპული დონის 3-4 ფეხბურთელი ჩამოვა და ამ ახალგაზრდებს მათთან ერთად მოუწევთ გაზრდა, ვარჯიშიც და თამაშიც.

ახალგაზრდას განვითარების პოტენციალი გააჩნია, მაგრამ ეს პოტენციალი ვერ შეივსება და 17-18 წლის ახალგაზრდა საქართველოს ფეხბურთის დონეს ვერ აწევს. ამიტომ საჭიროა, მან ცოტა მაღალი კლასის ფეხბურთელთან ერთად ივარჯიშოს და ითამაშოს.

- თქვენ ბავშვთა ფეხბურთში ჩახედული ხართ... რა შეგიძლიათ გვითხრათ, რა პრობლემებია ბავშვთა ფეხბურთში?
- პრობლემები ძალიან ბევრია... პირველი, ყველას არ შეუძლია, თანხა გადაიხადოს და ფეხბურთზე იაროს.

"საბურთალოში" ბევრი შეღავათი გვაქვს, აკადემიაში მაგალითად, ბავშვები ფულს არ იხდიან.

არის სკოლები, სადაც ბავშვები დადიან, ფულს იხდიან და ვარჯიშობენ...

ზოგს უჭირს ფულის გადახდა. ჩვენ სოციალურად დაუცველებზეც დიდი შეღავათი გვაქვს, მათ უფასოდ ვავარჯიშებთ.

ბავშვის სათამაშო პრაქტიკა არის ყველაზე მთავარი. რაც უფრო მეტს თამაშობს, მით უფრო იზრდება, როგორც ფეხბურთელი.

ის ფეხბურთელი, რომელიც ჩვენ რეგიონიდან მოგვყავს ან "დინამოს", ან "ლოკომოტივს", თადარიგში ზის და შეიძლება 5-10 წუთის თამაში მოუწიოს. ამიტომ უკეთესია, სხვა გუნდში იყოს. მაგალითად, რაიონში რომ იყოს საფეხბურთო სკოლები, იქ უფრო მეტი სათამაშო დრო მიეცემოდა და ბავშვიც უფრო კარგად გაიზრდებოდა.

- თქვენ გორის "დილაში" მუშაობდით მთავარ მწვრთნელად, სადაც თქვენი ასისტენტი გია ცეცაძე იყო. იგი ახლა 21-წლამდელთა ნაკრების დამრიგებელია. რა შეგიძლიათ გვითხრათ მის შესახებ, როგორ ფიქრობთ, რამდენად გამოუვა მას ახალგაზრდებთან მუშაობა?
- გიამ, როგორც სანაკრებო, ისე საკლუბო დონეზე, დაამტკიცა, რომ მაღალი კვალიფიკაციის მწვრთნელია და შეუძლია გუნდი დააყენოს და ათამაშოს კარგი, შემტევი ფეხბურთი.

ამიტომ ორი აზრი არ არსებობს, მე მივესალმები მის დანიშვნას ახალგაზრდულ ნაკრებში და იმედი მაქვს, რომ იგი გაართმევს თავს დაკისრებულ მოვალეობას.
მკითხველის კომენტარები / 6 /
ნიკოლოზ, მეგობარო, შენც შეგიძლია აღმოაჩინო ტალანტები, არავინ გზღუდავს იმაში რომ ავარჯიშო ბავშვები, უამრავი მოედანია სადაც შეგიძლია დაიბარო და მიხედო ბავშვებს. თუ ფიქრობ რომ სამწვრთნელო განათლება არ გიწყობს ხელს, შგიძლია მიმართო ფედერაციას და გაგატარებენ დამწყებ კურსს, შეგასწავლიან ფეხბურთის საწყისებს. მადლიან საქმეს იზამ. ამ გუნდშიც და დინამოშიც რამოდენიმე ათეული ბავშვი გათავისუფლებულია გადასახადისაგან და ახალა ყველას ამ გუნდებში უნდოდეს ვარჯიში და მიიღო უფასოდ არ გამოდის, იმიომ ომ ფიზიკურად ვერ დაიტევ, ხოლო ვინც ძალიან ნიჭიერია დამიჯერე შერჩვის დროს ტოვებენ. მითუმეტეს ამათ გარდა თბილისში ბევრი ადგილია სადაც შეიძლება მიიყვანონ ბავშვი და უფრო დაბალ ფასად ან საერთოდ უფასოდ ივარჯიშონ, მაგალითად 35-ე სკოლა, ლოკომოტივი, ოლიმპი, ნორჩი დინამო და ა.შ. წარმატებებს გისურვებ, მიხედე ბავშვებს ოღონდ იცოდე ერთი თეთრი არ გამოართვა რომელიმეს.
ბათუმურა
10:31 12-01-2018
0
ბათუმურავ!თუ ფეხბურთის სწავლება ფასიანი იქნება,თქვენ ვერასდროს ვერ მოძებნით ტალანტს,ტალანტები ფულის გადახდით არ იბადებიან,ისინი ამ ფულს ვერ იხდიან და იკარგებიან,ქრებიან-შედეგი?შედეგი ის არის,რომ მსოფლიოში გვაქვს ყველაზე სამარცხვინო ჩემპიონატი საშუალო და უფრო დაბალი დონის ფეხბურთელებით და ჩვენ,რომ ტალანტი გვგონია,მიდიან ევროპის სუსტ გუნდებში და იქაც ადგილს ვერ იმკვიდრებე და მერე ხელმოცარულნი და ცხვირჩამოშვებულნი უკან ბრუნდებიან,ან საერთოდ ანებებენ თავს ფეხბურთს,თქვენ მომავლ ფეხბურთელს ხელებში კი არ უნდა მიჩერებოდეთ,ფეხებში უნდა უყურებდეთ,რომ ტალანტი არ დაგეკარგოთ და ის ფული რომელიც ასე გწყურიათ თავისით მოვა,ოღონდ დიდი შრომის შემდეგ,მომავალი ტალანტი ბავშვები დღევანდელ კვერცხს არ უნდა ვამჯობინოთ.
ნიკოლოზი
12:02 11-01-2018
0
სიახლეები პოპულარული