"კვარაცხელია გვემუქრება - ჩვენმა უკეთესმა გუნდმა უნდა გაიმარჯვოს" - საბერძნეთის ნაკრები თბილისშია, ბერძნული მედია კი ოპტიმისტობს

26 მარტს საქართველოს ნაკრები საბერძნეთს ევროპის ჩემპიონატზე გასასვლელი პლეი-ოფის ფინალში უმასპინძლებს. ბერძნული მედია მომავალ დაპირისპირებას ფართოდ აშუქებს.

მეტოქე გუნდი გუშინ საღამოს ჩამოვიდა თბილისში და მისი ფეხბურთელები საკმაოდ მშვიდად და ხალისიანად არიან. ყოველ შემთხვევაში, გარეგნულად ასე მოჩანს. მათი გამოცემები კი საქართველოში აჟიოტაჟზე წერენ და სტადიონზე ანშლაგზე ამახვილებენ ყურადღებას. რატომღაც განსაკუთრებით ხვიჩა კვარაცხელიას nakrebi.ge-სთან დამაჯერებელმა საუბარმა გააღიზიანა. sportal.gr მიიჩნევს, რომ ქართველი ელადელებს ემუქრება.



"ათი წელი დიდ ტურნირებზე მონაწილეობის გარეშე ხანგრძლივი პერიოდია, რომლის დასასრული ახლოვდება! ცხადია, ყაზახეთისგან მარცხს არ ველოდით, მაგრამ წარმოუდგენელი იყო, თუ ასეთი ანგარიშით დავამარცხებდით. მატჩის ასეთი საოცნებო სცენარით განვითარება მოულოდნელი გახლდათ, როდესაც პოიეტმა თავის შეგირდებს ქართველებთან დაპირისპირების წინ, ფაქტობრივად, დასვენების საშუალება მისცა.



მოგვენატრა დიდ ტურნირზე ასპარეზობა და მონაწილეობის მიღების დროც დადგა! მთელ ჩვენს პოზიტიურ ენერგიას და განწყობას პოიეტის ბიჭებს გადავცემთ, რათა სამშაბათს თბილისიდან გამარჯვებულები დაბრუნდნენ. ისინი ამას იმსახურებენ, ისინი ვალში არიან პირველ რიგში საკუთარი თავის წინაშე. ჩვენ ეს ყველას გვსურს.