U21. 1/4-ფინალის წინ - სვანაძე: "ძალები აღვიდგინეთ, შეცდომის დაშვების უფლება აღარ გვაქვს"

ევროპის 21-წლამდელთა ჩემპიონატის მეოთხედფინალის წინ, სადაც საქართველოს ნაკრები ისრაელს დაუპირისპირდება, ჩვენი გუნდის მთავარმა მწვრთნელმა რამაზ სვანაძემ და ფეხბურთელმა გიორგი მოისწრაფიშვილმა პრესკონფერენცია გამართეს.

რამაზ სვანაძე: "რთულ თამაშს ველოდებით, ევროპის ჩემპიონატის მეოთხედფინალია და სხვაგვარად უბრალოდ წარმოუდგენელია. პატივს ვცემთ ისრაელის ნაკრებს, მათი ასაკობრივი ნაკრებების პროგრესი განსაკუთრებით აღსანიშნავია. ვეცდებით, გულშემატკივრები გავახაროთ და შევინარჩუნოთ ის სულისკვეთება, რაც წინა მატჩებში გვქონდა.

მეოთხედფინალში შემთხვევით ვერავინ ხვდება. ჩვენი მეტოქის გუნდურობა აღსანიშნავია. მათთან ამხანაგურ მატჩში დავმარცხდით, თუმცა ახლა აბსოლუტურად განსხვავებული მატჩი იქნება. შეცდომების დაშვების უფლება აღარ გვაქვს. ვეცდებით, საკუთარი კოზირები გამოვიყენოთ.

უმრავლესობა ამ რეჟიმში თამაშს მიუჩვეველია. აღსადგენად დრო გვქონდა და მზად ვართ, ახლა სრულად დავიხარჯოთ.

განწყობა პოზიტიურია. სხვანაირად არც შეიძლება იყოს. ტაქტიკური ცვლილებები ნებისმიერ თამაშშია, რასაც მეტოქიდან გამომდინარე ვახორციელებთ.

ყველა მატჩში გვიწევს დამტკიცება, რომ აქ ყოფნას ვიმსახურებთ. დიდი ხანია, ჩვენი ფეხბურთის გარშემო ასეთი ერთიანობა არ მინახავს. ეს გუნდი პატივისცემას ერთიანობის გამო იმსახურებს. ჩვენი გუნდი მენტალურად ძლიერია.

გასათვალისწინებელია, რა ეპიზოდებში ვიღებთ ყვითელ ბარათებს. გვიწევდა ხშირად დაჯარიმება. ეს ფეხბურთის ნაწილია და კატასტროფა არაა.

მოისწრაფიშვილის აქ ყოფნა არ ნიშნავს, რომ ის აუცილებლად სასტარტოში იქნება. შემადგენლობას სხვადასხვა კომპონენტის მიხედვით ვარჩევთ. ყველასთვის მთავარია ნაკრების წარმატება, მათ შორის, მათთვისაც, ვისაც ჯერ ერთი წუთითაც არ უთამაშია".

გიორგი მოისწრაფიშვილი: "ისრაელს ძლიერი გუნდი ჰყავს, თუმცა გამარჯვებისა და გულშემატკივრების გახარებისთვის ვიბრძოლებთ.

დასვენებისთვის მეტი დრო გვქონდა და ეს კარგად გამოვიყენეთ. ვფიქრობ, ბურთით უფრო მეტად ჩვენ ვიქნებით და მეტ შეტევას განვახორციელებთ.

ბიჭები კარგ განწყობაზე ვართ და ვემზადებით. სავსე "დინამო არენა" ჩვენთვის დიდი ძალაა".

U21. საქართველო VS ისრაელი - რომელი უფრო მეტს გარისკავს ნახევარფინალისა და ოლიმპიადისთვის...