საწყლოსნო კომპლექს "ოლიმპიკის" აუზში სტარტი აიღო 1996-97 წლებში დაბადებულ წყალბურთელთა 2013 წლის ევროპის პირველობის შესარჩევმა ტურნირმა. ფინალური ეტაპის 2 საგზურისათვის პაექრობაში ხუთი გუნდი ჩაება. 9 მაისს ორი შეხვედრა გაიმართა.
საქართველო - მოლდოვა 16:6
5:1, 3:3, 4:1, 4:1
საქართველო: ჭოლოკავა, ჩიკვაიძე (2), რევია, იმნაიშვილი (2), გაბადაძე, ბითაძე (8), ჯახაია (3), ზაქარეიშვილი, მოსაშვილი, მაგრაქველიძე, ჯანჯღავა, თუხარელი (1), რაზმაძე. მწვრთნელები - პოპოვიჩი და ბაქრაძე.
მოლდოვა: სტარსი, მუტუ (2), პასკალიუსი, კალინოვიჩი, ფლორეა, დემბიჩი, კლემაკი (2), პრიშეპოვი, ვერტესი (1), სუსინოვი, ერმოლაევი, კობილეანუ (1), როგუჩი. მწვრთნელები
ამ პაექრობაში ფავორიტად მასპინძლებს მიიჩნევდნენ. იოვან პოპოვიჩის შეგირდებმაც პირველი წამებიდანვე აქტიურად შეუტიეს მეტოქეს, მაგრამ სტუმრებმა ორი წუთის განმავლობაში კარი მშრალად შეინახეს.
მოლდოველთა რბევა მე-3 წუთზე ჯახაიამ დაიწყო. მას აქტიურად აუბა მხარი ცენტრალურმა თავდამსხმელმა ბითაძემ, რომელმაც ზედიზედ ორი ულამაზესი გოლი გაიტანა.
საერთოდაც, ბითაძემ 9 მაისს შესანიშნავად ითამაშა და მოლდოველებს რვაჯერ (!) გამოატანინა ბურთი ბადიდან. მისმა თანაგუნდელებმაც იყოჩაღეს და საქართველოს ნაკრებმა პირველსავე ტურში დამაჯერებელი გამარჯვება მოიპოვა - 16:6.
გერმანია - ჰოლანდია 11:4
2:0, 2:1, 5:1, 2:2
გერმანია: ტომი, ჰაბერი, რეინჰართი, სტრაბი (2), შმელენკამპი (1), ბორეკი (1), მუგი (1), კუპერსი (5), ბოფენი (1), მიულერი, ზოსკერი, გორბერი, ნობლერი. მწვრთნელი ვიკენბერნცი.
ჰოლანდია: ვან როსამი, ვერმეულენი, დენტრო, შმელტი, ვან ზანტენი, კრისმანი, ზიროსი, ჯანსენი, ჰაასნუკი, ტე რიელე (2), ვან დენ ბურგი (2), ბადინგი, ჰენდრიკსი. მწვრთნელი ბოროსი.
ალემანებიცა და ნიდერლანდელებიც ფინალურ ეტაპზე გასვლის რეალურ კანდიდატებად მიაჩნიათ. ამიტომაც მათ სასტარტო დაპირისპირებას დიდი მნიშვნელობა ჰქონდა.
მატჩი დაძაბულად წარიმართა. პირველი ხუთი წუთის განმავლობაში წარმატებას ვერც ერთმა მხარემ ვერ მიაღწია.
მხოლოდ მე-6 წუთზე მოახერხა გერმანელმა კუპერსმა თავის გამოჩენა. ტიტების ქვეყნის წარმომადგენლები ოთხივე პერიოდის განმავლობაში მედგარ წინააღმდეგობას უწევდნენ მეტოქეს, მაგრამ აუზი მაინც დამარცხებულებმა დატოვეს - 4:11.
10 მაისს ტურნირზე ოთხი მატჩი გაიმართება.
დილით ითამაშებენ: ჰოლანდია - სლოვაკეთი (10.00), გერმანია - მოლდოვა (11.30). საღამოს: საქართველო - სლოვაკეთი (18.30), ჰოლანდია - მოლდოვა (20.00).
ყოველდღიური სპორტული გაზეთი "ლელო"
