პრემიერი: საქართველოში უპრეცედენტო სპორტული ინფრასტრუქტურა აშენდება

დღეს მთავრობის სხდომაზე საქართველოს პრემიერ-მინისტრმა გიორგი კვირიკაშვილმა განაცხადა, რომ საქართველოში უპრეცედენტო მასშტაბის სპორტული ინფრასტრუქტურა აშენდება.

"ჩვენი ქვეყნისთვის უპრეცედენტო მასშტაბის ინფრასტრუქტურის მშენებლობა იწყება. 65 მილიონ დოლარზე მეტი სლოვაკური და კანადური ინვესტიცია განხორციელდა ამ მიმართულებით", - აღნიშნა პრემიერმა.

შეგახსენებთ, რომ საქართველო 2017 წელს 20 წლამდე მორაგბეთა მსოფლიო ჩემპიონატს უმასპინძლებს. ეს პირველი შემთხვევაა, როდესაც ამ ტურნირს არაელიტური სარაგბო ქვეყანა გამართავს.

აღსანიშნავია, რომ ინფრასტრუქტურის მოწყობა ზემოაღნიშნულ ჩემპიონატს და საქართველოში გასამართ სხვა სპორტულ საერთაშორისო ასპარეზობებს უკავშირდება.

"2017 წელს ჩვენ უნდა ვუმასპინძლოთ რაგბის 20-წლამდელთა მსოფლიო ჩემპიონატს და ასევე, ხელბურთში 19-წლამდელთა ევროპის ჩემპიონატს. გვაქვს ინფრასტრუქტურის მოწყობის ვალდებულება. უმნიშვნელოვანესია, რომ 130 მილიონზე მეტი ინვესტიცია ხორციელდება. ეს ხელს შეუწყობს, რომ მაღალ დონეზე გავუძღვეთ ამ ღონისძიებებს" - განაცხადა ტარიელ ხეჩიკაშვილმა, საქართველოს სპორტისა და ახალგაზრდობის საქმეთა მინისტრმა.

მომზადებულია rugby.ge-ს მიხედვით