ზაზა ფაჩულიას გამარჯვება "ოკლაჰომაში" და კარის ინციდენტი უესტბრუკთან [VIDEO]

"გოლდენ სტეიტ უორიორსმა" ოკლაჰომა სიტიში "სანდერი" დაამარცხა და წარმატებული სერია 4 მატჩამდე გაზარდა. ამით ოკლენდელებმა "ოკლაჰომას" 5-მატჩიანი მოგებათა სერია შეუწყვიტეს და ეს ისე გააკეთეს, პრობლემა თითქმის არ შექმნიათ.

მატჩის ბოლო პერიოდში ყველაფერი გარკვეული იყო და თამაში სათადარიგოებმა ჩაამთავრეს. "გოლდენ სტეიტმა" შეხვედრა 111:95 მოიგო.

"ოკლაჰომა სიტის" ყოფილი ვარსკვლავი კევინ დურანტი, რომელიც სეზონის წინ "გოლდენ სტეიტში" გადავიდა, დარბაზში იყო, მაგრამ ტრავმის გამო შეხვედრაში მონაწილეობა არ მიუღია, თუმცა "გოლდენ სტეიტმა" ისე კარგად ითამაშა, დურანტის დახმარება არ დასჭირვებია.

მატჩში ხშირი იყო კონფლიქტები კალათბურთელთა შორის, რის გამოც მსაჯებს ტექნიკური ჯარიმების მიცემა მოუხდათ სტეფ კარისთვის, დრეიმონდ გრინისთვის და ოკლაჰომელებისთვის - სემაი კრისტონისა და რასელ უესტბრუკისთვის. ამ უკანასკნელმა შეხვედრა 15 ქულით დაასრულა, არადა, "გოლდენ სტეიტთან" წინა შეხვედრაში 47 ქულა მიითვალა.
ზაზა ფაჩულიამ სასტარტო ხუთეულში ითამაშა და მოედანზე გატარებულ 14 წუთში 2 ქულა, 2 მოხსნა და 1 პასი მიითვალა. ქართველმა ცენტრმა 4-დან 1 ორქულიანი ჩააგდო. მოწოდებაზე ვერ იყო მისი ოკლაჰომელი ოპონენტი სტივ ადამსი, რომელიც 22 წუთში 9 ქულას და 1 მოხსნას დასჯერდა. რაც შეეხებათ ოკლენდელებს, ლიდერობა კლეი ტომპსონმა და სტეფ კარიმ გასწიეს, რომლებმაც 7-7 სამქულიანი ჩააგდეს. ტომპსონმა 34 ქულა მიითვალა, ხოლო კარიმ - 23.

"გოლდენ სტეიტს" 56 გამარჯვების წილ 14 მარცხი მოუგროვდა და ლიგას ლიდერობს. მდევარ "სან ანტონიოს" 2 მარცხით მეტი და 3 გამარჯვებით ნაკლები აქვს. მომდევნო მატჩი ოკლენდელებს ფაჩულიას ყოფილ გუნდ "მავერიკსთან", 22 მარტს, დალასში ელით.

დღის სხვა მატჩები ასე დასრულდა:

შარლოტი-ატლანტა 105:90
ინდიანა-იუტა 107:100
ორლანდო-ფილადელფია 112:109
სელტიკი-ვაშინგტონი 110:102
ჰიუსტონი-დენვერი 125:124
კლიპერსი-ნიუ იორკი 114:105

მომზადებულია gbf.ge-ს მიხედვით