17 წლის სანდრო მამუკელაშვილი NBA-ს კიდევ ერთი ნაბიჯით მიუახლოვდა

ამერიკული მედიის ინფორმაციით, სანდრო მამუკელაშვილმა კარიერის გაგრძელება სეტონ ჰოლის კოლეჯში გადაწყვიტა. სეტონ ჰოლის "პირატები" NCAA-ს I დივიზიონში თამაშობს.

ერთ-ერთი უნიჭიერესი ქართველი კალათბურთელი (რომელსაც ამერიკის მოქალაქეობა აქვს) ამჟამად მონტვერდეს აკადემიის გუნდში თამაშობს. უკვე მარტში გახდა ცნობილი, რომ მამუკელაშვილი 6 კოლეჯის მიწვევას განიხილავდა, მათ შორის იყო "სეტონ ჰოლიც".

დიდი ალბათობით, "სეტონ ჰოლის" ფორვარდი ანხელ დელგადო NBA-ს დრაფტზე დადგება, მამუკელაშვილი კი მის შემცვლელად განიხილება.

სანდრო თავადაც ითვლება NBA-ს კალიბრის კალათბურთელად და მასაც უკავშირებენ მომავალში ეროვნულ საკალათბურთო ლიგას. ის 1999 წელს არის დაბადებული და მაისში 18 წლის ხდება.

"სეტონ ჰოლში" თავი ისე ვიგრძენი, როგორც სახლში. ძალიან მომეწონა იქაური ატმოსფერო", - უთხრა მამუკელაშვილმა scout.com-ს.

ბოლო კალათბურთელი "სეტო ჰოლიდან", ვინც NBA-ს დრაფტზე აიყვანეს, აიზეა უაითჰიდი იყო 2016 წელს. 2001 წელს ამ გუნდიდან ეროვნულ საკალათბურთო ლიგაში მოხვდნენ სემუელ დეილემბერტი და ედი გრიფინი.