ბოლო ხუთი წლის შეფასება: ტოპკლუბების ტოპდანახარჯები

AutoSharing Option
დღევანდელ ჩვენს წერილში ბოლო ხუთი წლის განმავლობაში სატრანსფერო ბაზარზე ყველაზე აქტიური კლუბების მოქმედებას მიმოვიხილავთ.

როგორც თავად ნახავთ, მათ შემადგენლობის გასაძლიერებლად მართლაც რომ ასტრონომიული თანხა დახარჯეს. ზოგიერთმა ტრანსფერმა გაამართლა, ზოგი გარიგება კი, ამ სიტყვის პირდაპირი მნიშვნელობით, ჩაფლავდა. მაშ ასე, წარმოგიდგენთ ბოლო ხუთწლედის სატრანსფერო ბაზრის ყველაზე აქტიურ კლუბებს.

რომა
დახარჯა: 399 მილიონი ევრო
ყველაზე ძვირი ტრანსფერები: იტურბე - 24,5 მილიონი ევრო; სტროტმანი - 17,5 მილიონი; ჟერსონი - 16,6 მილიონი.

სამი ტოპტრანსფერიდან იტალიურ გრანდს მხოლოდ ერთმა გაუმართლა. ჰოლანდიელი საყრდენი ნახევარმცველი სტროტმანი გუნდს ძალიან
გამოადგა. მეტიც, ის რომაელთა ერთ-ერთ გამოკვეთილ ლიდერად ჩამოყალიბდა და დღეს ამ იტალიური კლუბის წარმოდგენა მის გარეშე შეუძლებელია. "რომამ" რომ მოინდომოს, სტროტმანს გაცილებით ძვირად გაყიდის, ვიდრე იყიდა.

სამაგიეროდ, ოდნავაც ვერ გაამართლეს იტურბესა და ჟერსონის ტრანსფერებმა. განსაკუთრებით ბევრს ელოდნენ იტურბესაგან, მაგრამ როგორც ჩანს, "ვერონაში" გაბრწყინება მისი კარიერის მწვერვალი იყო.

მონაკო
დახარჯა: 403 მილიონი ევრო
ყველაზე ძვირადღირებული ტრანსფერები: ხამესი - 45 მილიონი; ფალკაო - 43 მილიონი; ჟოაო მოუტინიო - 25 მილიონი; ტილემანსი - 25 მილიონი.

იყო დრო, "მონაკო" ყიდულობდა ყველაფერს და ყველას, რაც და ვინც ძვირი ღირდა. დროთა განმავლობაში კლუბმა გეზი შეიცვალა და ახლა არანაკლებ საინტერესო გზას ადგას. ისტორია კი დარჩა. ხამესმა სამთავროელ ქომაგს არაერთი დაუვიწყარი წუთი აჩუქა და მერე მადრიდის "რეალში" გადავიდა. რადამელ ფაკლაო დღესაც იქაა. ეს ორი ფეხბურთელი სამუდამოდ შევა მონეგასკური კლუბის ისტორიაში.

რეალი
დახარჯა: 452 მილიონი ევრო
ყველაზე ძვირადღირებული ტრანსფერები: ბეილი - 101 მილიონი; ხამესი - 75 მილიონი; ილიარამენდი - 32 მილიონი.

თუ ბოლო წლებში "რეალის" მიერ მოპოვებულ ტიტულებს დავითვლით, თითქოს, უკანასკნელ ხუთ წელიწადში განხორციელებული სამივე ტოპტრანსფერი უაღრესად იღბლიანად უნდა ჩავთვალოთ, მაგრამ ასე სულაც არაა. რა თქმა უნდა, თუ ტრავმების ეპიდემიას ნაკლად არ ჩავუთვლით, გარეთ ბეილმა გაამართლა. სამაგიეროდ, ამას ვერ ვიტყვით ხამეს როდრიგესსა და ასიერ ილარამენდიზე. ამ დროისათვის "რეალში" არც ერთი მათგანი აღარ ირიცხება. კოლუმბიელმა რამდენიმე დღის წინ მიუნხენის "ბაიერნს" მიაშურა, ილარა კი მშობლიურ "სოსიედადს" დაუბრუნდა.

ბარსელონა
დახარჯა:474 მილიონი ევრო
ყველაზე ძვირადღირებული ტრანსფერები: ნეიმარი - 88,2 მილიონი; სუარესი - 81,72 მილიონი; ანდრე გომეში - 35 მილიონი.

ნეიმარისა და სუარესის შემთხვევაში "ბარსამ" "ათიანში" გაარტყა. ორივე ეს ფეხბურთელი თავისუფლად შეგვიძლია მივიჩნიოთ კატალონიური კლუბის ლიდერებად მესისთან და ინიესტასთან ერთად. აი, ანდრე გომეშს კი აშკარად მეტი მოეთხოვება. პორტუგალიელმა ვერა და ვერ იპოვა საკუთარი თავი "კამპ ნოუზე". დიდი ალბათობით, ის ვეღარც მოუმატებს.

ლივერპული
დახარჯა: 457 მილიონი ევრო
ყველაზე ძვირადღირებული ტრანსფერები: ბენტეკე - 46,5 მილიონი; სალაჰი - 42 მილიონი; მანე - 41,2 მილიონი.

მანეს ტრანსფერი აშკარად იღბლიანია. სენეგალელი ვინგერი მოკლე ხანში იქცა გუნდის ერთ-ერთ ლიდერად და ის იდეალურად ერგება იურგენ კლოპის ტაქტიკურ სქემას. სალაჰი "ენფილდზე" ამ ზაფხულს მივიდა და მას ყველაფერი წინ აქვს. სამაგიეროდ, სრული კრახი განიცადა კრისტიან ბენტეკეს ტრანსფერმა. ის "ლივერპულში" დიდი იმედებით მივიდა, თუმცა მოლოდინი ოდნავაც ვერ გაამართლა და "ლივერპული" იძულებული გახდა, ბელგიელი გაცილებით ნაკლებ ფასში გაეყიდა "კრისტალ პალასში".

პსჟ
დახარჯა: 462 მილიონი ევრო
ყველაზე ძვირადღირებული ტრანსფერები: კავანი - 64,5 მილიონი; დი მარია - 63 მილიონი; დრაქსლერი - 40 მილიონი.

ორი აზრი არაა - ამ ტრანსფერებმა უფრო ძლერი გახადა პარიზული კლუბი, მაგრამ გუნდის ხელმძღვანელობა, ალბათ, მეტზე ფიქრობდა, როცა ეს გარიგებები განახორციელა. საფრანგეთის ხშირი ჩემპიონობა საქმეს ვერ შველის. "პარი სენ-ჟერმენი" ვერა და ვერ იქცა დომინანტ გუნდად ჩემპიონთა ლიგაზე. თანაც, იქმნება შთაბეჭდილება, რომ დი მარიამ და კავანიმ უკვე აჩვენეს პარიზში თავიანთი მაქსიმუმი. რაც შედხება დრაქსლერს, მას აშკარად აქვს იმის პოტენციალი, რომ მოუმატოს და გუნდის ერთ-ერთ ლიდერად იქცეს.

იუვენტუსი
დახარჯა: 483 მილიონი ევრო
ყველაზე ძვირადღირებული ტრანსფერები: იგუაინი - 90 მილიონი; დიბალა - 40 მილიონი; პიანიჩი - 32 მილიონი.

ტურინში ძალიან ბევრს ფიქრობენ, სანამ ფეხბურთელში დიდ ფულს გადაიხდიან. თამამად შეიძლება ითქვას, რომ სამივე ტრანსფერმა გაუმართლა "ბებერ ქალბატონს". ახლა რჩება მთავარი - ჩემპიონთა ლიგის მოგება, რასთანაც "იუვე" ორჯერ იყო ძალიან ახლოს. ამ შემადგენლობით ტურინულ კლუბს იტალიაში კიდევ კარგა ხანს არ ეყოლება კონკურენტი.

ჩელსი
დახარჯა: 526 მილიონი
ყველაზე ძვირადღირებული ტრანსფერები: ბატშუაი - 39 მილიონი; დიეგო კოშტა - 38 მილიონი, კანტე - 35,8 მილიონი.

თუ არ ჩავთვლით მიში ბატშუაის ტრანსფერს, ორივე გარიგება ძალიან კარგი აღმოჩნდა "არისტოკრატთათვის". დიეგო კოშტა და ნგოლო კანტე იდეალურად შეერწყნენ ლონდონურ კლუბს. დღეს ამ ორი ფეხბურთელის გარეშე "ჩელსის" ვერავინ წარმოიდგენს.

სიტი
დახარჯა: 721 მილიონი ევრო
ყველაზე ძვირადღირებული ტრანსფერები: დე ბრუინი - 75 მილიონი; სტერლინგი - 62,5 მილიონი; სტოუნსი - 55,6 მილიონი.

სამივე ტრანსფერთან დაკავშირებით არის კითხვის ნიშნები. ვერც ერთი ფეხბურთელი ბოლომდე ვერ თამაშობს ისე, როგორც ამას მათგან ელოდნენ. თუ სტერლინგი და დე ბრუინი შედარებით ამართლებენ დანახარჯს, სადებიუტო სეზონში სტოუნსს ძალიან გაუჭირდა, მას სათადარიგოთა სკამზეც კი ვხედავდით.

მანჩესტერ იუნაიტედი
დახარჯა: 733 მილიონი ევრო
ყველაზე ძვირადღირებული ტრანსფერები: პოგბა - 105 მილიონი; ლუკაკუ - 84,7 მილიონი; დი მარია - 75 მილიონი.

სიას სათავეში "მანჩესტერ იუნაიტედი" უდგას, "წითელმა ეშმაკებმა" ბოლო ხუთ წელიწადში მართლაც რომ კოლოსალური თანხა დახარჯეს. დი მარია უკვე აღარ არის გუნდში. პოლ პოგბა კარგია, მაგრამ ბევრი მიიჩნევს, რომ კიდევ უკეთესი უნფა იყოს. რომელუ ლუკაკუ კი ამ ზაფხულს მივიდა "ოლდ ტრაფორდზე".

ყოველდღიური სპორტული გაზეთი "ლელო"
მკითხველის კომენტარები / 0 /
კომენტარი ჯერ არ გაკეთებულა.

სიახლეები პოპულარული