ალესანდრო ფლორენცი: მაშინ მეგონა, ყველა ოცნება ავიხდინე

AutoSharing Option
ზაფხულში ალესანდრო ფლორენციმ ჯვარედინი მყესი გაიწყვიტა და მას შემდეგ სარეაბილიტაციო პერიოდს გადის. "რომას" და იტალიის ნაკრების ფეხბურთელი უკვე ინდივიდუალური პროგრამით ვარჯიშობს და მალე დაუბრუნდება მოედანს. იქამდე, ფლორენციმ ინტერვიუ მისცა გამოცემა "ფიფა 1904"-ს, რომელსაც აქვე გთავაზობთ.

- ალესანდრო, როდის დაბრუნდებით მოედანზე?
- უკვე ინდივიდუალური პროგრამით ვვარჯიშობ და თავს კარგად ვგრძნობ. ვაკვირდებით თუ, როგორ რეაგირებს მუხლი დატვირთვებზე და სარეაბილიტაციო კურსი გეგმის მიხედვით მიდის. იმედია, მალე დავუბრუნდები მოედანს.

- რას ნიშნავს თქვენთვის რომა?
- კლუბი ჩემთვის მეორე ოჯახია. ბავშვობიდან ვოცნებობდი, რომ "რომას" მაისური
მომერგო და ეს ოცნება რეალობად მექცა. ვამაყობ, რომ მიზანს მივაღწიე და დღეს, ამ ოჯახის წევრი ვარ.

- ფრანჩესკო ტოტი მალე დაასრულებს კარიერას, რის შემდეგაც "რომას" კაპიტანი თქვენ იქნებით?
- გუნდში არის დანიელე დე როსი, რომელიც ვიცე-კაპიტანია, ნამდვილი ლიდერია და თანაგუნდელებში უდიდესი ავტორიტეტით სარგებლობს. სანამ "რომაში" ფრანჩესკო ტოტი და დანიელე დე როსი თამაშობენ, იქამდე კაპიტანი სხვა ვერ იქნება.

- შეუძლია "რომას" მიმდინარე სეზონში სკუდეტოს მოგება?
- ჩვენ ამისთვის ყველაფერს გავაკეთებთ, დანარჩენს კი დრო გვიჩვენებს. "იუვენტუსი" უძლიერესი გუნდია და მისი ჩამოტოვება რთულია, მაგრამ ჩვენც ვპროგრესირებს და, ვფიქრობ, ბოლომდე ვიბრძოლებთ.

- როგორ გამოიყურება სერია A სხვა ტოპჩემპიონატების ფონზე?
- ვფიქრობ, რომ ჩვენი ლიგა პროგრესირებს და მალე დაიბრუნებს ძველ დიდებას. ვხედავ, რომ ყველა კლუბი ცდილობს ამ პროცესს ხელი შეუწყოს. მართალია, ინგლისისის პრემიერლიგა უკეთესად შეფუთული ტურნირია, მაგრამ უეფას კოეფიციენტების მიხედვით, ჩვენ შორის სხვაობა სულ უფრო მცირდება. დარწმუნებული ვარ, სერია A მალე დაბრუნდება ევროპული ფეხბურთის მწევრვალზე და იტალიაში თამაში კვლავ მიმზიდველი იქნება ვარსკვლავებისთვის.

- იტალიის ნაკრების პერსპექტივაზე რას გვეტყვით?
- დარწმუნებული ვარ, რომ იტალიის ნაკრებს კარგი მომავალი აქვს. გვყავს როგორც გამოცდილი ფეხბურთელები, ისე პერსპექტილი ახალგაზრდები, ეს სინთეზი კი დადებით შედეგს მოიტანს. ახალი მწვრთნელი ყველაფერს აკეთებს, რომ გუნდმა წარმატებით იასპარეზოს და ასევე, სანახაობვრივი თამაში აჩვენოს. ვენტურა იდეალურად ერკვევა ტაქტიკურ ნიუანსებში და ფეხბურთელებთან ადვილად პოულობს საერთო ენას.

- ეთანხმებით არიგო საკის, რომ იტალიური ფეხბურთი ზედმეტად კონსერვატული და მოძველებულია?
- მოძველებული არამგონია, მაგრამ თუ ტაქტიკურ მონახაზებზე ვიტყვით, იტალიურ ფეხბურთში არის კონსერვატული ელემენტები.

- რა მოლოდინი გაქვთ 2018 წლის მუნდიალის მიმართ?
- ევროპის ჩემპიონატზე იტალიის ნაკრებმა კარგად ითამაშა და არც მსოფლიოს ჩემპიონატის შესარჩევ ეტაპზე დავწიეთ თამასა. თუმცა, ჯერ საგზური უნდა გავინაღდოთ და შემდეგ, ვიფიქრებთ მუნდიალზე. იმედია, ტრავმის შემდეგ მალე ჩავდგები ფორმაში და დავიბრუნებ ადგილს ეროვნულ ნაკრებში. ბუნებრივია, რომ ჩემი ოცნება მსოფლიოს ჩემპიონატზე თამაშია.

- ანტონიო კონტე ისევ ყურადღების ცენტრშია. მოგწონთ მისი მუშაობის სტილი?
- არ მიკვირს და ძალიან მიხარია, რომ ანტონიო კონტე ინგლისში წარმატებით მუშაობს. დარწმუნებული ვიყავი, რომ მისი მეთოდები პრემიერლიგაშიც გაამართლებდა. კონტეს თავკაცობით, იტალიის ნაკრებმა დიდი პროგრესი განიცადა და ჩაგდებული მუნდიალის შემდეგ, ევროპის ჩემპიონატზე კარგი შთაბეჭდილება დატოვა.

- თქვენ ერთ-ერთი ხართ იმ ახალგაზრდა იტალიელ ფეხბურთელთაგან, რომლებმაც საქველმოქმედო ფონდი ჩამოაყალიბეთ და გაჭირვებულ ადამიანებს ეხმარებით...
- ჩემთვის უდიდესი პატივია ამ ფონდში საქმიანობა და ბედნიერი ვარ, რომ ვეხმარები იმათ, ვისაც ეს ყველაზე მეტად სჭირდება. როდესაც სხვას ეხმარები თუნდაც დაავადებისგან განკურნებაში, შენც უკეთესად გრძნობ თავს.

- რა მიზნები გაქვთ საფეხბურთო კარიერაში?
- ჯერ მხოლოდ 25 წლის ვარ და მთელი კარიერა წინაა. შესაბამისად, ბევრი მიზანი და სურვილი მაქვს. როდესაც "რომას" მთავარ გუნდში მოვხვდი და სერია A-ში პირველი მატჩი ჩავატარე, მაშინ ვიფიქრე, რომ ოცნება ამიხდა, თუმცა დღეს, ჩემს წინ უკვე სხვა სამიზნეებია. ვეცდები, რომ "რომასთან" და იტალიის ნაკრებთან ერთად ტიტულები მოვიგო.

- ზაფხულში ქალიშვილი შეგეძინათ და როგორ შეცვლა ამან თქვენი ცხოვრება?
- ძალიან შეცვალა. დღეები, როდესაც ჩემი მეუღლე გავიცანი და როდესაც შვილი შემეძინა, საუკეთესოა ჩემ ცხოვრებაში. ჩემი ცოლი, შვილი და მთლიანად ოჯახი, ყველაზე ძვირფასია, რაც კი გამაჩნია. ტრავმას ერთი პლუსი მაინც ჰქონდა, რადგან დროის დიდი ნაწილი ოჯახთან ერთად გავატარე. მამობა განსაკუთრებული გრძნობაა, რომელსაც ვერაფერი შეედრება.

- თქვენც 40 წლამდე აპირებთ "რომაში" თამაშს?
- იქამდე დიდი დროა და ნუ გავუსწრებთ წინ მოვლენებს. გამორიცხული არაფერია და მით უმეტეს მაშინ, თუ ისეთ ოჯახში გაიზარდე, სადაც ყველა "რომას" თავგადაკლული გულშემატკივარია...

ყოველდღიური სპორტული გაზეთი "ლელო"
მკითხველის კომენტარები / 0 /
კომენტარი ჯერ არ გაკეთებულა.

სიახლეები პოპულარული