სექს-სკანდალში გახვეული ფეხბურთელის შეცდომებზე სხვებმა უნდა ისწავლონ

* "სანდერლენდმა" სექს-სკანდალში გახვეული ადამ ჯონსონი გუნდიდან მოკვეთა.
* ჯონსონი სახლში თავდებით გამოუშვეს, მას 14-წლიანი პატიმრობა ემუქრება.

დარემი ბრიტანეთის ერთ-ერთი ყველაზე ლამაზი ქალაქია. მყუდრო და ელიტარული რაიონი დაახლოებით ნახევარი საათის სავალზეა სანდერლენდიდან.

ორშაბათ დილით ფეშენებელურ სახლთაგანს, ან თუ გენებოთ, "ჟანრის კლასიკას" როგორც შეეფერება, "ვილა" ვთქვათ... მოკლედ, ფეშენებელურ ვილას სამი ავტომობილისგან შემდგარი ესკორტი ესტუმრა.

"სიმართლე ითქვას, თავიდან ძარცვა მეგონა" - ეუბნება "სანს" მეზობელი. თუმცა ეს ძარცვა არ გახლდათ, სახლს, რომელსაც იქამდეც ბევრი სტუმარი ჰყოლია, პატრონის მეგობრებისა და ნაცნობების სახით, ამჯერად პოლიციამ მიაკითხა.

ალბათ, ხვდებით, რომ ეს ვილა ადამ ჯონსონს ეკუთვნის, რომელმას ის 2012 წელს 1,85 მილიონ გირვანქად იყიდა. "ავტომანქანებს არანაირი განმასხვავებელი ნიშანი არ ჰქონდათ, იქიდან შავებში გამოწყობილი ადამიანები გადმოვიდნენ და რაღაც დროის მერე, მეპატრონე ხელბორკილებით წაიყვანეს", - აგრძელებს საუბარს ხსენებული მეზობელი.

"ეი ჯეი" არასრულწლოვან გოგონასთან სექსუალურ კავშირშია მხილებული, კერძოდ კი, 15 წლის სკოლის მოსწავლესთან. სანამ ადამიანი 16 წლის არ გახდება, სექსუალური ცხოვრებისთვის მომწიფებულად არ ითვლება და "სანდერლენდის" გარემარბის საქმეც მძიმედაა, მას 14 წლამდე პატიმრობა ემუქრება.

ადამ ჯონსონი 27 წლისაა. იგი სანდერლენდშია დაბადებული, მაგრამ პროფესიონალური კარიერა "მიდლსბროში" დაიწყო, რასაც "ლიდსი", "უოტფორდი" და "სიტი" მოჰყვა. სწორედ "ქალაქელების" რიგებიდან გადაბარგდა ის საკუთარი ქალაქის კლუბში. "ეი ჯეის" ინგლისის ნაკრებში 12 შეხვედრა აქვს ჩატარებული და 2 გოლი გატანილი.

მეზობლებს ოღონდ სალაპარაკო მიეცი და... ჰოდა, ჯონსონის კიდევ ერთი ყოფილი მეზობელი "მირორს" ეუბნება:

"ეს ბიჭი ნამდვილი მექალთანეა. ის თითქმის ყოველდღე ახალ გოგოსთან ერთად იყო ხოლმე და ხშირად ბრუნდებოდა სახლში შუაღამისას. არავისთვის არაა საიდუმლო არც ის, რომ ადამს სმა უყვარს. მანქანაც ხშირად დაუტოვებია და შინ ტაქსით დაბრუნებულა".

სიტუაციას უფრო ამძიმებს ის, რომ ადამი სტეისი ფლაუნდერთან ერთად ცხოვრობს, რომელიც მისი არაოფიციალური მეუღლეა. წყვილს იანვრის დასაწყისში გოგონა შეეძინა, რომელსაც საინტერესო სახელი დაარქვეს - აილა სოფია.

"სანდერლენდმა" ჯონსონი გუნდიდან მოკვეთა, კლუბი სკანდალური ისტორიისგან თავს შორს იჭერს. სამაგიეროდ, ერთადერთი კარგი ამბავი ჯონსონის გარშემო ახლა ის არის, რომ მას თავისი ოჯახი, სტეისი ფლაუნდერი და მისი ოჯახი სრულ მხარდაჭერას უცხადებს და გვერდზე უდგას. "ეი ჯეი" თავდებით გამოუშვეს, გამოძიება კი გრძელდება.

ადამ ჯონსონი "გათამამებული ბავშვი" იყო და გარკვეულწილად, ასეთად დარჩა. 7 წლის ასაკში თავისი სკოლის გუნდში ორი გოლი გაიტანა "უემბლიზე" და ლეგენდებისგან დიდი ქება დაიმსახურა.

12 წლისა "მიდლსბროს" აკადემიაში მოხვდა და უკვე 17 წლისას ამ კლუბის მაისურით პროფესიონალური დებიუტი ჰქონდა უეფას თასზე. ყველა ჯადოსნური ცაციის მქონე "ოქროს ბიჭუნაზე" ლაპარაკობდა და "ეი ჯეიმაც" ინგლისის ახალგაზრდულ ნაკრებში შეაღო კარი.

2010 წელს იგი "სიტიში" გადაბარგდა. ცოტა მატჩი მანჩესტერელების რიგებში არ ჩაუტარებია, მაგრამ მაინც უკმაყოფილო წამოვიდა და თავისი პოტენციალი ბოლომდე ვერ გამოიყენა. ადამმა ვერ გათვალა, რომ ასეთ გუნდში მხოლოდ ტალანტით ფონს ვერ გავიდოდა და სირთულეებსა და მათ დაძლევას მიუჩვეველი "ეი ჯეი" განაწყენდა, მისთვის იქამდე ყველაფერი სურვილისამებრ იყო.

ამბობენ, ჯონსონი ჯიბრზე არ ასრულებდა რობერტო მანჩინის დავალებებს და დაცვის დასახმარებლად უკან არ ჩადიოდაო. ერთხელ გაბუტული კლუბის ავტობუსში არ ჩაჯდა და სახლში ისე დაბრუნდა, მარტო.

"ვფიქრობ, "სიტიში" გადასვლა შეცდომა იყო. იქ ახალგაზრდა ფეხბურთელებს არ ენდობიან და ეს სხვებისთვის გაკვეთილად უნდა გამოდგეს" - თქვა უკვე "სანდერლენდში" გადასულმა "ეი ჯეიმ".

ნამდვილი შეცდომა კი ჯონსონმა ახლა დაუშვა... ფეხბურთელები, ზოგადად, ადამიანები მსგავს სკანდალებში ხშირად ეხვევიან; უბრალოდ, ზოგი ხმაურდება და იძაბება, ზოგი - არა. ჯონსონს არ გაუმართლა და ახლა პასუხისგება მოუწევს.

"სიტიში" ყოფნისას, ის წინაღობებს არ ეპუებოდა და დროს მაინც კარგად ატარებდა. მაგალითად, ჯონსონმა ის აპარტამენტები აიღო, რომლებიც იქამდე კრიშტიანო რონალდოს ეკავა და ვარსკვლავივით ცხოვრება გააგრძელა, ბოჰემურად.

"სანდერლენდმა" კი მას იმდენი შესთავაზა, რამდენსაც "სიტიშიც" კი ვერ იღებდა - 2,5 მილიონი გირვანქა წელიწადში, პლუს თითქმის გარანტირებული სათამაშო ადგილი ძირითადში. თავიდან ყველაფერი კარგად დაიწყო, წინა სეზონში "ეი ჯეის" ერთი აფეთქების პერიოდიც ჰქონდა, მისი ნიჭი ისევ "ამოიფრქვა" და 2014 წელს იანვრის თვის პრემიერლიგის საუკეთესო მოთამაშედ დაასახელეს.

ბოლო მომენტამდე აცხადებდა ნაკრებში მოხვედრის და ბრაზილიაში გამგზავრების პრეტენზიას, კანდიდატთა შორისაც იყო. ეს სეზონი კი მისთვის მძიმედ დაიწყო, მაგრამ "ნიუკასლთან" დერბიში გამარჯვების გოლი გაიტანა და ამით იქამდელი უფერული მატჩები გადაფარა.

თითქოს, ჯონსონი ძველებურად უნდა ათამაშებულიყო, მაგრამ ქალების მოყვარულმა ადამმა ცდუნებას ისევ ვერ გაუძლო და "ვაშლი ჩაკბიჩა".

იგი ბოლო პერიოდში ისევ უნიათოდ გამოიყურებოდა. ბევრი ამას შვილის შეძენას უკავშირებდა. "ეი ჯეი" თითქოს გადაღლილ-გადამწვარი გახლდათ, თითქოს, სულ სხვაგან იყო. ახლა კი ვიცით, სადაც არის და რაც სჭირს - შარშია.

სწორედ ეს უნდა იყოს ახალგაზრდა ფეხბურთელებისთვის გაკვეთილი, რაც ჯონსონს ახლა გადახდა და რაც კიდევ ერთხელ გვიჩვენებს - რომ ცხოვრებაში არ შეიძლება გააკეთო ყველაფერი, რაც მოგინდება.

ყოველდღიური სპორტული გაზეთი "ლელო"